ق ر پرەزيدەنتى قىرعىزستان مينيسترلەر كابينەتىنىڭ ءتوراعاسى اقىلبەك جاپاروۆتى قابىلدادى

نۇر- سۇلتان. قازاقپارات - مەملەكەت باسشىسى قىرعىز رەسپۋبليكاسىنىڭ پرەزيدەنتى اكىمشىلىگىنىڭ باسشىسى - مينيسترلەر كابينەتىنىڭ ءتوراعاسى اقىلبەك جاپاروۆتى قابىلدادى، دەپ حابارلايدى قازاقپارات اقورداعا سىلتەمە جاساپ.

كەزدەسۋ بارىسىندا قازاقستان مەن قىرعىزستان اراسىنداعى ەكىجاقتى ستراتەگيالىق ىنتىماقتاستىقتىڭ وزەكتى ماسەلەلەرى تالقىلاندى. ساۋدا- ەكونوميكالىق، ينۆەستيتسيالىق، مادەني- گۋمانيتارلىق ىقپالداستىقتى دامىتۋ جونىندەگى ناقتى شارالارعا باسا ءمان بەرىلدى. قاسىم- جومارت توقايەۆ اقىلبەك جاپاروۆقا ءىلتيپات بىلدىرە وتىرىپ، ونىڭ بۇل ساپارىنىڭ دوستىق، تاتۋ كورشىلىك جانە وداقتاستىق رۋحىنداعى قازاق- قىرعىز قاتىناستارىن تالقىلاۋ تۇرعىسىنان ماڭىزدى ەكەنىن اتاپ ءوتتى.

- ءبىز - باۋىرلاس ەلمىز. مەملەكەتتەرىمىز - ۇجىمدىق قاۋىپسىزدىك تۋرالى شارت ۇيىمى مەن ەۋرازيالىق ەكونوميكالىق وداققا مۇشە. ەكىجاقتى نەگىزدە ءاردايىم ءوزارا تىعىز ىقپالداستىعىمىز بەن ىنتىماقتاستىعىمىزدى دامىتىپ كەلەمىز، - دەدى مەملەكەت باسشىسى.

پرەزيدەنت ءوزارا ساۋدا- ساتتىقتىڭ وڭ قارقىنىن اتاپ ءوتتى. ەكى ەل اراسىنداعى ساۋدا اينالىمى بيىلعى 9 ايدىڭ قورىتىندىسى بويىنشا 9 پايىزعا ارتىپ، 680 ميلليون دوللارعا جەتكەن. سونىمەن قاتار ىنتىماقتاستىقتىڭ بارلىق الەۋەتىن پايدالانا وتىرىپ، وسى باعىتتاعى جۇمىس قارقىنىن ۇدەتە ءتۇسۋدىڭ ماڭىزدى ەكەنىن ايتتى. اقىلبەك جاپاروۆ ءوز كەزەگىندە كەزدەسۋگە مۇمكىندىك بەرگەنى ءۇشىن قاسىم- جومارت توقايەۆقا العىس ءبىلدىرىپ، قىرعىزستان پرەزيدەنتىنىڭ جۇرەكجاردى سالەمىن جەتكىزدى. سونداي- اق ول مەملەكەت باسشىسى مەن قازاقستان حالقىن تاۋەلسىزدىكتىڭ 30 جىلدىعىمەن قۇتتىقتادى.

- وسى جىلدار ىشىندە قازاقستان ءوزىن قارقىندى دامىپ كەلە جاتقان ەل، ساياسي جانە ەكونوميكالىق تۇرعىدان مىقتى، حالىقارالىق ارەناداعى ۇستانىمى بەرىك ءارى بەدەلدى مەملەكەت رەتىندە تانىتتى. ءبىز قىرعىزستاندا ءسىزدىڭ ەلىڭىزدىڭ جەتىستىكتەرىنە ءاردايىم قۋانامىز جانە باۋىرلاس قازاقستاننىڭ قولداۋىن ءارقاشان سەزىنەمىز، - دەدى قىرعىزستان مينيسترلەر كابينەتىنىڭ ءتوراعاسى.

اقىلبەك جاپاروۆ قاسىم- جومارت توقايەۆقا ەكى ەل ۇكىمەتتەرىنىڭ اراسىندا جۇرگىزىلگەن كەلىسسوزدەردىڭ تابىستى بولعانىن ايتىپ، ونىڭ قورىتىندىلارى قازاقستان پرەزيدەنتىنىڭ قىرعىزستانعا جوسپارلاپ وتىرعان كەلەسى جىلعى ساپارىنىڭ ساپالى ءارى مازمۇندى بولۋىنا سەپتىگىن تيگىزەتىنىنە سەنىم ءبىلدىردى. اڭگىمەلەسۋ سوڭىندا قازاقستان پرەزيدەنتى قىرعىزستانعا كومەك كورسەتۋگە، ەكى ەل اراسىنداعى ءوزارا ءتيىمدى ىنتىماقتاستىقتى جان- جاقتى دامىتۋعا دايىن ەكەنىن ناقتىلاپ، قىرعىزستان پرەزيدەنتى سادىر جاپاروۆقا سالەمىن جولدادى.