قازاقستاندىق عالىمدار ارال تۇبىنە اعاش ءوسىرۋدىڭ جاڭا تەحنولوگياسىن ويلاپ تاپتى
بۇل تۋرالى س. سەيفۋللين اتىنداعى قازاق اگروتەحنيكالىق ۋنيۆەرسيتەتى باسقارما ءتوراعاسىنىڭ حالىقارالىق قاتىناستار جانە ستراتەگيالىق جوسپارلاۋ بويىنشا ورىنباسارى ەرلان نىسانبايەۆ ءمالىم ەتتى، دەپ حابارلايدى قازاقپارات ءتىلشىسى.
«بۇگىندە ەلىمىزدىڭ ورمان شارۋاشىلىعى سالاسىندا ءبىرقاتار عىلىمي زەرتتەۋ جۇرگىزىلىپ جاتىر. سونىڭ ءبىرى - ارال تەڭىزىنىڭ قۇرعاعان تۇبىندە فيتومەليوراتيۆ تەحنولوگياسى ارقىلى اعاش وتىرعىزۋ مۇمكىندىگى. جاڭا تەحنولوگيانىڭ كومەگىمەن اعاش وتىرعىزىپ، وسىمدىك تۇرلەرىن ەگۋ تەڭىزدەن بولىنەتىن شاڭ مەن تۇزدىڭ ازايۋىنا جانە جەرگىلىكتى حالىق زارداپ شەگىپ جاتقان سىرقات تۇرلەرىنىڭ تومەندەۋىنە ىقپال ەتەدى. سونداي- اق، جاڭا جايىلىم جەرلەرىنىڭ پايدا بولۋىنا مۇمكىندىك جاسايدى. تيىسىنشە ارال ايماعىنداعى ەكولوگيالىق جاعداي دا جاقسارا تۇسەدى. تاۋەلسىزدىك جىلدارى كەۋىپ قالعان ارال تەڭىزىندە 100 مىڭ گەكتاردان استام جەرگە سەكسەۋىل وتىرعىزىلدى»، - دەدى ە. نىسانبايەۆ ەلوردادا وتكەن «تاۋەلسىزدىك جانە قازاقستاننىڭ اگروونەركاسىپ كەشەنىنىڭ دامۋى» اتتى كونفەرەنسيا بارىسىندا.
سونداي- اق، سپيكەر ەلوردا ماڭىنداعى جاسىل بەلدەۋ بويىنشا دا ءبىرشاما جۇمىس اتقارىلعانىن العا تارتتى.
«ەلوردا ىرگەسىندەگى جاسىل بەلدەۋ توپىراق قۇرامىن جاقسارتۋ، ونىڭ تۇزدانۋىن ازايتۋ جانە قۇنارلىلىعىن ارتتىرۋ بويىنشا ەكسپەريمەنتتەر جۇرگىزىلدى. جانە ونداعى وسىمدىكتەر مەن اعاشتاردىڭ وسۋىنە كەدەرگى كەلتىرەتىن ارامشوپتەرمەن كۇرەسۋ ماقساتىندا گەربيتسيدتەردى قولدانۋ ادىستەرى زەرتتەلدى. سول سياقتى جاسىل بەلدەۋ اۋماعىندا ورمان- ساياباق لاندشافتارىن جاساۋ بويىنشا ۇسىنىستار ازىرلەندى. عالىمدار جۇمىسىنىڭ ارقاسىندا 100 مىڭ گەكتارعا جۋىق جەرگە 28 ءتۇرلى اعاش ءتۇرى وتىرعىزىلدى. قازىرگى ۋاقىتتا جاسىل بەلدەۋ اۋماعىندا ەلوردا تۇرعىندارى مەن قالا قوناقتارى ءۇشىن دەمالۋعا جاعداي جاسالعان»، - دەيدى ول.
ودان بولەك، ە. نىسانبايەۆ وتاندىق عالىمداردىڭ سيرەك كەزدەسەتىن جانە جويىلۋ قاۋپى بار اعاش تۇقىمدارى ءۇشىن «ينۆيترو» ءوسىرۋ ءادىسىن ويلاپ تاپقانىن ايتتى. ونىڭ سوزىنشە، اتالعان ءادىس بيوالۋاندىقتى قامتاماسىز ەتۋ ءۇشىن ماڭىزدى.
اۆتور: ءالي يبرايەۆ