ءماجىلىس دەپۋتاتتارى نەسيە راقىمشىلىعىن جاساۋدى ۇسىندى

نۇر- سۇلتان. قازاقپارات - پارلامەنت ءماجىلىسىنىڭ جالپى وتىرىسىندا دەپۋتات ازامات ابىلدايەۆ قارجىلىق قيىندىققا تاپ بولعان ادامدارعا نەسيە راقىمشىلىعىن جاساۋدى ۇسىندى، دەپ حابارلايدى قازاقپارات ءتىلشىسى.

«قازاقستان حالقىنىڭ بانكتەر الدىنداعى بەرەشەگى كۇن ساناپ ارتىپ بارا جاتىر. قازىرگى ۋاقىتتا، حالىقتىڭ 27 پايىزى بانكتەردىڭ الدىندا بورىشكەر. بۇگىندە ەل تۇرعىندارىنىڭ يپوتەكالىق نەسيە بويىنشا بەرەشەگى 2,716 تريلليون تەڭگەگە جەتىپتى. تۇتىنۋشىلىق ماقساتتارعا الىنعان نەسيە 5,19 تريلليون تەڭگە بولسا، مەرزىمى وتكەن بەرەشەك 199 تريلليون تەڭگەنى قۇراپ وتىر»، - دەدى ا. ابىلدايەۆ ۇكىمەت باسشىسىنىڭ ءبىرىنشى ورىنباسارى ءاليحان سمايىلوۆتىڭ اتىنا جولداعان ساۋالىندا.

وسى ورايدا ول ەلىمىزدە زاڭدى تۇلعالاردىڭ بانكروتتىعى تۋرالى زاڭى بار ەكەنىن، ءبىراق جەكە تۇلعالاردىڭ بانكروتتىعى تۋرالى زاڭ جوق ەكەنىن اتاپ ءوتتى. «اق جول» پارتياسىنىڭ دەپۋتاتتارى بۇعان دەيىن دە «جەكە تۇلعالاردىڭ بانكروتتىعى تۋرالى» زاڭ جوباسى كەرەك دەپ جۇرگەنىنە ون شاقتى جىل بولدى. بۇل باستامانى سول كەزدە قارجى مينيسترلىگى ءىلىپ اكەتكەنىمەن، وسى كۇنگە دەيىن ءۇنسىز قالىپ وتىر.

«ال ەندى قىلمىس جاساپ سوتتالعاندارعا راقىمشىلىق جاساپ وتىرعان مەملەكەتكە قانداي دا ءبىر وقىس وقيعاعا ۇشىراۋىنىڭ سالدارىنان قارجىلىق قيىندىققا تىرەلىپ وتىرعان ازاماتتارىمىزعا نەگە قامقورلىق جاساماسقا؟! ولار دا ءبىزدىڭ قوعامىمىزدىڭ ءبىر بولشەگى ەمەس پە؟ نەگە ولارعا دا راقىمشىلىق جاسامايمىز؟»، - دەدى دەپۋتات.

«اق جول» پارتياسىنىڭ دەپۋتاتتارى قانداي دا ءبىر وقىس وقيعاعا ۇشىراۋىنىڭ سالدارىنان قارجىلىق قيىندىققا تىرەلىپ وتىرعان ازاماتتارىمىزعا تاۋەلسىزدىكتىڭ 30 جىلدىعىنا بايلانىستى راقىمشىلىق جاساۋدى، پارلامەنتتىڭ قاراۋىنا «جەكە تۇلعالاردىڭ بانكروتتىعى تۋرالى» زاڭ جوباسىن ەنگىزۋدى، كوللەكتورلىق كومپانيالاردى تىزگىندەۋدى سۇرايمىز»، - دەدى ازامات ابىلدايەۆ.

اۆتور: رۋسلان عابباسوۆ