قانداسىمىز بايان جالىن قىزى بەيجىڭ وليمپياداسىندا باق سىنايدى - شەتەلدەگى قازاق باسپا ءسوزى

نۇر-سۇلتان. قازاقپارات - «قازاقپارات» ح ا ا شەت مەملەكەتتەردە قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

قانداسىمىز بايان جالىن قىزى بەيجىڭ قىسقى وليمپياداسىندا باق سىنايدى - شىڭجاڭ گازەتى

شاڭعى سپورتى تۇرلەرى بويىنشا قىتاي ۇلتتىق قۇراماسىنا قابىلدانعان بايان جالىن قىزى بەيجىڭ قىسقى وليمپياداسىندا باق سىنايدى، دەپ جازادى شىڭجاڭ گازەتى.

اتالعان ب ا ق- تىڭ دەرگىنشە، قانداسىمىز بايان 1999-جىلى قىتايدىڭ التاي ايماعىندا تۋعان. ول بەيجىڭ قالاسىندا وتەتىن 2022-جىلعى XXIV قىسقى وليمپيادا ويىندارىندا تاۋ شاڭعىسى سپورتىنان ونەر كورسەتەدى.

بايان 2018-جىلدان باستاپ نورۆەگيا ەلىندە 3 جىل بويى تاۋ شاڭعىسى سپورتى بويىنشا دايىندالىپ، بىلىكتىلىگىن شىڭداعان.

«2018-جىلى نورۆەگيا ەلىنە العاش بارعان كەزدە، جەرگىلىكتى سپورتشىلارمەن اراداعى جارىستاردا ولاردىڭ شالىمىنا دا كەلمەدىك. تىپتەن باپكەرلەرىمىزدىڭ جاتتىعۋلارىنا دا ىلەسە الماي ءجۇردىم. كەيىن ۋاقىت وتە كەلە وسى قىيىندىقتاردى بىرتىندەپ ەڭسەردىم. جاڭا ورتاعا دا ۇيرەندىم. سپورتتىق ناتيجەمىز دە، بىلىكتىلىگىمىز دە جوعارلادى. وسىدان سوڭ كوڭىلىمىزگە سەنىم ۇيالادى. مەن سپورتتىق شەبەرلىگىمدى ۇزدىكسىز جەتىلدىرۋگە بار كۇش-جىگەرىمدى جۇمساپ تالاپتاندىم. ەندىگى ارمان، اسار اسۋىمىز بەيجىڭ قىسقى وليمپياداسىندا جەڭىس جولىنان، بيىك تۇعىردان كورىنۋ. سول ءۇشىن بار كۇشىمىزدى سالىپ، باق سىنايمىز»، - دەيدى بايان جالىن قىزى.

قاشقارلىق كەيۋانا 135 جاسىندا ومىردەن وزدى - قىتايدىڭ «ورتالىق حالىق راديوسى» (CNR)

قىتايدىڭ قاشقار ايماعىندا تۇراتىن كەيۋانا الىمقان سەيىت 16-جەلتوقسان كۇنى قاشقار قالاسىندا قايتىس بولدى، دەپ جازادى kazakcnr.com سايتى.

اتالعان اقپارات كوزىنىڭ جازۋىنشا، الىمقان سەيىت - قىتايدىڭ قاشقار ايماعى جاڭاشار اۋدانى قۇمشىلىك اۋىلىندا تۇرعان. ءۇش عاسىردىڭ كۋاسى بولعان كەيۋانا 1886-جىلى 25-ماۋسىمدا تۋعان.

بۇل كەزەڭ قىتايدى مانچجۋرلار اۋلەتى بيلەگەن چين پاتشالىعىنىڭ زامانىنا تۋرا كەلەدى. ال الىمقان سەيىتتى 2013-جىلى قىتايدىڭ قارتتار ۇيىمى (گەرونتولوگيا) ەڭ ۇزاق جاساعان ادام دەپ تانىعان.

الىمقان سەيىت 1903-جىلى 17 جاسىندا تۇردى روزىعا تۇرمىسقا شىققان. ءبىراق بالا سۇيە الماعان ەرلى-زايىپتىلار ءبىر ۇل، ءبىر قىز اسىراپ الادى. ۇلى 36 جاسىندا اۋىرىپ قايتىس بولىپ، كوپ ۇزاماي كۇيەۋى تۇردى دا ماڭگىلىك ساپارعا اتتانادى.

بۇگىنگى كۇنى الىمقاننىڭ سول جالعىز قىزى تاجىگۇلدەن تاراعان 40 قا جۋىق ۇرپاعى بار ەكەن. ال كەيۋانانى قاشقار قالاسىندا تۇراتىن نەمەرەسى قۇربان نۇر كۇتىم جاساپ، باققان.

وسىلايشا ءۇش عاسىردىڭ كۋاسى سانالعان الىمقان سەيىت 16-جەلتوقسان كۇنى، 135 جاسىندا وسى نەمەرەسىنىڭ ۇيىندە ومىردەن وزعان.

ال كەيۋانانىڭ ءجۇرىپ-تۇرۋى قيىنداعان سوڭعى جىلدارعا دەيىنگى كۇندەلىكتى تىرشىلىك داعدىسى قاراپايىم بولعان. تاڭعى ساعات 5-6 دا تۇرىپ نامازىن وقىپ، 8 دە تاڭعى اسىن ىشكەن. كەشكى ساعات 10 دا ۇيىقتاپ دەمالعان. شاي ىشكەندى ۇناتپايدى، ونىڭ ورنىنا سالقىن سۋ ىشكەن. نان، قويان ەتىن جەپ، كەسپە، قىرىققابات سورپاسىن ءىشۋدى جاقسى كورگەن. كوڭىل-كۇيى جايدارى، ءان ايتۋعا اۋەس بولعان.

تىرشىلىگىندە ەگىنشىلىكتى كاسىپ ەتكەن كەيۋانا قاۋىن، شابدالى جانە قارا ورىك سياقتى جەمىستەردى جەگەندى ۇناتقان. سونىمەن بىرگە ەڭ سۇيىكتى جەمىسى - كىشكەنتاي، قىشقىل جاسىل ورىك بولعان.

ەسكە سالا كەتەيىك، وتكەن جىلى قازاقپارات ا. سەيىتتىڭ 134 جاسقا تولعان تۋعان كۇنىن اتاپ وتكەنى تۋرالى اقپارات جازعان بولاتىنبىز.

تاۋەلسىزدىك كۇنىنە وراي موڭعوليادان مۋزىكالىق قۇتتىقتاۋ جولدادى - KAZNEWS

قازاقستان رەسپۋبليكاسى تاۋەلسىزدىگىنىڭ 30 جىلدىعىن مەرەكەلەۋ اياسىندا قازاقستان رەسپۋبليكاسىنىڭ موڭعولياداعى ەلشىلىگى مەن موڭعوليانى مەكەندەيتىن قانداستار بىرلەسىپ ءبىرقاتار ءىس-شارالار ۇيىمداستىردى، دەپ حابارلايدى موڭعوليانىڭ Kaznews اقپارات پورتالى.

«14- جەلتوقسان كۇنى «يدەر» ۋنيۆەرسيتەتىندە قازاق ءتىلى، ادەبيەتى جانە مادەنيەتى كابينەتى اشىلدى.

جوبانى قازاقستاننىڭ موڭعولياداعى ەلشىلىگى، «وتانداستار» قورى، «بايان-ولگەي ايماعىنىڭ ۇلان-باتىرداعى جەرلەستەر القاسى» ۇكىمەتتىك ەمەس ۇيىمى جانە «يدەر» ۋنيۆەرسيتەتى بىرلەسىپ جۇزەگە اسىردى.

ال، 15- جەلتوقسان كۇنى قازاقستاننىڭ موڭعولياداعى ەلشىلىگى «ەل بىرلىگى» ۇكىمەتتىك ەمەس ۇيىمىمەن بىرلەسىپ نالايح قالاسىنداعى قازاق مادەني ورتالىعىندا تاۋەلسىزدىك كۇنىنە ارنالعان مۋزىكالىق قۇتتىقتاۋدى ۇيىمداستىردى.

موڭعولدىڭ ۇلتتىق كيىمىن كيگەن دومبىراشىلار توبى قازاقتىڭ بەلگىلى كومپوزيتورلارىنىڭ شىعارمالارىن ورىندادى.

ەلشى ج. ادىلبايەۆ نالايح قالاسىنداعى قازاق دياسپوراسىنىڭ جاستارىنا ەرەكشە قۇتتىقتاۋ ءۇشىن العىسىن ايتا وتىرىپ، دومبىرانىڭ جاي عانا مۋزىكالىق اسپاپ ەمەس، ونىڭ قاسيەتتى مۇرا ەكەنىن جانە قازاق حالقىنىڭ وزىندىك كەلبەتى بار برەندى ەكەنىن اتاپ ءوتتى.

سونىمەن قاتار، 15- جەلتوقساندا ەلشىلىكتىڭ قولداۋىمەن موڭعوليانىڭ قازاقستان رەسپۋبليكاسىنداعى بۇرىنعى ەلشىسى دامدينجاۆ داشنيامنىڭ «ەۋرازيانىڭ ءىنجۋ-مارجانى» اتتى ماقالاسى موڭعول تىلىندە «ودرين سونين» گازەتىندە جاريالاندى.

ماقالادا اۆتور قازاقستان تۋرالى العان اسەرلەرىمەن بولىسەدى، تاۋەلسىزدىكتىڭ 30 جىلى ىشىندە جۇرگىزىلگەن رەفورمالار مەن حالىقارالىق ساحىنادا قول جەتكىزگەن تابىستار تۋرالى ويلارىمەن بولىسەدى»، - دەپ جازدى Kaznews.

وزبەك باقشى ونەرى يۋنەسكو تىزىمىنە ەندى - «ءو ز ا» اقپاراتتىق اگەنتتىگى

ەرەكشە تاريحي-مادەني مۇرا باقشىلىق ونەرى (جىراۋلىق ونەر) يۋنەسكو تىزىمىنە ەندى، دەپ جازادى وزبەكستاننىڭ «ءو ز ا» مەملەكەتتىك اقپاراتتىق اگەنتتىگى.

«يۋنەسكونىڭ ماتەريالدىق ەمەس مادەني مۇرانى قورعاۋ جونىندەگى ۇكىمەتارالىق كوميتەتىنىڭ XVI سەسسياسى اياسىندا باقشىلىق ونەرى وزبەكستاننىڭ ماتەريالدىق ەمەس مادەني مۇراسىنىڭ ەلەمەنتى رەتىندە ادامزاتتىڭ ماتەريالدىق ەمەس مادەني مۇراسىنىڭ رەپرەزەنتاتيۆتى تىزىمىنە ەنگىزىلدى.

تۋريزم جانە سپورت مينيسترلىگىنىڭ مالىمەتىنشە، وسى ەلەمەنت بويىنشا نوميناتسيالار پاكەتىن رەپۋبليكانىڭ يۋنەسكو ىستەرى جونىندەگى ۇلتتىق كوميسسياسى دايىنداپ، 2020-جىلى ۇسىنعان.

مينيسترلىكتىڭ حابارلاۋىنشا، بۇل شەشىم يۋنەسكونىڭ قولداۋىمەن ۇلتتىق جانە حالىقارالىق دەڭگەيدە باقشى ونەرىن ساقتاۋ، جاڭعىرتۋ جانە ناسيحاتتاۋ شارالارىن ودان ءارى كۇشەيتۋگە قىزمەت ەتەدى»، - دەپ جازادى «ءو ز ا» اقپاراتتىق اگەنتتىگى.

انكارادا الاش ارىستارىن ەسكە الدى - TRT

قازاقستان تاۋەلسىزدىگىنىڭ 30 جىلدىعىنا وراي انكاراداعى تۇرىك تاريحى مۇراجايى مەن ساياباعىندا «تاۋەلسىزدىك جولىندا الاش قوزعالىسى» اتتى كونفەرەنسيا ءوتتى، دەپ حابارلايدى تۇركيا راديو تەلەۆيزيا پورتالى

«ەتيمەسگۋت مۋنيتسيپاليتەتىنىڭ قولداۋىمەن «كوك تۋ» قازاق مادەنيەت قوعامى ۇيىمداستىرعان عىلىمي كونفەرەنسيا شەيىتتەردى ءبىر مينۋت ۇنسىزدىكپەن ەسكە الۋمەن، ارتىنان ەكى ەلدىڭ مەملەكەتتىك ءانۇراندارىنىڭ ورىندالۋىمەن باستالدى. بەتاشار سوزدەردەن كەيىن عالىمدار الاش قوزعالىسىنىڭ يدەولوگياسىن حرونولوگيالىق جانە تاقىرىپتىق تۇرعىدان تالقىلادى.

كونفەرەنسيادا پروفەسسور گۇلجانات قۇرمانعاليەۆا «الاش يدەيالارى مەن قىزمەتى»، پروفەسسور نەرگيس ءبىراي «قازاق گازەتى (1913-1918) جانە الاش يدەياسى»، ەلدوس توقتارباي «الاش اۆتونومياسى جانە تاراتىلعاننان كەيىنگى قىزمەتى»، پروفەسسور ابدۋاقاپ قارا «الاش جانە مۇستافا شوقاي» اتتى باياندامالارى وقىلدى»، - دەپ جازادى TRT.

تەگەراندا قازاقستان تاۋەلسىزدىگىنىڭ 30 جىلدىعى مەرەكەلەندى - فارس

تەگەراننىڭ «پارسيان ازادي» قوناقۇيىندە قازاقستاننىڭ يرانداعى ەلشىلىگىنىڭ ۇيىمداستىرۋىمەن قازاقستان تاۋەلسىزدىگىنىڭ 30 جىلدىق مەرەيتويىنا ارنالعان سالتاناتتى قابىلداۋ ءوتتى، دەپ حابارلايدى يراننىڭ Parstoday اقپارات اگەنتتىگى.

«اتالعان ءىس-شاراعا يراننىڭ ءبىرقاتار مەملەكەتتىك ورگاندارىنىڭ باسشىلارى، تەگەراندا تىركەلگەن شەتەلدىك ديپلوماتيالىق وكىلدىكتەر مەن حالىقارالىق ۇيىمداردىڭ باسشىلارى، يراندىق كورنەكتى قوعام قايراتكەرلەرى، عىلىمي، شىعارماشىلىق زيالى قاۋىم جانە قازاق دياسپوراسىنىڭ وكىلدەرى - جالپى، 150 دەن اسا ادام قاتىستى.

سالتاناتتى قابىلداۋدا يرانداعى ق ر ەلشىسى ا. ورازباي ءسوز سويلەپ، قازاقستان ءوز تاۋەلسىزدىگىنىڭ 30 جىلى ىشىندە ەكونوميكالىق رەفورمالاردى ءساتتى جۇزەگە اسىردى، ناتيجەسىندە كەڭەستىك ۇلگىدەگى جوسپارلى ەكونوميكا الەمدىك ساۋدا-ەكونوميكالىق جۇيەگە تولىقتاي ينتەگراتسيالانعان ەركىن نارىقتىق ەكونوميكاعا كوشتى دەپ اتاپ ءوتتى.

سونىمەن قاتار، ەلشى تاۋەلسىزدىك جىلدارى قازاقستانعا كەلگەن تىكەلەي شەتەلدىك ينۆەستيتسيا 380 ميلليارد دوللارعا جەتكەنىن، بۇل ورتالىق ازياعا تارتىلعان شەتەلدىك ينۆەستيتسيالاردىڭ جالپى كولەمىنىڭ %75 ىنان استامىن قۇرايتىنىن مالىمدەدى.

ەلشى ا. ورازباي ءسوزىنىڭ جالعاسىندا قازاقستاننىڭ ماڭىزدى جەتىستىكتەرىنىڭ قاتارىندا ۇلتارالىق جانە كونفەسسياارالىق كەلىسىمنىڭ بىرەگەي مودەلى قالىپتاسقانىن، كورشى مەملەكەتتەرمەن، سونىڭ ىشىندە رەسەيمەن جانە قىتايمەن شەكارا تولىقتاي دەليميتاتسيالانعانىن، سونداي-اق كاسپي تەڭىزىنىڭ قۇقىقتىق مارتەبەسى تۋرالى كونۆەنتسياعا قول قويۋ ناتيجەسىندە تەڭىز شەكارالارىنىڭ دەليميتاتسيالانعانىن اتادى.

ا. ورازباي قازاقستان-يران قارىم-قاتىناسىنىڭ دامۋى تۋرالى بولەك ايتا كەلە، قازاقستان تاۋەلسىزدىك العان كۇننەن باستاپ ەكىجاقتى قارىم-قاتىناستار ءارقاشان ەكىجاقتى دەڭگەيدە دە، كوپجاقتى فورماتتا دا ءوزارا قولداۋعا نەگىزدەلگەن ساياسي ديالوگتىڭ جوعارى سەرپىنىمەن سيپاتتالىپ كەلە جاتقانىن اتاپ ءوتتى.

ەكى مەملەكەتتىڭ اراسىنداعى تاۋار اينالىمى 2021-جىلدىڭ 9 ايىندا 2020-جىلدىڭ وسى كەزەڭىمەن سالىستىرعاندا 2,2 ەسەگە وسكەنى اتاپ كورسەتىلدى.

ي ي ر ۇكىمەتىنىڭ اتىنان قابىلداۋ ءراسىمىنىڭ باس قوناعى بولعان ي ي ر اۋىل شارۋاشىلىعى دجيھادى ءمينيسترىنىڭ ورىنباسارى م. عورباني ءسوز الىپ، قازاقستان 30 جىل ىشىندە ساياسي، ەكونوميكالىق، اكىمشىلىك-باسقارۋ، عىلىمي، تەحنولوگيا سالالارىندا ايتۋلى جەتىستىكتەرگە قول جەتكىزگەنىن جوعارى باعالادى.

ءىس-شارا باعدارلاماسىنىڭ ەرەكشە بولىگى رەتىندە تەگەران ونەر ۋنيۆەرسيتەتىنىڭ سكريپكاشىلارى قازاقتىڭ حالىق مۋزىكاسى مەن تانىمال قازاقستاندىق كومپوزيتورلاردىڭ اۋەندەرىن ورىندادى.

سونداي-اق، ءىس-شارا بارىسىندا قوناقتار نازارىنا قازاقستاننىڭ جەتىستىكتەرى، قازاقستان-يران قارىم-قاتىناسىنىڭ دامۋى تۋرالى ارنايى فيلم، فوتوكورمە ۇسىنىلىپ، قازاقتىڭ ۇلتتىق تاعامدارى قويىلعان مەرەكەلىك داستارحان جايىلدى»، - دەپ جازادى Parstoday اقپارات اگەنتتىگى.

اۆتور: باقىتجول كاكەش