ەكىباستۇزدا رەسپۋبليكالىق اقىندار ايتىسى ءوتتى

ەكىباستۇز. قازاقپارات - ەكىباستۇزداعى «ونەر» قالالىق مادەنيەت سارايىنىڭ كىشى زالىندا «تۇعىرى بيىك تاۋەلسىزدىك» اتتى رەسپۋبليكالىق اقىندار ايتىسى ءوتتى، دەپ حابارلايدى قازاقپارات Pavlodarnews.kz سايتىنا سىلتەمە جاساپ.

جىر دوداسىن ق ر تاۋەلسىزدىگىنىڭ 30 جىلدىعىنا وراي «اتامۇرا» مادەنيەت ورتالىعى ەكىباستۇز قالاسى اكىمدىگىنىڭ قولداۋىمەن ۇيىمداستىردى.

ايتىستا پاۆلودار، قاراعاندى، شىمكەنت، وسكەمەن، ەكىباستۇز قالالارىنىڭ جانە باياناۋىل اۋدانىنىڭ اقىندارى باق سىنادى.

ايتىس قورىتىندىسى بويىنشا باس جۇلدەنى قۋانىش شارمانوۆ جەڭىپ الىپ، 700 مىڭ تەڭگەنى قانجىعاسىنا بايلادى.

1-ورىندى اسپانبەك شۇعاتايەۆ، 2-ورىندى نۇرعانات قايرات، 3-ورىندى نۇرسۇلتان رىمباي يەلەندى.

سونداي-اق تىلەك سەيىتوۆ - ءجۇرسىن باتەن ۇلى اتىنداعى ارنايى جۇلدەنى، ابزال قابدراش - ءتۇسىپحان قاسىمجان ۇلى اتىنداعى ارنايى جۇلدەنى، راۋان قايداروۆ - الماگۇل جۇگىنىسوۆا اتىنداعى ارنايى جۇلدەنى ەنشىلەدى.

قالعان قاتىسۋشىلار ءتۇرلى نوميناتسيالارمەن ماراپاتتالدى.