USD 434.48 EUR 492.61
RUB 5.68 CNY 68.44
جاڭالىقتار

ينتەرنەت كينو نارىعىندا ادىلدىك ورناتا باستادى

9 جەلتوقسان 12:08
:ءبولىسۋ
ينتەرنەت كينو نارىعىندا ادىلدىك ورناتا باستادى

نۇر-سۇلتان. قازاقپارات - بىلتىر اۋسترالياداعى قىسقامەتراجدى فيلمدەر بايقاۋىندا تۋىندىسى ءۇشىنشى ورىن العان قازاقستاندىق ستۋدەنت ا ق ش-تاعى وقۋىنا جەتە الماي ءجۇر.

جاس رەجيسسەر كوروناۆيرۋس پاندەمياسى جوسپارىن تۇبەگەيلى وزگەرتكەنىن ايتادى، دەپ حابارلايدى قازاقپارات ءتىلشىسى.

«مەن قازىر ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ءۇشىنشى كۋرس ستۋدەنتىمىن. NYFA (New York Film Academy - رەد. ) گرانتىن 2019 -جىلدىڭ تامىز ايىندا جەڭىپ العانمىن. 2020 -جىلدىڭ مامىر ايىندا امەريكاعا وقۋعا بارۋىم كەرەك ەدى. بۇكىل الەمدە كوروناۆيرۋس ىندەتى ءورشىپ، شەكتەۋلەرگە بايلانىستى جەتە الماي ءجۇرمىن. NYFA دا قايتا- قايتا شاقىرۋ جىبەرىپ جاتىر. 2022 -جىلدىڭ ماۋسىم ايىندا بارامىن دەپ جوسپارلاپ وتىرمىن»، - دەپ باستادى ول اڭگىمەسىن.

ماڭعىستاۋ ءوڭىرىنىڭ تۋماسى بارلىق مۇڭعالباي ۇلى ءوز ورتاسىنىڭ نازارىن اۋستراليادا العان جۇلدەسىمەن اۋدارعان بولاتىن.

«MyRoodReel» دەپ اتالاتىن حالىقارالىق قىسقامەتراجدى فيلمدەر بايقاۋىندا ونىڭ اعاش شەبەرى تۋرالى تۋىندىسى ءۇشىنشى ورىنعا يە بولعان ەدى. اقتاۋ قالاسىنداعى «دارىن» مەكتەبىنىڭ تۇلەگى جاستايىنان كينو سالاسىنا اۋەس بولىپ وسكەنىن ايتادى.

2019 -جىلى New York Film Academy ۇيىمداستىرعان بايقاۋعا قاتىسىپ، گرانتتى سول كەزدە ۇتىپ العان ەكەن. اتا-اناسىنىڭ قولداۋىنىڭ ارقاسىندا عانا وسىنداي جەتىستىككە قول جەتكىزدىم دەپ ەسەپتەيدى.

«وتباسىمىزدا بەس ادامبىز. اكەم، انام، اعام، مەن جانە قارىنداسىم بار. اكەم دە، انام دا - مەملەكەتتىك قىزمەتشىلەر. ءوزىمنىڭ سۇيىكتى ءىسىم - وسى فيلم ءتۇسىرۋ. اكە-شەشەم ۇنەمى قولداپ، فيلم تۇسىرۋگە مۇمكىندىگىنشە قۇرال- جابدىقتارىمدى الىپ بەرىپ وتىردى. سونىڭ ارقاسىندا ارمانىما سەنىمدى قادام باسىپ كەلەمىن»، - دەيدى جاس رەجيسسەر.

بارلىق كەيىنگى جىلدارى قىسقامەتراجدى فيلمدەر نارىعى You Tube الاڭىندا جاقسى دامىپ كەلە جاتقانىن ايتادى.

«كوبىنە وڭ تەندەنسيالاردى بايقايمىن. قازىر AiTube ارقىلى قازاقشا پلاتفورما جاقسى دامىپ جاتىر. بۇرىن كينو سالاسىندا جەتىستىككە جەتۋ ءۇشىن ءتۇرلى باسپالداقتاردان ءوتۋ كەرەك بولاتىن. ءقازىر جۇرەگىندە وتى بار كەز كەلگەن اۋەسقوي كاسىپقويلارمەن باسەكەگە تۇسە الادى. ينتەرنەت بۇل تۇرعىدان كينو نارىعىنا ادىلدىك ورناتىپ جاتىر دەۋگە بولادى. ەلىمىزدە وتە ادەمى جەرلەر كوپ. مەن وسى مۇمكىندىكتى پايدالانىپ، ولكەمىزدىڭ تابيعاتىن ناسيحاتتاپ، ءتۋريزمدى دامىتۋعا باعىتتالعان فيلمدەر تۇسىرمەكشىمىن. جالپى بولاشاقتا فيلم تۇسىرۋدەن كاسىپقوي مامان بولۋدى ارماندايمىن» ، - دەدى ماڭعىستاۋلىق جىگىت.

اۆتور: ەسىمجان ناقتىباي


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات