قازاقستاننان قۋىلعان تاجىكستان ازاماتى اتىن وزگەرتىپ، قايتىپ كەلگەن
اتىراۋ وبلىسى پوليتسيا دەپارتامەنتى 6-12-جەلتوقسان ارالىعىندا «ميگرانت» جەدەل- پروفيلاكتيكالىق ءىس-شاراسىن وتكىزۋ كەزىندە قازاقستان رەسپۋبليكاسى اۋماعىنان قوعامدىق ورىندا ماس بولىپ جۇرگەنى ءۇشىن 5 جىلعا شەتتەتىلگەن شەتەلدىكتى انىقتادى.
تاجىكستان رەسپۋبليكاسىنىڭ 35 جاستاعى ازاماتى ءوز ەلىنە بارىپ، جەكە باسىن راستايتىن قۇجاتتارىنداعى اقپاراتتى وزگەرتىپ، قازاقستانعا قايتىپ كەلگەندىگى بەلگىلى بولدى.
- اتالعان فاكتى جەدەل-پروفيلاكتيكالىق ءىس-شارا وتكىزۋ كەزىندە تاكسي جۇرگىزۋشى بولىپ جۇمىس ىستەپ جۇرگەن تاجىكستان ازاماتىنىڭ قۇجاتتارىن تەكسەرۋ بارىسىندا انىقتالدى. ۇستالعان شەتەلدىك ءوز كىناسىن تولىقتاي مويىندادى. قازىرگى تاڭدا ەل شەكاراسىنا زاڭسىز كىرگەن ەر ادام 30 تاۋلىككە اكىمشىلىك قاماۋعا الىندى. ءىس-قۇجاتتار جيناقتالىپ، زاڭدى شەشىمىن شىعارۋ ءۇشىن سوتقا جولدانادى، - دەدى اتىراۋ قالالىق پوليتسيا باسقارماسى كوشى-قون قىزمەتى ءبولىمىنىڭ باستىعى قادىربەك ءابىشوۆ.