قازاقستان ۋكراينانى وتىنمەن جىلىتادى

None
None
نۇر- سۇلتان. قازاقپارات - ۋكراينادا گاز باعاسى ءبىر جىلدا 5 ەسە ارتقان. جىل باسىندا ونەركاسىپ وشاقتارى تۇتىناتىن كوگىلدىر وتىننىڭ 1 مىڭ تەكشە مەترى 130 مىڭ بولسا، قازىر 560 مىڭ تەڭگەگە جەتكەن.

ەندى ۋكراينانى وتىن داعدارىسىنان قازاقستان قۇتقارىپ قالماق. ەلگە تەڭىز ارقىلى مازۋت جەتكىزىلە باستادى. بۇل بۇرىن- سوڭدى بولماعان ۇدەرىس. ۋكرايناعا مۇناي جانە مۇناي ونىمدەرىنىڭ 80 پروتسەنتى شەتەلدەن تاسىمالدانادى، مۇنداعى گاز باعاسى وتە قۇبىلمالى جانە كوبىنەسە كوگىلدىر وتىننىڭ قۇنى ەۋروپا نارىعىمەن تەڭەسىپ وتىرادى. سوندىقتان ۋكراينادا تەك ءبىر جىلدا ونەركاسىپتىك ءوندىرىس ورىندارى تۇتىناتىن گاز باعاسى 5 ەسە ارتقان. جىل باسىندا عانا كوگىلدىر وتىننىڭ 1 مىڭ تەكشە مەترى 8 مىڭ گريۆەن بولسا، قازىر 35 مىڭ گريۆەنگە دەيىن قىمباتتادى.

اتاپ وتەرلىگى، سوڭعى ءبىر جىلدا ۋكراينا قازاقستاننان تاسىمالداناتىن سۇيىتىلعان گازدىڭ كولەمىن دە كۇرت ارتتىردى. اي سايىن ءبىزدىڭ ەلدەن ۋكرايناعا 25 مىڭ توننا گاز جەتكىزىلەدى جانە ونىڭ بەس مىڭ تونناسى تەڭىز ترانسپورتى ارقىلى تاسىمالدانادى.

الەكساندر سيرەنكو، گاز جانە مۇناي نارىعىنىڭ ساراپشىسى:

- قازاقستاننان ۋكرايناعا تاسىمالداناتىن سۇيىتىلعان گاز كولەمى ارتتى، بۇگىندە يمپورتتىڭ 30-35 پروتسەنتىن قۇرايدى. قازاقستاندىق گاز جوعارى ساپاسىمەن ەرەكشەلەنەدى جانە پروپان- بۋتان فراكسيالارى بولەك، سونىسىمەن دە ىڭعايلى. قازاق گازىن ءبىز رەسەي جانە بەلارۋس وتىنىمەن ارالاستىرىپ، ناتيجەسىندە ءبىزدىڭ ەلدە تانىمال رەسۋرس كوزىن الامىز.

ۋكراينا جاقىن ۋاقىتتا قازاقستاننان تۇڭعىش رەت مازۋت وتىنىن دا تەڭىز ترانسپورتى ارقىلى تاسىمالداي باستادى. قازاقستاننىڭ سۇيىتىلعان گازى، كومىرى نەمەسە مازۋتى بولسىن ۋكراينا نارىعى ءۇشىن ءبىرىنشى كەزەكتە جوعارى ساپاسىمەن قۇندى، دەيدى ساراپشى.

الەكساندر سيرەنكو، گاز جانە مۇناي نارىعىنىڭ ساراپشىسى:

- جاقىندا ۋكراينا تاريحىندا العاش رەت ۋكرايناعا مازۋتتىڭ ءبىر پارتياسى تەڭىز ارقىلى جەتكىزىلدى. بار بولعانى 5 مىڭ توننا، دەگەنمەن، ءبىز ءۇشىن بۇل تاسىمالدىڭ جاڭعىرۋى وتە جاعىمدى جاڭالىق. نەگە؟ ويتكەنى بىزدە تابيعي گازدىڭ باعاسى قاتتى قىمباتتاۋدا. ال مازۋتتى كوپتەگەن ۋكراينالىق كاسىپورىندار ەنەرگيا تاسىمالداۋشى رەتىندە ءتيىمدى پايدالانا الادى.

ەكى اپتا بۇرىن ۋكرايناعا تەڭىز جولدارى ارقىلى قازاقستاندىق كومىر دە تاسىمالدانا باستادى. ۋكراينا مەملەكەتتىك «سەنترەنەرگو» كومپانياسى قازاقستانمەن 1,5 ميلليون توننا ەنەرگەتيكالىق كومىردى ساتىپ الۋ تۋرالى كەلىسىم- شارت جاساسقان. 20 -قاراشا كۇنى العاشقى 60,5 مىڭ توننا كومىر «يۋجنىي» پورتىنا جەتكىزىلىپ، ۋكراينانىڭ جىلۋ ەلەكتر ورتالىقتارىنا تاسىمالدانۋ ءۇشىن تيەلىپ جاتىر.

www.24.kz


سوڭعى جاڭالىقتار