استانادا جىل بويى جۇمىس ىستەيتىن العاشقى اۋىلشارۋاشىلىق جارمەڭكەسى اشىلدى

نۇر- سۇلتان. قازاقپارات - ەلوردانىڭ پريگورودنىي ەلدى مەكەنىندە جىل بويى جۇمىس ىستەيتىن العاشقى اۋىلشارۋاشىلىق جارمەڭكەسى اشىلدى، دەپ حابارلايدى قازاقپارات قالا اكىمدىگىنە سىلتەمە جاساپ.

«اۋدانى 7 مىڭ شارشى مەتر بولاتىن جىلى ورىندا ەلوردانىڭ، سونداي- اق وزگە وڭىرلەردىڭ تاۋار وندىرۋشىلەرىنىڭ ونىمدەرى ۇسىنىلادى. ازىق- تۇلىك نارىق قۇنىنان تومەن باعامەن قويىلادى»، دەلىنگەن اكىمدىك مالىمەتىندە.

ءار دەمالىس كۇندەرى تاڭعى ساعات 8 دەن كەشكى ساعات 5 كە دەيىن تۇرعىندار جارمەڭكەدە اقمولا، پاۆلودار، قاراعاندى جانە شىعىس قازاقستان وبلىستارى تاۋار وندىرۋشىلەرىنىڭ، سونداي- اق ەلوردالىق تاۋار وندىرۋشىلەردىڭ ونىمدەرىن ساتىپ الا الادى. جارمەڭكەدە سيىر ەتىنىڭ كەلىسى - 2000 تەڭگە، جىلقى ەتى - 2200 تەڭگە، قازى، جايا 2500 تەڭگەدەن ساتىلادى.

«ءبىز كوكونىس وسىرەمىز. جارمەڭكە تۋرالى ەستىگەن بەتتە بىردەن ءوتىنىش بەردىك، ەندى ءوز ونىمدەرىمىزدى وسىندا شىعارىپ وتىرامىز. بىزدە كوكونىستىڭ 18 ءتۇرى بار، ءبارى جاڭا پىسكەن جانە باعالارى دا قولايلى»، - دەدى ساتۋشى رۇستەم.

ايتا كەتەيىك، جارمەڭكەدە ازىق- تۇلىك ونىمدەرىنىڭ بارلىق ءتۇرى - ءسۇت، باكالەيا، شۇجىق، ۇن، جاڭا اۋلانعان بالىق جانە تاعى باسقالارى ساتىلادى.

«جارمەڭكە سانيتارلىق نورمالاردى ساقتاي وتىرىپ وتكىزىلەدى. كەلۋشىلەر بەتپەردە تاعۋى، قول گيگيەناسىن، الەۋمەتتىك قاشىقتىقتى ساقتاۋى كەرەك»، - دەدى اكىمدىكتەن.

ءار اپتانىڭ سەنبى جانە جەكسەنبى كۇندەرى وتەتىن اۋىلشارۋاشىلىق جارمەڭكەسىنىڭ مەكەنجايى: پريگورودنىي ەلدىمەكەنى، ارناساي كوشەسى، 109-عيمارات.