الماتىدا جازۋشى ءازىلحان نۇرشايىقوۆقا ارنالعان كىتاپ كورمەسى ءوتتى

الماتى. قازاقپارات - الماتىدا جازۋشى ءازىلحان نۇرشايىقوۆتىڭ ءومىرى مەن شىعارماشىلىعىنا ارنالعان كىتاپ كورمەسى ءوتتى، دەپ حابارلايدى قازاقپارات ءتىلشىسى.

ۇلتتىق كىتاپحانادا «ءمولدىر ماحاببات جىرشىسى» اتتى كىتاپ كورمەسى قازاقستاننىڭ حالىق جازۋشىسى، اباي اتىنداعى مەملەكەتتىك سىيلىقتىڭ لاۋرەاتى ءازىلحان نۇرشايىقوۆتىڭ ءومىرى مەن شىعارماشىلىعىنا ارنالدى. كىتاپحانانىڭ باسپا ءسوز قىزمەتىنەن ءمالىم ەتكەندەي، كورمەنىڭ ماقساتى وقىرمان قاۋىمعا ءازىلحان نۇرشايىقوۆتىڭ ءومىرى مەن شىعارماشىلىعى، ونىڭ قوعامدىق قىزمەتى تۋرالى كەڭىرەك تانىستىرۋ بولىپ تابىلادى. كىتاپ كورمەسىندە وقىرمان قاۋىم ءا. نۇرشايىقوۆتىڭ جۋرناليستىك، شىعارماشىلىق قىزمەتىمەن جاقىن تانىسۋعا مۇمكىندىك الدى. سونداي- اق كورمەدە مەرزىمدى باسىلىم بەتتەرىندە جازۋشى تۋرالى شىققان ماتەريالدار ۇسىنىلعان.

«ق ر ۇلتتىق كىتاپحاناسىنىڭ قورىندا قازاقستاننىڭ حالىق جازۋشىسى ءازىلحان نۇرشايىقوۆتىڭ ءومىرى مەن شىعارماشىلىعى تۋرالى 1000 عا جۋىق ماتەريال، ونىڭ پۋبليتسيستيكالىق ماقالالارى، جيناقتارى، وچەركتەرى، اڭگىمەلەرى مەن روماندارى ساقتالعان»، - دەدى باسپا ءسوز قىزمەتىندە.

ءازىلحان نۇرشايىقوۆ - «جامبىلعا حات»، «ماحاببات قىزىق مول جىلدار»، «اقيقات پەن اڭىز»، «قالامگەر جانە ونىڭ دوستارى»، «ماڭگىلىك ماحاببات جىرى»، «ءومىر ورنەكتەرى» جانە ت. ب. كوپتەگەن جيناقتار، وچەركتەر، اڭگىمەلەر، پوۆەستەر مەن رومانداردىڭ اۆتورى.

كەڭەس وداعىنىڭ باتىرى باۋىرجان مومىش ۇلى تۋرالى «اقيقات پەن اڭىز» رومانى ءۇشىن اۆتور اباي اتىنداعى قازاق كسر مەملەكەتتىك سىيلىعىنا (1978) يە بولدى. «قازاق كسر حالىق جازۋشىسى» قۇرمەتتى اتاعىنا يە (1990). «ەرەن ەڭبەگى ءۇشىن» مەدالىمەن (1995)، «پاراسات» (2005) جانە «وتان» (2010) وردەندەرىمەن ماراپاتتالعان.