ماريا اۋەزوۆانىڭ ەلباسى الىپ بەرگەن پروتەزبەن جۇرگەن ءساتىنىڭ ۆيدەوسى جاريالاندى
بۇل تۋرالى ەلباسىنىڭ باسپا ءسوز حاتشىسى ايدوس ۇكىباي Twitter- دە جازدى.
«نۇرسۇلتان نازاربايەۆ: جارايسىڭ، ماريا! سەن جاستارعا ۇلگىسىڭ!» دەپ باستالاتىن ۆيدەودا ەلباسىنىڭ جىگەرلى قىزعا دەگەن ءىلتيپاتى بەرىلگەن.
«ماريا ەكى اياعى دا تىزەدەن جوعارى كەسىلگەنىنە قاراماستان، ەۆەرەست شىڭىنا ورمەلەگەن. ەلەستەتىپ كورىڭىزشى! جاپ-جاس قىزدىڭ رۋحى قانداي بيىك، ەرىك-جىگەرى قانداي؟! مەن وعان قولداۋ ءبىلدىرجىم. جارايسىڭ، ماريا! سەن جاستارعا ۇلگىسىڭ»، - دەيدى تۇڭعىش پرەزيدەنت. بۇعان دەيىن ەلباسىنىڭ پاۋەرليفتينگتەن سپورت شەبەرى، الپينيست ماريا اۋەزوۆامەن كەزدەسكەنىن جازعان بولاتىنبىز.
ءساۋىر ايىندا ماريا اۋەزوۆا الپينيستەر توبىمەن بىرگە ەۆەرەستەگ بازالىق لاگەرگە (5364 مەتر) جانە كالا-پاتحار تاۋىنا (5640 مەتر) ورمەلەپ شىققان. ەلباسى الپينيستىڭ ەرلىگىنە ءتانتى بولىپ، قازاقستان حالقى اسسامبلەياسىنىڭ 29-سەسسياسىندا وعان پروتەز الۋعا كومەكتەسۋگە ۋادە بەرگەن بولاتىن. نۇرسۇلتان نازاربايەۆ قورىنىڭ قولداۋىمەن م. اۋەزوۆاعا بيونيكالىق پروتەز الىندى جانە ول مامانداردىڭ باقىلاۋىمەن بەيىمدەلۋ كۋرسىنان ءوتتى.
ايتا كەتەيىك، اۋەزوۆا ماريا الەكساندروۆنا - الپينيست، حالىقارالىق دارەجەدەگى سپورت شەبەرى(ۇلتى - ارميان، 32 جاستا).
1989 -جىلى 2-قازاندا نۇر-سۇلتان قالاسىندا دۇنيەگە كەلگەن. 2009 -جىلى مەنەدجمەنت ينستيتۋتىنىڭ كوللەدجىن ەسەپ جانە ەكونوميست ماماندىعى بويىنشا ءبىتىردى.
2013 -جىلى ول قاتتى اۋىرىپ قالدى. 2015 -جىلدىڭ ماۋسىم ايىندا تىزەدەن جوعارى ەكى اياعىن كەسىپ الىپ، ءبىرىنشى توپتاعى مۇگەدەك اتاندى.
2016 -جىلى ول مۇمكىندىگى شەكتەۋلى جاندارعا ارنالعان ەرىكتى قوعام اشتى. سونىمەن بىرگە ول سپورتپەن - پاۋەرليفتينگپەن اينالىسا باستادى. حالىقارالىق دارەجەدەگى سپورت شەبەرى اتاعى بار.
ول الپينيزمگە 2019 -جىلى قىزىعۋشىلىق تانىتتى. جاتتىقتىرۋشى ۆاديم سحەنىڭ جەتەكشىلىگىمەن ول قازاقستاندا 3 رەت كوتەرىلدى (ۇيقىداعى رىتسار، لىسايا گورا، سينيۋحا شىڭدارى)، 2021 -جىلدىڭ ساۋىرىندە بيىكتىگى 5364 م ەۆەرەست بازالىق لاگەرىنە جانە كالا-پاتار تاۋىنا كوتەرىلدى. بيىكتىگى 5640 م.