ۇلتتىق كەڭەس مۇشەلەرى ءى ءى م باسشىسىمەن پرەزيدەنت رەفورمالارىنىڭ بارىسىن تالقىلادى
7 جەلتوقسان 21:59

ۇلتتىق كەڭەس مۇشەلەرى ءى ءى م باسشىسىمەن پرەزيدەنت رەفورمالارىنىڭ بارىسىن تالقىلادى

نۇر-سۇلتان. قازاقپارات - بۇگىن ق ر ىشكى ىستەر ءمينيسترى ەرلان تۇرعىمبايەۆ ۇلتتىق قوعامدىق سەنىم كەڭەسى مۇشەلەرىمەن كەزدەستى، دەپ حابارلايدى قازاقپارات.

ق ر پرەزيدەنتىنىڭ كومەكشىسى، كەڭەس حاتشىسى ەرلان قارين ءوزىنىڭ قۇتتىقتاۋ سوزىندە ىشكى ىستەر مينيسترلىگىنىڭ باسشىلىعى قوعاممەن ديالوگقا اشىقتىعىن جانە بىرلەسكەن ىنتىماقتاستىققا دايىندىعىن كورسەتىپ وتىرعانىن اتاپ ءوتتى.

ماسەلەن، ەرلان قارين وتكەن كەزدەسۋ اياسىندا 2020-جىلدىڭ قاراشا ايىنىڭ سوڭىندا ۇ ق س ك مۇشەلەرى ايەلدەر مەن بالالاردى زورلىق-زومبىلىقتان قورعاۋ جونىندەگى بولىمشەلەر شتاتىن نىعايتۋ، بالالارعا قاتىستى زورلىق-زومبىلىق قىلمىستاردى تەرگەيتىن ايەل تەرگەۋشىلەردى مامانداندىرۋ جانە پەنيتەنتسيارلىق مەكەمەلەر مەن پوليتسيانىڭ قىزمەتتىك ءۇي-جايلارىندا جاپپاي بەينەباقىلاۋ ەنگىزۋ شەڭبەرىندە باقىلاۋعا ەنبەگەن ايماقتاردىڭ كارتاسىن ازىرلەۋ بويىنشا ۇسىنىستار ۇسىنعانىن مىسالعا كەلتىردى.

وسى ۇسىنىستاردىڭ بارلىعى پرەزيدەنت قاسىم-جومارت توقايەۆتىڭ 2021-جىلعى اقپانداعى ۇ ق س ك- ءنىڭ بەسىنشى وتىرىسىندا بەرگەن تاپسىرمالارىنىڭ نەگىزىن قالادى. 2021-جىلعى ناۋرىزدا ىشكى ىستەر ءمينيسترىنىڭ بۇيرىعىمەن ىشكى قايتا ءبولۋ ەسەبىنەن ايەلدەردى زورلىق-زومبىلىقتان قورعاۋ جونىندەگى بولىمشەلەردىڭ شتات سانى 248 بىرلىككە، كامەلەتكە تولماعاندار ءىسى جونىندەگى ينسپەكتورلار 2,5 مىڭعا جۋىق بىرلىككە جەتكىزىلدى. سونداي-اق وسى جىلدىڭ كوكتەمىندە ايەلدەر مەن كامەلەتكە تولماعاندارعا قاتىستى زورلىق قىلمىستاردى تەرگەيتىن قۇرامىنا تەرگەۋشى-ايەلدەر كىرگەن توپتار قۇرىلدى.

سونىمەن قاتار قازىرگى ۋاقىتتا ءى ءى م اعىمداعى جىلدىڭ سوڭىنا دەيىن پوليتسيانىڭ قىزمەتتىك ءۇي-جايلارىندا جاپپاي بەينەباقىلاۋدى ەنگىزۋ بويىنشا شارالار قابىلداۋدا.

اتالعان جۇيەنى ق ا ج مەكەمەلەرىندە كەزەڭ-كەزەڭىمەن ەنگىزۋ 2023-جىلدىڭ سوڭىنا دەيىن اياقتالاتىن بولادى.

ەرلان تۇرعىمبايەۆ ءوز كەزەگىندە مينيسترلىكتىڭ اعىمداعى قىزمەتى جانە ۆەدومستۆو جۇمىسىنداعى جوسپارلانعان وزگەرىستەر تۋرالى باياندادى.

مينيستر ۇ ق س ك مۇشەلەرىن ىشكى ىستەر ورگاندارى جۇيەسىن جاڭعىرتۋ، پوليتسيا جۇمىسىنىڭ سەرۆيستىك مودەلىنە كوشۋ، «جۇرتقا جاقىن پوليتسيا» قاعيداتىن قامتاماسىز ەتۋ، سونداي-اق سيفرلىق تەحنولوگيالاردى ەنگىزۋ بويىنشا «Police 102» قوسىمشاسىن پايدالانۋ، ەلەكتروندىق اكىمشىلىك جانە سوتقا دەيىنگى ءىس جۇرگىزۋ جانە وزگە دە شارالارمەن تانىستىردى.

ەرلان تۇرعىمبايەۆ قازىرگى ۋاقىتتا ءى ءى م حالىققا ەلەكتروندىق فورماتتا كورسەتىلەتىن مەملەكەتتىك قىزمەتتەردىڭ دەڭگەيى %95 عا جەتكىزىلگەنىن اتاپ ءوتتى (40 تىڭ 38 ءى).

ولاردىڭ ىشىندەگى ەڭ كەڭ تارالعانى - كولىك قۇرالدارىن بانكتەردىڭ موبيلدى قوسىمشالارى ارقىلى راسىمدەۋ جانە تىركەۋ.

قازىر مۇنداي قىزمەت ءبىرقاتار ەكىنشى دەڭگەيلى بانكتەردىڭ قوسىمشاسىندا قولجەتىمدى. سونداي-اق كەڭەس مۇشەلەرىنە پەنيتەنتسيارلىق جۇيەنى جاڭعىرتۋ، سوتتالعانداردىڭ قۇقىقتىق جاعدايىن، ولاردى ۇستاۋ جاعدايلارىن جاقسارتۋ بويىنشا جۇرگىزىلىپ جاتقان جۇمىستار تۋرالى اقپارات بەرىلدى.

قازىرگى ۋاقىتتا مينيسترلىك جۇمىس ىستەپ تۇرعان كولونيالاردىڭ اۋماعىندا جاڭا تۇرعىن بلوكتارىن كەزەڭ-كەزەڭىمەن سالۋ جانە قولدانىستاعى عيماراتتاردى قايتا جاڭارتۋ بويىنشا جۇمىستاردى باستادى.

سونىمەن قاتار، الداعى 3 جىلدا الماتى، اقتوبە، ماڭعىستاۋ وبلىستارىندا جانە تۇركىستان وبلىستارىندا 4 مەكەمە سالۋ ماسەلەسى پىسىقتالۋدا.

مينيستر بۇگىنگى كەزدەسۋ الداعى ۋاقىتتا قوعامدىق قاۋىپسىزدىكتى قامتاماسىز ەتۋ سالاسىندا ءى ءى م- مەن سىندارلى ىنتىماقتاستىقتى دامىتۋعا ىقپال ەتەتىنىن ەرەكشە اتاپ ءوتتى.

ودان ءارى كەزدەسۋ سۇراق-جاۋاپ فورماتىندا جالعاستى. كەزدەسۋ قورىتىندىسى بويىنشا قاتىسۋشىلار جانە تالقىلاۋ بارىسىندا ايتىلعان ۇسىنىستار مەن ماسەلەلەردى بىرلەسىپ پىسىقتاۋ تۋرالى كەلىستى.

سونىمەن قاتار ۇلتتىق كەڭەس مۇشەلەرى ەلوردالىق پوليتسيا دەپارتامەنتىنىڭ جەدەل باسقارۋ ورتالىعىندا بولىپ، سيفرلاندىرۋ جوبالارىن ءىس جۇزىندە ىسكە اسىرۋ، ونىڭ ىشىندە بەينەباقىلاۋ جۇيەلەرىمەن، پوليتسيانى شۇعىل شاقىرۋ، ەسەپكە الىنعان ادامداردى باقىلاۋدىڭ ەلەكتروندىق قۇرالدارى جانە وزگە دە تەحنولوگيالارمەن تانىستى. سونداي-اق ۇلتتىق كەڭەس مۇشەلەرىنە پوليتسەيلەردىڭ جاڭا نىساندى كيىم-كەشەكتەرى مەن سوتتالعاندار دايىندايتىن «ەڭبەك» ر مك ونىمدەرى كورسەتىلدى.


جاڭالىقتار