قاسىم-جومارت توقايەۆ تاۋەلسىزدىگىمىزدى نىعايتۋعا قوسقان ۇلەسى ءۇشىن ءدۇيىم جۇرتقا العىس ايتتى

نۇر-سۇلتان. قازاقپارات - جاڭا قازاقستاننىڭ نەگىزىن قالاپ، ىرگەسىن كەڭەيتۋگە بۇكىل حالىق جۇمىلدى.

بۇل تۋرالى تاۋەلسىزدىكتىڭ 30 جىلدىعىنا ارنالعان سالتاناتتى ءىس-شارادا ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.

«ءبىز جاڭا قازاقستاننىڭ نەگىزىن قالاپ، ىرگەسىن كەڭەيتۋگە بۇكىل حالىق بولىپ جۇمىلدىق. ەلىمىزدىڭ ءوسىپ-وركەندەۋىنە ءاربىر وتانداسىمىز ءوز ۇلەسىن قوستى. بارلىق جەتىستىگىمىز - ءتۇرلى كاسىپ يەلەرىنىڭ ەرەن ەڭبەگىنىڭ جەمىسى. ۇستازدارىمىز ۇرپاققا ساپالى ءبىلىم، سانالى تاربيە بەرىپ، جاڭا بەلەسكە جول اشتى. دارىگەرلەرىمىز ۇلت ساۋلىعى ءۇشىن بارلىق كۇش-جىگەرىن سالىپ ەڭبەك ەتتى. اسىرەسە پاندەميا كەزىندە ادام ومىرىنە اراشا ءتۇسىپ، ىندەتپەن ايانباي كۇرەستى»، - دەپ اتاپ ءوتتى ق ر پرەزيدەنتى.

مەملەكەت باسشىسى اسكەري قىزمەتشىلەر ەل شەبىن قاس قاقپاي كۇزەتسە، ءتارتىپ ساقشىلارى تىنىشتىعىمىزدى، قاۋىپسىزدىگىمىزدى قورعاعانىن ايتتى.

«توتەنشە جاعداي قىزمەتكەرلەرى قاتەردەن قايمىقپاي، تالاي جاندى امان ساقتاپ قالدى. زيالى قاۋىم مادەنيەتىمىزدى بايىتىپ، عىلىمي الەۋەتىمىزدى ارتتىردى. مەملەكەتتىك قىزمەتشىلەر حالىققا قىزمەت ەتىپ، ەلدىگىمىزدىڭ تۇعىرىن بەكىتە ءتۇستى. قۇرىلىسشىلار ميلليونداعان شارشى مەتر ءۇي، مىڭداعان شاقىرىم جول سالىپ، ءورىسىمىزدى كەڭەيتتى. ديقاندار ءدان ەگىپ، شوپاندار ءتورت تۇلىگىن ورگىزىپ، ىرىسىمىزدى كوبەيتتى. مۇنايشىلار قارا التىن ءوندىرىپ، قازىنامىزدى بايىتتى. كەنشىلەر جەر قويناۋىن يگەرىپ، يگىلىگىمىزدى ەسەلەدى. ونەرپازدار الەمدى مويىنداتىپ، تاۋەلسىز قازاقستاندى جەر جۇزىنە تانىتتى. سپورتشىلار ءدۇبىرلى دودالاردا تۋىمىزدى جەلبىرەتىپ، ءانۇرانىمىزدى اۋەلەتتى. كاسىپكەرلەر ءوندىرىس ورىندارىن اشىپ، جۇرتتى جۇمىسقا تارتتى»، - دەدى قاسىم-جومارت توقايەۆ.

ق ر پرەزيدەنتى ەڭسەلى ەل بولۋىمىزعا بارلىق سالانىڭ ءتۇرلى ماماندىق وكىلدەرى جانە بارشا ازاماتتارىمىز ءبىر كىسىدەي اتسالىسقانىن باسا ايتتى.

«تۇپتەپ كەلگەندە تاۋەلسىزدىكتى نىعايتۋ دەگەنىمىز - ەلگە پايداسى تيەتىن ناقتى جۇمىستاردى جۇزەگە اسىرۋ. قازاقستان سىزدەردىڭ جاسامپاز ەڭبەكتەرىڭىزدىڭ ارقاسىندا زور جەتىستىككە جەتتى. مەن وسى مەرەيلى ساتتە تاۋەلسىزدىگىمىزدى نىعايتۋعا قوسقان ۇلەسى ءۇشىن ءدۇيىم جۇرتقا العىس ايتامىن!»، - دەدى مەملەكەت باسشىسى.