USD 434.34 EUR 491.93
RUB 5.56 CNY 68.67
جاڭالىقتار

قاسىم- جومارت توقايەۆ گەرمانيانىڭ جاڭا سايلانعان فەدەرالدىق كانسلەرىن قۇتتىقتادى

8 جەلتوقسان 17:57
:ءبولىسۋ
قاسىم- جومارت توقايەۆ گەرمانيانىڭ جاڭا سايلانعان فەدەرالدىق كانسلەرىن قۇتتىقتادى

نۇر- سۇلتان. قازاقپارات - پرەزيدەنت قاسىم- جومارت توقايەۆ گەرمانيانىڭ جاڭادان سايلانعان فەدەرالدىق كانسلەرى ولاف شولتسكە جەدەلحات جولدادى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

قازاقستان پرەزيدەنتى قاسىم- جومارت توقايەۆ بارشا قازاقستاندىقتىڭ جانە جەكە ءوزىنىڭ اتىنان ولاف شولتستى گەرمانيا فەدەراتيۆتىك رەسپۋبليكاسىنىڭ فەدەرالدىق كانسلەرى قىزمەتىنە كىرىسۋمەن شىن جۇرەكتەن قۇتتىقتادى.

«بۇل تاريحي وقيعا - حالقىڭىزدىڭ سىزگە جانە ءوزىڭىز باسقارىپ وتىرعان كواليتسياعا ەلىڭىزدىڭ ساياسي- ەكونوميكالىق وركەندەۋىن جالعاستىرۋعا، سونداي- اق ونىڭ حالىقارالىق دەڭگەيدەگى ۇلتتىق مۇددەلەرىن ىلگەرىلەتۋگە باعىتتالعان ماڭىزدى جوسپارلارىڭىزعا ارتقان سەنىمىنىڭ ايقىن دالەلى. وسى تۇستا ءسىزدىڭ قاجىرلى ەڭبەگىڭىز وتانىڭىزدى بۇگىنگىدەن دە بيىك بەلەستەر مەن جاڭا تابىستارعا جەتەلەي بەرۋىنە تىلەكتەستىگىمدى بىلدىرەمىن»، - دەلىنگەن قۇتتىقتاۋ حاتتا.

مەملەكەت باسشىسى گەرمانيانى قازاقستاننىڭ ەۋروپالىق وداقتاعى باستى سەرىكتەسى دەپ سانايتىنىن جانە ەكى ەل اراسىنداعى قارقىندى دامىپ كەلە جاتقان ستراتەگيالىق ىنتىماقتاستىقتى نىعايتۋعا ەرەكشە ءمان بەرەتىنىن اتاپ وتكەن.

«قازاق- گەرمان جانە ورتالىق ازيا - ەۋروپالىق وداق فورماتتارىنداعى سان قىرلى ىقپالداستىعىمىزدىڭ مازمۇنىن ودان ءارى بايىتۋ ماقساتىندا، سىزبەن قويان- قولتىق جۇمىس ىستەۋگە دايىن ەكەنىمدى راستايمىن. ورايلى مۇمكىندىكتى پايدالانىپ، ءوزارا ىڭعايلى ۋاقىتتا ءسىزدى قازاقستانعا رەسمي ساپارمەن كەلۋگە شاقىرامىن»، - دەپ جازىلعان پرەزيدەنتتىڭ جەدەلحاتىندا.

قاسىم- جومارت توقايەۆ ولاف شولتستىڭ يگى باستامالارىنا ساتتىلىك، وتباسىنا باياندى باقىت، ال دوستاس گەرمان حالقىنا مول ىرىس پەن قۇت- بەرەكە تىلەگەن.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات