USD 429.57 EUR 447.35
RUB 6.94 CNY 63.23
جاڭالىقتار

التايدان اۋعان ەل تاعدىرى ساحنالاندى - فوتو

17 جەلتوقسان 22:44
:ءبولىسۋ
التايدان اۋعان ەل تاعدىرى ساحنالاندى - فوتو

نۇر-سۇلتان. قازاقپارات - ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا تاۋەلسىزدىگىمىزدىڭ 30 جىلدىعىنا ارنالعان، «التايدان اۋعان ەل» قويىلىمىنىڭ پرەمەراسى ءوتىپ جاتىر، دەپ حابارلايدى قازاقپارات ءتىلشىسى.

كورەرمەنگە جول تارتقان تاريحي قويلىم بەلگىلى تۇلعا - حاليفا التاي جانە جازۋشى حاسان ورالتايدىڭ شىعارمالارى نەگىزىندە ساحنالانعان رەجيسسەرى - فارحات مولداعالي.

قيىن- قىستاۋ كەزدەردى باستان كەشە ءجۇرىپ تاعدىردىڭ سان قيلى اۋىرتپالىعىنا مويىماي التايدان انادولىعا دەيىنگى ازاپتى جول، قارالى كوشتە سان-ءتۇرلى تاعدىر كەشىپ، بوزبالا بوپ اتتانىپ، تاۋەلسىزدىك العان تۋعان ەلىنە اقساقال بوپ ورالعان ۇلتىمىزدىڭ ارداقتى ازاماتى حاليفا التاي باس كەيىپكەردىڭ بىرىنە اينالعان بۇل قويىلىم قيامەت قايىم كۇندەردى، زۇلمات جىلداردى وتكەرسە دە، قازاق حالقىنىڭ ادامدىقتان اينىماي، تەكتىلىگىن جوعالپاعانى ءدىنى مەن ءدىلىن، ءداستۇرى مەن سالت ساناسىن بەرىك ۇستانعانىن ءسوز ەتەدى.


1950-1960 -جىلدارى تۇركيانىڭ باس مينيسترلىك قىزمەتىن اتقارعان، بەلگىلى مەملەكەت قايراتكەرى ادنان مەندەرەستىڭ قازاق حالقىنا جاساعان جاقسىلىعى مەن انادولى جەرىنىڭ الەمدەگى بارلىق تۇرىكتەردىڭ پاناسى بولعانى دا قويىلىمدا كورىنىس تاپقان. قويلىم جاس ۇرپاق وكىلدەرىن وتانشىلدىققا تاربيەلەۋدە، پاتريوتتىق رۋحتا باۋلۋدا جانە تۋعان جەردىڭ قادىرىن تەرەڭ تۇسىنۋگە ۇندەۋدە تاكلاماكان شولىندە، گيمالاي تاۋىندا ارپالىسپەن وتكەن ءومىر وتكەلدەرىندە ۇلتتىق بولمىسىنان اجىراماعان اتا-بابامىزدىڭ قاندى تاريحىن كوركەمدىك شىندىق ارقىلى جەتكىزە بىلگەن.

«قازاق تاريحىنداعى «ازالى كوش»، «قارالى كوش»، «سوڭعى كوش» سىندى ۇعىمدارعا اينالىپ، قالاممەن ەمەس، قانمەن جازىلعان بابالار كەشكەن زۇلمات كۇندەر پەسا بولىپ، ارنايى ساحناعا لايىقتالىپ جازىلماعاندىقتان، قانشا ۋاقىت بويى تولعاتىپ، تەاتر تىلىمەن سويلەيتىن كۇنىن كۇتىپ جاتقانىن جانىمىز سەزەدى. «التايدان اۋعان ەل» اتتى سپەكتاكلدى دۇنيەگە اكەلۋ بارىسىندا ءبىز سول تىلسىم كۇشتى، بابالار رۋحىن سەزىندىك. قويىلىمعا «جانر» قويۋعا دا قينالدىق. «كەيىپكەرلەر» دەپ جازۋعا دا جۇرەكسىندىك. قويىلىمداعى ءبىر كوشتە بىرنەشە كوشتىڭ ءىزى بار، ءبىر كەيىپكەردە بىرنەشە ادامنىڭ تاعدىرى بار.. . ال ءبىزدىڭ باستى مىندەت - سول تاريحتى، سول شىندىقتى كوركەم ونەردىڭ تىلىمەن كورەرمەن جانىنا جەتكىزۋ. وسى قويىلىم - «ەلىم» دەپ ەڭىرەپ، ەركىندىك ءۇشىن قۇربان بولعان جان يەلەرىنىڭ باسىنا قويعان كوك شۇبار تاس، ماڭگىلىك ەسكەرتكىش بولسىن!»،-دەيدى قويلىمنىڭ ساحنالىق نۇسقاسىنىڭ اۆتورى ميراس ءابىل.


اۆتور: ريزابەك نۇسىپبەك ۇلى



:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات