تۇلعالاردى سويلەتكەن تۋىندىلار

نۇر-سۇلتان.قازاقپارات - قازاقستانىڭ تۇڭعىش پرەزيدەنتى − ەلباسى كىتاپحاناسىندا قازاقستاننىڭ ەڭبەك سىڭىرگەن قايراتكەرى، سۋرەتشىلەر وداعىنىڭ مۇشەسى نۇرجان قارىمساقوۆتىڭ «ۇلى دالا پەرزەنتى» اتتى جەكە كورمەسى اشىلدى.

كورمەگە قىلقالام شەبەرىنىڭ مونۋمەنتالدى كەسكىندەمە جانرىنداعى 20 ۇزدىك جۇمىسى قويىلدى.

مادەني شارانىڭ اشىلۋىندا ەلباسى كىتاپحاناسى مۋزەي قۇندىلىقتارىن ەسەپكە الۋ جانە ساقتاۋ قىزمەتىنىڭ باسشىسى كۇلايشا اقتايەۆا «تاۋەلسىزدىكتىڭ مادەني نەگىزى» جوباسى اياسىندا وتكەن كورمەنىڭ قازاقستاننىڭ تۇڭعىش پرەزيدەنت كۇنى مەن ازاتتىعىمىزدىڭ 30 جىلدىعىنا وراي ۇيىمداستىرىلعانىن اتاپ ءوتتى.

− نۇرجان جاسابەك ۇلىنىڭ تۋىندىلارى اراسىنداعى ەڭ تانىمالى - «ەل تۇتقا» كارتيناسى، ونداعى ءتۇرلى- ءتۇستى پاننودا ەلىمىزدىڭ 117 كورنەكتى تۇلعاسىن كوركەم بەينەلەپ، حالقىمىزدىڭ تاريحي كەزەڭدەرىن ايشىقتى كورسەتە بىلگەن، −دەدى ول.

شىنىندا دا سۋرەتشىنىڭ شىعارماشىلىعىندا ۇلت تاريحى ەرەكشە ورىن الادى، اسىرەسە ول ەل اۋماعىندا بولعان تاريحي كەزەڭدەردى تۇتاس كورسەتۋگە ۇمتىلعان. ونى اۆتوردىڭ كومپوزيتسيالىق قۇرىلىمى مەن ءبىرتۇتاس سيۋجەتتىك سەريالاردى قۇرۋ قابىلەتىنەن بايقايسىز.

كورمە بارىسىندا قازاقستاننىڭ حالىق قاھارمانى، گەنەرال- لەيتەنانت باقىتجان ەرتايەۆ سۋرەتشى ەڭبەكتەرى تۋرالى پاراساتتى وي ايتا كەلىپ: «ءبىز - تامىرى تەرەڭ ەرجۇرەك حالىقپىز. سوندىقتان دا كونە شەجىرەمىز بەن تاريحىمىزعا ەسىمى التىن ارىپپەن جازىلعان باتىرلاردى بەدەرلەگەن قىلقالام شەبەرىنىڭ جۇمىستارىنا ريزا بولامىن. ونىڭ تۋىندىلارىندا ۇلتىمىزدىڭ بولمىسى، مادەنيەتى مەن فيلوسوفياسى تۇنىپ تۇر» دەپ جىلى لەبىزىن ءبىلدىردى.

ءىس- شارا سوڭىندا كورمە يەسى ءوز شىعارماشىلىعىنداعى جاڭاشا ىزدەنىستەرىنە توقتالىپ، جينالعان قاۋىمعا ريزاشىلىعىن جەتكىزدى.

ازامات ەسەنجول

egemen.kz