قازاقستاندا سيفرلىق تەڭگە پيلوتتىق جوباسى ىسكە اسىرىلىپ جاتىر
بۇل تۋرالى بۇگىن ۇكىمەت وتىرىسىندا ق ر ۇلتتىق بانكى ءتوراعاسى ەربولات دوسايەۆ ايتتى، دەپ حابارلايدى قازاقپارات ءتىلشىسى.
«ۇلتتىق بانك قارجى سەكتورىنىڭ سيفرلىق ينفراقۇرىلىمىن دامىتۋ جانە قارجىلىق يننوۆاتسيالاردى ەنگىزۋ باعدارلاماسىن بەلسەندى تۇردە ىسكە اسىرىپ جاتىر. ۇلتتىق سيفرلىق ۆاليۋتا - سيفرلىق تەڭگەنى ەنگىزۋدى كوزدەيتىن پيلوتتىق - جوبا بيىلعى جىلدىڭ نەگىزگى باستامالارىنىڭ ءبىرى. جوبا قارجى نارىعىنىڭ قاتىسۋشىلارىمەن جانە حالىقارالىق ارىپتەستەرمەن بىرلەسىپ ىسكە اسىرىلۋدا. بۇگىندە الەمدە 63 ورتالىق بانك ۇلتتىق تسيفرلىق ۆاليۋتالاردى شىعارۋ جانە ولاردىڭ اينالىمى ماسەلەسىن زەرتتەۋمەن بەلسەندى تۇردە اينالىسۋدا. ورتالىق بانكتىڭ بولشەك سيفرلىق ۆاليۋتاسىنىڭ اسپەكتىلەرى ۇلتتىق بانكتىڭ 2021 -جىلعى زەرتتەۋلەرىنىڭ باستى باعىتى بولدى»، - دەدى ول.
ونىڭ اتاپ وتۋىنشە، قازىرگى ۋاقىتتا تسيفرلىق تەڭگە پلاتفورماسىنىڭ پروتوتيپىن ازىرلەۋ اياقتالدى. نارىق قاتىسۋشىلارىمەن جانە حالىقارالىق ۇيىمدارمەن تالقىلاۋلار سەرياسى وتكىزىلدى. پيلوتتىق جوبانىڭ ارالىق ناتيجەلەرى قازاقستان قارجىگەرلەرىنىڭ IX كونگرەسىندە تانىستىرىلدى.
«2021 -جىلعى 15-جەلتوقساندا پيلوتتىق جوبانىڭ ناتيجەلەرى بويىنشا قورىتىندى بايانداما جاريالانادى. مەملەكەت باسشىسىنىڭ تاپسىرماسى بويىنشا ۇلتتىق بانك 2022 -جىلعى 1-شىلدەگە دەيىن پايدا مەن شىعىستاردى باعالاي وتىرىپ، سيفرلىق تەڭگەنى ەنگىزۋ تۋرالى شەشىم قابىلداۋ مودەلىن ازىرلەيدى. 2022 -جىلعى جەلتوقساندا تسيفرلىق تەڭگەنى ەنگىزۋ قاجەتتىلىگى تۋرالى قورىتىندى شەشىم ازىرلەنەدى»، - دەدى ەربولات دوسايەۆ .