ابىلاي حاننىڭ كيىمى مۋزەي قورىنا تاپسىرىلدى

None
None
تۇركىستان. قازاقپارات - تۇركىستان وبلىسى باس يمامىنىڭ ورىنباسارى مۇحامەدجان ەستەمىروۆ ءۇش ءجۇزدىڭ باسىن قوسقان قازاقتىڭ كورنەكتى تۇلعاسى ابىلاي حاننىڭ قاجىلىق ساپارداعى يحرام كيىمىن «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ قورىنا تابىستادى.

يحرام كيىم - ابىلاي حان اتىنان جانە مادينە قالالارىنا جاسالعان ۇلكەن قاجىلىق ساپارىندا كيىلگەن.

وزدەرىڭىزگە ءمالىم، 2015-جىلى قازاقستاننىڭ تۇڭعىش پرەزيدەنتى - ەلباسى ن. نازاربايەۆتىڭ باستاماسىمەن قازاق حاندىعىنىڭ 550 جىلدىعىنا وراي قازاق بيلەرى مەن حاندارى اتىنان تۇڭعىش رەت بادەل قاجىلىق ۇيىمداستىرىلعان بولاتىن.

وسى ورايدا ەلىمىزدىڭ تاريحىندا ايرىقشا ورنى بار، ارعى تەگى اق وردانىڭ نەگىزىن قالاعان وردا ەجەن حاننان باستاۋ الاتىن قازاق ورداسىنىڭ تاريحىنداعى ەڭ ۇلى حانداردىڭ ءبىرى - ابىلاي حان اتىنان بادەل قاجىلىق جاساۋ تۇركىستان وبلىسى باس يمامىنىڭ ورىنباسارى مۇحامەدجان ەستەمىروۆكە جۇكتەلگەن.

ۇلى حاننىڭ مۇسىلماندىق پارىزىن وتەۋ جولىندا ۇلى اماناتتى موينىنا العان مۇحامەدجان جامانتاي ۇلى تۇلعاعا تيەسىلى قاجىلىق كيىم ابىلاي حان مۇرالارىمەن بىرگە بولعانىن ءجون ساناپتى.

«ازىرەت سۇلتان» مەملەكەتتىك تاريحي-مادەني قورىق-مۋزەيى ديرەكتورىنىڭ مىندەتىن اتقارۋشى ەرسىن تاجىبايەۆ مۋزەي قورىنا تاپسىرىلعان قۇندى مۇرانى زور قۋانىشپەن قابىل العانىن جەتكىزە وتىرىپ مۇحامەدجان جامانتاي ۇلىنا العىس ءبىلدىردى.

بادەل دەگەنىمىز - بۇرىن قاجىلىققا بارىپ كەلگەن ادامنىڭ وزگە ادامنىڭ اتىنان جاسالاتىن قاجىلىعى. مال دۇنيەسى بولا تۇرا دەنساۋلىعى، قارتتىعى سەبەپتى نەمەسە وتكەن بابالارىنىڭ اتىنان بارۋعا رۇقسات ەتىلگەن. شاريعات بويىنشا ءبادال قاجىلىقتى ءدىني ءبىلىمى بار ادامنىڭ نەمەسە يمامداردىڭ اتقارعانى ابزال دەلىنەدى. يحرام كيىمى - قاجىلىقتىڭ ءبىر پارىزى بولىپ سانالادى.

يحرام ەكى بولىكتەن تۇراتىن ماتا. ياعني ۇستىنگى جاعى «ريدا»، ال تومەنگى ماتانى «يزار» دەپ اتالادى.

ايتا كەتسەك، تۇركىستان - ابىلاي حاننىڭ بيلىك قۇرعان، اق كيىزگە كوتەرىلىپ حان سايلانعان، ماڭگىلىك تىنىس تاپقان مەكەنى. ابىلاي حاننىڭ قابىرى قوجا احمەت ياساۋيدىڭ سول جاق تۇسىندا جاتىر. سونداي-اق، قوجا احمەت ياساۋي كەسەنەسىندە ابىلاي حاننىڭ بايبىشەسى قاراشاشتىڭ، ابىلاي حاننىڭ ۇلى قاسىم سۇلتاننىڭ، ابىلاي حاننىڭ نەمەرەسى بوپاي قاسىم قىزى جەرلەنگەن.


سوڭعى جاڭالىقتار