ەلىمىزدە ورمان كارتالارى سيفرلاندىرىلىپ جاتىر

نۇر-سۇلتان. قازاقپارات - قازاقستاندا ورماندى زاڭسىز كەسۋ فاكتىلەرى عارىشتىق مونيتورينگ ارقىلى انىقتالىپ جاتىر.

بۇل تۋرالى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ق ر سيفرلىق دامۋ، قورعانىس جانە اەروعارىش ونەركاسىبى مينيسترلىگى اەروعارىش كوميتەتىنىڭ ءتوراعاسى باۋبەك ورالماعامبەتوۆ ءمالىم ەتتى، دەپ حابارلايدى قازاقپارات ءتىلشىسى.

«ەكولوگيا مينيسترلىگىنە قاراستى ورمان شارۋاشىلىعى جانە جانۋارلار دۇنيەسى كوميتەتىمەن بىرلەسىپ ەلىمىزدەگى ورمان كارتالارى سيفرلاندىرىلدى. وزدەرىڭىز بىلەتىندەي ورمان قورى مەملەكەتتىڭ باقىلاۋىندا جانە ول عارىشتىق مونيتورينگ ارقىلى جۇزەگە اسىرىلادى. بىزدەگى بار قازىرگى دەرەكتەر بويىنشا قازاقستاندا 18,6 ميلليون گەكتار ورمان القابى بار. عارىشتىق مونيتورينگ ارقىلى ورماندى باقىلاپ قانا قويماي، ءورت قاۋپىنىڭ الدىن الۋعا دا بولادى. سوندىقتان دا ەلىمىزدەگى ورمان كارتالارى سيفرلاندىرىلدى. سونداي-اق، ورمانعا قاتىستى ەكىنشى پروبلەما، ول زاڭسىز اعاش كەسۋ. ەندىگى ۋاقىتتا بۇل قۇقىقبۇزۋشىلىقتى دا عارىشتىق مونيتورينگ ارقىلى قاداعالاۋعا مۇمكىندىك بار»، - دەدى باۋبەك ورالماعامبەتوۆ.

كوميتەت باسشىسىنىڭ ايتۋىنشا، ەلىمىزدە ورمان كەسۋ پروتسەسى عارىشتىق مونيتورينگ ارقىلى تىركەلەدى. ال ونىڭ قانشالىقتى زاڭدىلىعىن قۇزىرلى ورگاندار انىقتاي جاتادى.

«ءبىز عارىشتىق مونيتورينگ ناتيجەسىن ياعني دەرەكتەردى قۇزىرلى ورگاندارعا جىبەرەمىز. ودان ارعى ءىستى وزدەرى قولعا الادى. بيىلعى ورمان رەسۋرستارى مونيتورينگىنە كەلسەك. ەلىمىزدە جالپى اۋدانى 18,6 ميلليون گەكتار ورماننىڭ ۆەكتورلىق كارتاسى سيفرلاندىرىلدى. سونىمەن قاتار 2641 اعاش كەسۋ پوليگونى انىقتالدى. جانە 90 مىڭ گەكتار ءورت وشاعى بەلگىلەندى»، - دەيدى ول.