قازاقستاندا قايتا ۆاكسينالاۋ ءادىسى وزگەردى

نۇر-سۇلتان. قازاقپارات - دەنساۋلىق ساقتاۋ ءمينيسترى الەكسەي سوي قازاقستاندا رەۆاكسينالاۋ ءادىسى وزگەرەتىنىن ايتتى.

دەنساۋلىق ساقتاۋ مينيسترلىگىنىڭ باسشىسى الەمدەگى ەپيدەميولوگيالىق جاعدايدى ەسكەرە وتىرىپ، يممۋنداۋ جونىندەگى ۇلتتىق كونسۋلتاتيۆتىك كوميسسيا حالىقتى رەۆاكسينالاۋ ءادىسىن قايتا قاراعانىن ايتتى.

«8-جەلتوقساننان باستاپ ۆاكسينانىڭ ەكى دوزاسىن العاندار، سونداي-اق، كوروناۆيرۋس ينفەكسياسىن جۇقتىرعاندار 6 ايدان كەيىن رەۆاكسينالاۋدان وتەدى»، - دەدى سوي ۇكىمەت وتىرىسىندا.

مينيستر بۇگىندە رەۆاكسينالاۋدان وتكەن ادام سانى 44702 بولعانىن اتاپ ءوتتى.

سوي قازاقستاندا رەۆاكسينالاۋ ءادىسى نەگە وزگەرگەنىن ءتۇسىندىردى.

دەنساۋلىق ساقتاۋ ءمينيسترى الەكسەي سوي قازاقستاندا رەۆاكسيناتسيا ءادىسى نەگە قايتا قارالعانىن ءتۇسىندىردى.

«عالىمدارىمىز حالىقارالىق تاجىريبەنى زەرتتەدى، جالپى الەمدە 6 ايدان كەيىن قايتا ۆاكسينالاۋدى ۇسىنىپ جاتقانىن كورىپ وتىرمىز. سوندىقتان ءبىز 9 ايدان 6 ايعا كوشتىك، ياعني قىسقارتتىق، ويتكەنى اعزانى كوروناۆيرۋستىڭ جاڭا شتامدارىنان قورعاۋ ءۇشىن يممۋنيتەتتى ىنتالاندىرۋ قاجەت»، - دەدى سوي ۇكىمەت وتىرىسىندا.

ول 8-جەلتوقساننان باستاپ كەز كەلگەن ادام ەمحاناعا بارىپ، قايتا ەكپە الۋىنا بولاتىنىن ايتتى.

«ەكپە العاندار، ەكىنشى دوزانى العان سوڭ 6 ايدان كەيىن كەلىپ، ۆاكسينانى الا الادى»، - دەپ تۇيىندەدى سوي.