مەملەكەت باسشىسى وزبەكستان پرەزيدەنتىمەن شاعىن قۇرامدا كەلىسسوز وتكىزدى - فوتو

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ وزبەكستان پرەزيدەنتى شاۆكات ميرزيەيەۆپەن شاعىن قۇرامدا كەلىسسوز وتكىزدى، دەپ حابارلايدى قازاقپارات اقورداعا سىلتەمە جاساپ.

اقوردا سارايىندا قازاقستان استاناسىنا مەملەكەتتىك ساپارمەن كەلگەن وزبەكستان پرەزيدەنتى شاۆكات ميرزيەيەۆتى سالتاناتتى قارسى الۋ ءراسىمى ءوتتى. قۇرمەت قاراۋىلى روتاسىنىڭ باستىعى مەملەكەتتەر باسشىلارىنا راپورت بەرگەننەن كەيىن ەكى ەلدىڭ ءانۇراندارى ورىندالدى.

بۇدان كەيىن قاسىم-جومارت توقايەۆ پەن شاۆكات ميرزيەيەۆ شىعىس زالىندا شاعىن قۇرامدا كەلىسسوز وتكىزدى.

قازاقستان مەن وزبەكستان باسشىلارى ەكىجاقتى ستراتەگيالىق سەرىكتەستىكتىڭ كەڭ اۋقىمدى ماسەلەلەرىن تالقىلادى.

اتاپ ايتقاندا ساياسي، ساۋدا- ەكونوميكالىق، ينۆەستيتسيالىق، كولىك ترانزيتتىك، مادەني- گۋمانيتارلىق ىنتىماقتاستىق سياقتى نەگىزگى اسپەكتىلەر قاراستىرىلدى. سونداي-اق ايماقتاعى، سونىڭ ىشىندە، قاۋىپسىزدىكتى قامتاماسىز ەتۋ جانە كوپجاقتى قۇرىلىمدار اياسىنداعى ءوزارا ءىس- قيمىل ماسەلەلەرى ءسوز بولدى.

قاسىم-جومارت توقايەۆ قازاق- وزبەك ىنتىماقتاستىعىن جاڭا دەڭگەيگە كوتەرۋ تۇرعىسىنان، شاۆكات ميرزيەيەۆتىڭ قازاق جەرىندە ءوتىپ جاتقان مەملەكەتتىك ساپارىنىڭ ماڭىزدى ەكەنىن اتاپ ءوتتى.

- ءبىز بۇگىن وداقتاستىق قاتىناستار تۋرالى دەكلاراتسياعا قول قويامىز. بۇعان دەيىن ستراتەگيالىق سەرىكتەستىك قاعيدالارىنا سۇيەنىپ كەلگەن بولساق، الداعى ۋاقىتتا ءبىزدىڭ ءوزارا قارىم- قاتىناستارىمىز شىن مانىندەگى جاڭا دەڭگەيگە كوتەرىلەدى. سوندىقتان بۇگىن قول قويىلاتىن قۇجاتتار ەلدەرىمىزدىڭ اراسىنداعى ىنتىماقتاستىققا تىڭ سەرپىن بەرەدى دەپ ەسەپتەيمىن. ءبىز ۇكىمەتتەرىمىزگە جاقىن ارادا ساۋدا كولەمىن 3 ميلليارد دوللارعا، كەيىنىرەك 10 ميلليارد دوللارعا دەيىن جەتكىزۋ تۋرالى تاپسىرما بەرۋگە ۋاعدالاستىق. بۇل وتە جوعارى دەڭگەي، - دەدى مەملەكەت باسشىسى.

قازاقستان پرەزيدەنتى ايماقتاعى تۇراقتىلىق پەن قاۋىپسىزدىكتى قامتاماسىز ەتۋ ىسىندەگى ەكى مەملەكەتتىڭ ءرولى تۋرالى ايتتى. - ەلدەرىمىز اراسىنداعى وداقتاستىق، ستراتەگيالىق قارىم- قاتىناستار - ورتالىق ازيا ايماعىنداعى تۇراقتىلىق پەن قاۋىپسىزدىكتى قامتاماسىز ەتۋدىڭ ماڭىزدى فاكتورى. بۇل ەشقانداي ارتىق ايتقاندىق ەمەس. ەكى ەل اراسىنداعى بايلانىستار قانشالىقتى تىعىز بولسا، ءبىزدىڭ ماڭىزدى ايماقتاعى احۋال دا سونشالىقتى تۇراقتى بولادى، - دەدى قاسىم-جومارت توقايەۆ.

شاۆكات ميرزيەيەۆ قازاق جەرىندە كورسەتىلگەن ءداستۇرلى قوناقجايلىق ءۇشىن ريزاشىلىعىن ءبىلدىرىپ، ءوزىنىڭ جانە وزبەك حالقىنىڭ اتىنان قاسىم-جومارت توقايەۆتى جانە قازاقستان حالقىن تاۋەلسىزدىكتىڭ 30 جىلدىق مەرەيتويىمەن قۇتتىقتادى. وزبەكستان باسشىسى قازاقستان پرەزيدەنتىنىڭ باسشىلىعىمەن ەلىمىزدىڭ جەتكەن جەتىستىكتەرىن جوعارى باعالادى. سونداي-اق ول ەكىجاقتى قاتىناستاردىڭ دامۋىنا ەلباسى نۇرسۇلتان نازاربايەۆتىڭ زور ۇلەس قوسقانىن اتاپ ءوتتى. وزبەكستان پرەزيدەنتى ءوزىنىڭ مەملەكەتتىك ساپارى قازاقستان تاۋەلسىزدىگىنىڭ 30 جىلدىعى قارساڭىندا ءوتىپ جاتقانىنىڭ سيمۆولدىق ءمانى بار ەكەنىن ايتتى.

ول ەكى ەل حالىقتارىنىڭ اراسىنداعى عاسىرلار بوي قالىپتاسقان دوستىق قارىم- قاتىناستار مەملەكەتارالىق بايلانىستاردى نىعايتۋعا زور سەپتىگىن تيگىزەتىنىنە سەنىم ءبىلدىردى. سونداي- اق ەكى ەل ۇكىمەتتەرىنىڭ وسى ساپار قارساڭىندا اتقارعان ناتيجەلى جۇمىستارىن اتاپ ءوتتى.