شەنەۋنىكتەردى قاماۋ جەمقورلىقتى جۇيەلى تۇردە شەشپەيدى - مارات احمەتجانوۆ
«بۇگىنگە دەيىن اگەنتتىك قىلمىستىق قۋدالاۋ ورگانى رەتىندە جۇمىس ىستەپ كەلدى. بۇل تاسىلمەن ۇزاق جۇمىس ىستەدىك. وسىعان دەيىن اگەنتتىك جۇمىستىڭ تيىمدىلىگى قىلمىستىڭ سانى مەن شۋلى قاماۋلارمەن باعالانىپ كەلدى. بۇل جۇمىس ءادىسى سول زاماننىڭ جەمقورلىق سيپاتىنا سايكەس بولدى. جۇمىس تاسىلدەرى وتە قاراپايىم ەدى. ياعني، كۇدىكتىنى پارا الۋ ۇستىندە ۇستايسىڭ، قامايسىڭ، سوسىن تەرگەۋدى تەزىرەك اياقتاپ، ءىس سوتقا جىبەرىلەدى. جىل سايىن مىڭداعان جەمقورلاردىڭ ۇستالعانى تۋرالى بايانداۋ ءۇشىن وسى ءتاسىل جەتكىلىكتى ەدى. قوعام انتيكوردىڭ جۇمىسىن وسىنداي كورسەتكىشتەرمەن باعالاۋعا ۇيرەنىپ قالعان سياقتى»، - دەدى مارات احمەتجانوۆ ءوز بايانداماسىندا.
سونداي- اق، اگەنتتىك باسشىسىنىڭ ايتۋىنشا، پاراقورلاردى قاماۋمەن ءىس بىتپەيدى.
«ءبىراق لاۋازىمدى تۇلعالاردى ۇستاۋ، سىبايلاس جەمقورلىق پروبلەماسىنا نۇكتە قويمايتىنىن ءتۇسىنۋىمىز كەرەك. ياعني، شەنەۋنىكتەردى ۇستاپ، قاماۋ، جەمقورلىقتى جۇيەلى تۇردە شەشپەيدى. ۇستالعان پاراقوردىڭ ورنىنا باسقاسى كەلەدى دە، ەسكى ادىسكە سالىپ جۇمىستى جالعاستىرا بەرەدى. بۇل ماسەلەگە مەملەكەت باسشىسى دا ەرەكشە نازار اۋداردى. پرەزيدەنت «جەمقورلىقتىڭ نەگىزگى شارتتارىن جويماي، ونىمەن كۇرەسۋ جەل ديىرمەنىمەن الىسۋمەن بىردەي» دەپ باعاسىن بەردى. وسى ورايدا ءبىزدىڭ اگەنتتىك جۇمىس ءتاسىلىن وزگەرتىپ، جاڭاشىلدىققا قادام باستى. بۇل باعىتتا سيفرلاندىرۋ دا ءوز ۇلەسىن قوسىپ جاتىر»، - دەيدى ۆەدومستۆو باسشىسى.
اۆتور: ءالي يبرايەۆ