تاسقىن سۋ ورتاسىنان مەملەكەتتىك تۋدى الىپ شىققان پوليتسەي - ۆيدەو
ءتارتىپ ساقشىسىنىڭ تاسقىن سۋ ورتاسىندا قالعان مەملەكەتتىك تۋدى اسا ۇقىپتىلىقپەن الىپ شىققان ءساتى الەۋمەتتىك جەلىدە تاراپ كەتكەن بولاتىن. ءبىر عانا ءىس ارەكەتىمەن زامانداستارىنا ۇلگى بولعان پوليتسيا قىزمەتكەرى «رامىزدەرگە دەگەن قۇرمەت، بۇل ەلىمىزگە دەگەن قۇرمەت - دەپ بىلەمىن»، دەيدى.
وتكەن جىلى وزبەكستانداعى ساردوبا سۋ قويماسىندا بولعان اپاتتان تۇركىستان وبلىسىنىڭ ماقتارال اۋدانىن دا سۋ باستى. توتەنشە جاعداي كەزىندە ءتارتىپ ساقشىلارى قىلمىستىڭ الدىن الۋعا اتسالىسىپ قانا قويماي، وزگەلەرگە وتانسۇيگىشتىك ارەكەتتەرىمەن ۇلگى بولدى.
اتاپ ايتار بولساق، پوليتسيا مايورى ەسىمجان ناديروۆ سۋىق سۋدى بەلۋاردان كەشىپ، تاسقىن ورتاسىنان قالعان مەملەكەتتىك تۋدى الىپ شىقتى. بۇل جاعداي الەۋمەتتىك جەلىدە كەڭىنەن تارالىپ، كوپشىلىكتى ءتانتى ەتتى. جەلى قولدانۋشىلارى تاراپىنان «پوليتسيادا پاتريوتتار عانا قىزمەت اتقارادى»، «ازاماتتىق»، «تۋعا دەگەن قۇرمەت» دەگەن پىكىرلەر ءبىلدىرىلىپ، جەدەل ارەكەت ەتكەن پوليتسيا مايورىنا العىس ايتۋشىلار كوپ بولدى.
بۇگىندە ەسىمجان ناديروۆ جەتىساي ا پ ب باسشىسىنىڭ ءبىرىنشى ورىنباسارى. جاس بولسا دا، باس بولا بىلگەن ول 2011 -جىلى الماتى اكادەمياسىن بىتىرگەن. ەڭبەك جولىن شىمكەنت قالاسىنداعى ءال-فارابي اۋداندىق ىشكى ىستەر باسقارماسىندا تەرگەۋشى بولىپ باستاعان. كەيىننەن ماقتاارال اۋدانىندا تەرگەۋشى، انىقتاۋشى، كوشى- قون ءبولىمىنىڭ باسشىسى قىزمەتتەرىن ابىرويمەن اتقاردى. تاجىريبەلى ماماندارمەن قىزمەتتەس بولا ءجۇرىپ، بىلىكتىگىلىن ارتتىرىپ، ءبىلىمىن شىڭدادى.
«جالپى سول جىلى توتەنشە جاعداي سالدارىنان زارداپ شەككەن ماقتاارال اۋدانىندا پوليتسيا قىزمەتكەرلەرى كۇشەيتىلگەن تارتىپپەن قىزمەت اتقاردى. سۋ باسقان ايماقتان ادامدار مەن ءتورت تۇلىكتى قۇتقارۋ قىزمەتىن بەلسەندىلىكپەن اتقارىپ، كۇنى- ءتۇنى قىزمەت ەتتى. ودان بولەك، تۇرعىنداردى قاۋىپسىز جەرگە كوشىرۋ، قاۋىپسىزدىكتى قامتاماسىز ەتۋ، كومەك بەرۋ جۇمىستارىن جۇرگىزدىك. كوشەلەردى ارالاپ جۇرگەن ساتىمىزدە مەكتەپ اۋلاسىنداعى تۋدىڭ تومەن ءتۇسىپ تۇرعانىن كوردىم. استىن تۇگەل سۋ باسقان. سودان بىردەن تۋدى قاۋىپسىز جەرگە الىپ شىقتىم. بۇل ساتتە مەندە ەرەكشە تىرلىك ىستەپ ماقتانايىن دەگەن وي بولعان جوق. بالا كەزىمنەن «تۋى بيىك ەلدىڭ - تۇعىرى بيىك» دەگەن ءسوزدى ەستىپ وستىك. رامىزدەرگە دەگەن قۇرمەت، سۇيىسپەنشىلىك بۇل ەلىمىزگە دەگەن قۇرمەت دەپ بىلەمىن»، - دەيدى ول. ەسىمجان ناديروۆ بوس ۋاقىتىن سپورتقا ارنايدى.
بالا كەزىندە دە بوكس مەكتەبىندە وقىعان. ناقتىراق ايتساق، شىمكەنت قالاسىنداعى ب. ساتتارحانوۆ اتىنداعى سپورت- مەكتەپ ينتەرناتىنىڭ تۇلەگى. س. قوناقبايەۆ جانە ب. ساتتارحانوۆ اتىنداعى تۋرنيرلەرگە، وزبەكستان، قىرعىزستان جەرىندە وتكەن بايراقتى باسەكەلەردە مەملەكەتتىك تۋدى جەلبىرەتىپ، جەڭىس تۇعىرىنان كورىنگەن. قازىردە قۇرداستارىمەن بىرىگىپ، اۋىلدان سپورت زال اشقان. وندا جاستار سپورتپەن شۇعىلدانۋدا. ەسىمجان ۇسەنبەك ۇلى جۇبايى نۇرگۇلمەن ەكى ۇلى، ءبىر قىزدى ءوسىرىپ، مەرەيلى وتباسى اتانىپ وتىر.
«ءاربىر ازامات كوك بايراعىمىزدىڭ بۇلىنبەۋىن، بيىكتە اسقاقتاپ جەلبىرەپ تۇرۋىن باستى نازاردا ۇستاۋعا مىندەتتى. بويىمىزدان ۇلتتىق نامىس پەن قايسارلىقتى، ۇلتتىق رۋحتى جوعالتپاۋىمىز كەرەك. رامىزدەرگە دەگەن قۇرمەتىمىز ارتا بەرسىن» - دەيدى ەسىمجان ناديروۆ.
اۆتور: قايرات زاينيشەۆ