قايرات كەلىمبەتوۆ موبيلدى اۋدارىم ماسەلەسىنە پىكىر ءبىلدىردى

None
None
نۇر- سۇلتان. قازاقپارات – ق ر ستراتەگيالىق جوسپارلاۋ جانە رەفورمالار اگەنتتىگىنىڭ ءتوراعاسى قايرات كەلىمبەتوۆ موبيلدى اۋدارىمدار بويىنشا تۋىنداعان ماسەلەگە پىكىر ءبىلدىردى، دەپ حابارلايدى قازاقپارات.

«قازىر قازاقستاندا ءموبيلدى اۋدارىمدار جونىندە قىزىق جاعداي بولىپ جاتىر. ءسىز ۇلتتىق بانكتىڭ بۇرىنعى ءتوراعاسى رەتىندە جاڭا تەحنولوگيالىق ينفراقۇرىلىمنىڭ قالىپتاسقانىن كوردىڭىز. ەندى ەلەكتروندىق ءاميانداردى باقىلاۋدى كۇشەيتۋگە قالاي قارايسىز؟»، - دەپ سۇرادى «حابار» تەلەارناسىنداعى «ۇلتتىق مۇددە» باعدارلاماسىنىڭ جۇرگىزۋشىسى ەرلان بەكحوجين سپيكەردەن.

«مۇندا ەكى ءساتتى اتاپ ءوتۋ قاجەت. ءبىر جاعىنان، ءبىز موبيلدى اۋدارىمداردى ىنتالاندىرۋىمىز كەرەك. وزدەرىڭىز بىلەسىزدەر، جاڭا ەكوجۇيە پايدا بولدى، سونىڭ ارقاسىندا كۇندەلىكتى ومىردە كوممۋنالدىق شىعىنداردى تولەپ، كينوتەاترلار مەن دۇكەندەردە تولەم جاسايتىن قازاقستان ازاماتتارى عانا ەمەس، كاسىپكەرلەر دە مۇنى بيزنەسىن جۇرگىزۋگە قولدانا باستادى. مەنىڭ ويىمشا، مۇندا قولما- قول تولەمگە نەگىزدەلگەن ەكونوميكادان ونلاين تولەمگە كوشكەن توڭكەرىس بولىپ جاتقانىن ايتۋ كەرەك. ەكىنشى دەڭگەيلى بانكتەر سيفرلاندىرۋ جارىسىن باستادى. بۇل پروتسەستى توقتاتۋعا بولمايدى، بۇل - ەل ءۇشىن وتە ماڭىزدى ءارى قاجەتتى پروتسەسس»، - دەدى قايرات كەلىمبەتوۆ باعدارلاما ەفيرىندە.

اگەنتتىك ءتوراعاسىنىڭ ايتۋىنشا، سالىق سالۋ ماسەلەسى تۋىنداعان جاعدايدا قارجى رەتتەۋشىمەن، ۇلتتىق بانكپەن جانە تىكەلەي وسى نارىقتىڭ قاتىسۋشىلارىمەن ەكوجۇيەنى دامىتۋعا زيان كەلتىرمەي كەلىسۋ قاجەت.

«مەنىڭ جەكە كوزقاراسىم - قازىرگى كەزەڭدە ەكوجۇيەنىڭ دامۋىن ىنتالاندىرۋ قاجەت شىعار. سودان كەيىن جالپىمەملەكەتتىك سيفرلىق ەكوجۇيەنىڭ ءبىر بولىگىنە اينالاتىن، قانداي دا ءبىر سالىق سالۋ ماسەلەسى كوتەرىلەتىن جانە بۇل ازاماتتارىمىز بەن كاسىپكەرلەرىمىزدى مازالامايتىن كەزەڭ ءسوزسىز، تابيعي جولمەن ءوزى كەلەدى»، - دەدى ق. كەلىمبەتوۆ.


سوڭعى جاڭالىقتار