ەلوردا تاريحى: ەلباسى قۇرىلىس الاڭدارىنا ءجيى كەلىپ تۇراتىن - ساۋلەتشى
ايتۋلى داتا اياسىندا بۇگىن نۇر-سۇلتان قالاسىندا ەلوردانىڭ نەگىزىن قالاۋشىلار باس قوستى.
قازاقپارات ءتىلشىسى جيىن قوناقتارىنىڭ ءبىرى، ەلوردانىڭ ءبىرىنشى باس جوسپارىنىڭ اۆتورى، ق ر ساۋلەتشىلەر وداعىنىڭ ءتوراعاسى، ەلىمىزگە ەڭبەگى سىڭگەن ساۋلەتشى سەرىك رۋستامبەكوۆتى اڭگىمەگە تارتقا ەدى.
«مەن 1996-1998-جىلدارى قالانىڭ باس جوباسىمەن اينالىستىم. بۇرىنعى اقمولا قازىرگى نۇر-سۇلتان قالاسىندا مەنىڭ باسشىلىق ەتۋىممەن ءبىراز جوبالار ىسكە اسىرىلدى. سونىڭ ءبىرى ەسىل وزەنى جاعالاۋىنداعى قۇرىلىستار. وزەن قالانى كەسىپ وتەدى جانە ونىڭ ۇزىندىعى 37 شاقرىمدى قۇرايدى. وسى 37 شاقىرىم الىپ وزەن بويىندا قاي جەردە، قانداي عيمارات تۇرعىزىلۋى ءتيىس، قاي جەردە كوپىر سالىنۋى ءتيىس - سونىڭ ءبارىن ءبىز جوبالادىق. ارينە، قالانى جوبالاۋ، سالۋ وڭايعا سوققان جوق. سەبەبى مەملەكەت ەندى اياعىنان تۇرىپ جاتىر، قاراجات جەتىسپەيدى. جاڭا قالا سالۋ تۇگىلى، حالىقتىڭ كۇن كورۋىنىڭ ءوزى قيىنعا سوقتى. سونداي قيىندىقتارعا قاراماستان، جاڭا قالانىڭ نەگىزى قالاندى. ەلباسى نۇرسۇلتان نازاربايەۆ سول جىلدارى ەلوردادا جاڭادان سالىنعان ءار عيماراتتىڭ اشىلۋىنا ءوزى قاتىساتىن. ءار عيماراتتىڭ اشىلۋى ۇلكەن قۋانىش بولاتىن. ءالى ەسىمدە قازىرگى ورتالىق ساياباقتا بالالارعا ارنالعان اكۆوپارك اشىلدى، سوعان دەيىن پرەزيدەنتتىڭ ءوزى قاتىسى»، - دەدى.
سونداي-اق ساۋلەتشى ەلورداداعى «سامال» شاعىن اۋدانى جوباسىنىڭ اۆتورى ەكەن.
«اۋدانداعى ءاربىر قۇرىلىستىڭ سالىنۋ بارىسىن ەلباسى ءوزى ءجىتى قاداعالاپ، قۇرىلىس الاڭىنا ءجيى كەلىپ تۇراتىن. بۇگىندە ەلوردامىز باسقاشا، استانامىز تۋرالى الەم بىلەدى. وسى جىلدار ارالىعىندا قالا بارلىق جاعىنان ايتارلىقتاي دامىدى. بۇگىندە نۇر-سۇلتان قالاسىنا قاراپ، باسقا قالالار دا بوي تۇزەيدى. جاڭا استانانى سالۋ باستالعاندا پرەزيدەنت سول كەزدەگى ءسات ءۇشىن ەرەكشە شەشىم قابىلدادى. ەلوردانى سالۋشى قۇرىلىس كومپانيالارىن 5 جىلعا دەيىن سالىقتان بوساتۋ تۋرالى شەشىم قابىلداپ، ۇكىم شىعاردى. سونىڭ نەگىزىندە ەلوردادا رەسمي تىركەلگەن قۇرىلىس كومپانيالارى 5 -جىل بويى سالىقتان بوساتىلدى. وسىنداعى بار كومپانيالاردان بولەك، وڭىرلەردەن قۇرىلىس كومپانيالارى استاناعا كەلىپ، تىركەلىپ، ەلوردانىڭ سالىنۋىنا ءوز ۇلەستەرىن قوستى. سول كەز ءۇشىن 5 جىل بويى سالىق تولەمەۋ، كومپانيالار ءۇشىن ۇلكەن جەڭىلدىك بولدى. ناتيجەسىندە ءبىر جاعىنان ەلوردامىز سالىندى، ەكىنشى جاعىنان وتاندىق قۇرىلىس كومپانيالارى سانى كوبەيىپ، دامىدى»، - دەپ ەسكە الدى ساۋلەتشى.