كەيبىر ادامدار مەديتسيناعا جۇگىنبەي ەمشى، ءتاۋىپ ارالاپ كەتەدى - ونكولوگ

None
None
نۇر-سۇلتان. قازاقپارات - نەلىكتەن ونكولوگيالىق سىرقاتتاردى اسقىندىرىپ الماعان ءجون؟ جانە قازاقستاندا اتالعان دەرتتەن ەمدەۋدە الەمنىڭ قانداي وزىق تاجىريبەلەرى قولدانىلىپ جاتىر؟

وسى جانە وزگە دە ونكولوگيالىق اۋرۋ تۇرىنە قاتىستى سۇراقتارعا نۇر-سۇلتان قالاسىنىڭ باس ونكولوگ-دارىگەرى، كوپسالالى مەديتسينا ورتالىعىنىڭ ديرەكتورى مۇحتار تولەۋتايەۆ جاۋاپ بەردى، دەپ حابارلايدى قازاقپارات ءتىلشىسى.

«ونكولوگيالىق اۋرۋدىڭ زاردابىن تارتۋشىلارعا قاتىستى ءبىر پروبلەما بار. كەيبىر ادامدار مەديتسيناعا جۇگىنبەي ەمشى، ءتاۋىپ ارالاپ كەتەدى. سول سياقتى ەلىمىزدە اتالعان سالا بويىنشا مامانداندىرىلماعان ءارتۇرلى مەديتسينالىق ورتالىقتار بار. ودان قالدى كەي ادامدار ءوز بەتىمەن، حالىق ەمى ءادىسىن قولدانىپ جاتادى. مىنە، وسى اتالعان فاكتىلەر دەرتتى اسقىندىرىپ الۋعا ءوز اسەرىن تيگىزىپ جاتادى. جىل سايىن 14-15 مىڭ قازاقستاندىق ونكولوگيالىق اۋرۋدان كوز جۇمادى ەكەن»، - دەدى مۇحتار تولەۋتايەۆ.

ماماننىڭ ايتۋىنشا، ەلىمىزدە ونكولوگيالىق اۋرۋدى ەمدەۋ ءادىس-ءتاسىلى حالىقارالىق ستاندارت پەن حاتتاماعا سايكەس جۇرگىزىلىپ جاتىر.

«وتاندىق ونكولوگيا سالاسىندا جاپونيا، وڭتۇستىك كورەيا، يزرايل، گەرمانيا، فرانسيا جانە ا ق ش ەلدەرىنىڭ وزىق تاجىريبەسىن قولدانىپ جاتىرمىز. تاعى ءبىر جايت ەلىمىزدە ونكولوگ ماماندارعا تاپشىلىق بار. جانە ونىڭ بىرنەشە سەبەبى بار. بىرىنشىدەن، ەلىمىز بويىنشا جالپى مەديتسينا ماماندارى تاپشىلىعى ماسەلەسى كۇن تارتىبىندە، ونىڭ ىشىندە ونكولوگتاردا بار. ەكىنشىدەن، ونكولوگيا مەديتسينانىڭ كۇردەلى سالالارىنىڭ ءبىرى. كوپ جاعدايدا ادامدار اۋرۋ اسقىنعاننان كەيىن بارىپ كەلىپ جاتادى. ول جاعدايدا جۇمىس وڭاي ەمەس جانە ۇلكەن جاۋاپكەرشىلىك پەن توزىمدىلىكتى تالاپ ەتەدى»، - دەيدى ول.

ايتا كەتەيىك، بۇگىندە ەل كولەمىندە ونكولوگيالىق اۋرۋدان ەمدەيتىن 18 ورتالىق بار. ودان بولەك، نۇر-سۇلتان قالاسىندا ۇلتتىق ونكولوگيالىق ورتالىق جانە الماتىدا عىلىمي-زەرتتەۋ ينستيتۋت جۇمىس ىستەپ تۇر. بۇعان دەيىن مامان ونكولوگيالىق اۋرۋدىڭ الدىن الۋعا قاتىستى كەڭەس بەرگەن ەدى.

سول سياقتى اتالعان دەرت تۇرىنە كوبىنەسە قاي جاستاعى ادامداردىڭ شالدىعاتىنى تۋرالى ايتقان ەدى.

سوڭعى جاڭالىقتار