«الپامىس» وپەراسى جىل پرەمەراسى اتاندى
شەتەلدىك جانە وتاندىق تەاتر سىنشىلارى 3-جانە 4-جەلتوقساندا مادەنيەت جانە سپورت مينيسترلىگىنىڭ قولداۋىمەن «استانا وپەرا» ساحناسىندا ۇسىنىلعان وپەرالىق كلاسسيكا ءىنجۋ- مارجانىن جوعارى باعالادى. قويىلىم توبى سپەكتاكلگە كورەرمەن اۋديتورياسىنىڭ زاماناۋي قاجەتتىلىكتەرىمەن ۇندەس جاڭا دەم بەردى. ۇلتتىق كلاسسيكانىڭ مۇلدەم كۇتپەگەن فەنتەزي ستيلىندە ۇسىنىلۋى قازاقستاندىق وپەرا ونەرىنىڭ تۇتاستاي دامۋ تاريحىنداعى العاشقى تاجىريبە بولسا كەرەك. قويىلىم وتە كورىنىستى، تەحنولوگيالىق بولىپ شىققان، سوندىقتان كورەرمەن قاۋىم ونى جاندى ورىنداۋداعى تولىقمەتراجدى فيلم رەتىندە قابىلدادى. بۇل رەتتە پروەكسيالار بويىنشا يتاليالىق ديزاينەر سەردجيو مەتالليدىڭ جۇمىسى وراسان زور ءرول اتقاردى، ونىڭ شەبەرلىگىنىڭ ارقاسىندا ساحنا تورىندە وت جالىندادى، قۇستار ۇشتى، دالا تابيعاتى مەن حان سارايىنىڭ كەرەمەت كورىنىستەرى جاندانا ءتۇستى.
سوفيا تاسماعامبەتوۆا مەن پاۆەل دراگۋنوۆتىڭ دەكوراتسيالارى مەن كوستيۋمدەرى ءستيلى جاعىنان «استانا وپەرا» ساحناسىندا سۋرەتشىلەرمەن جۇزەگە اسىرىلعان الدىڭعى 7 جۇمىستان وزگەشەلەندى. ولار وپەرا- فەنتەزي ءۇشىن قىزىقتى شەشىمدەر تاپتى جانە سپەكتاكلگە كۇردەلى دەكوراتسيا ەلەمەنتتەرىن ەنگىزدى، ولاردىڭ ىشىندە ءوزىنىڭ تۇرلەنۋىمەن اسەر ەتەتىن كوپفۋنكتسيالى كەنەپ بار. ءتورت ءجۇز ءتۇرلى كوستيۋم سان الۋان ماعىنا بەردى - مىنە، تايشىق حاننىڭ جاۋ تايپاسى، ول كۇڭگىرت تۇستە بەرىلگەن، ال مىناۋ ۇلتتىق ناقىشتى جەتكىزەتىن ۇلتتىق كوستيۋمدەر.
جالپى العاندا، تۇتاستاي قويىلىم نىشاندارعا تولى، سولاردىڭ ەڭ باستىسى - الپامىسقا جاۋدى جەڭسىن دەپ جەر انا ۇسىنعان سەمسەر. كاۋكەن كەنجەتايەۆتىڭ ليبرەتتوسىندا قاھارماندىق ەپيزودتاردىڭ كوپتىگىنە قاراماستان، ليريكالىق تاقىرىپتار شايقاستاردان، باسقىنشىلىقتاردان ۇستەم بولدى جانە يۋ. الەكساندروۆتىڭ رەجيسسەرلىك نۇسقاسىنداعى باس كەيىپكەرلەردىڭ ماحاببات كورىنىستەرى ءسۇيسىندىردى. بۇل جاعىنان الپامىس، گۇلبارشىن، قاراگوزدىڭ دۋەتتەرى كەرەمەت شىقتى.
اتالمىش شىعارماداعى نەگىزگى كەيىپكەر - جەر انا - اۋليەلىكتىڭ نىشانى، ول قويىلىمعا اۋقىمدىلىق ۇستەدى، وسى ارقىلى مۇنىڭ تۇرمىستىق وپەرا ەمەستىگى ۇعىنىقتى بولدى. باتىردىڭ حالىققا باقىت اكەلىپ، جارقىن بولاشاققا دەگەن ءۇمىت وتىن جاندىراتىن ەرلىكتەرىنە بايلانىستى ميفولوگيا ەلەمەنتتەرى باعىندىرار بيىك بەلەستەرى بار بۇگىنگى شىنايى ومىرمەن بەلگىلى ءبىر دارەجەدە ۇشتاستى.
رەجيسسەردىڭ تاعى ءبىر تابىسى - وقيعا جەلىسىنىڭ اقىن- جىراۋ اۋزىنان باياندالۋى، ونى ەرلان رىسقالي ورىندادى. قويۋشى رەجيسسەر ءوز رولدەرىنە جان- تانىمەن بەرىلىپ، بويىنداعى دارىنىنىڭ جاڭا قىرلارىن پاش ەتكەن ورىنداۋشىلارمەن وراسان زور جۇمىس ىستەدى. الپامىس پارتياسىن ەرجان سايپوۆ پەن راسۋل جارماعامبەتوۆ تاماشا سومداپ شىقتى. انشىلەردىڭ جاس، تارتىمدى ەنەرگياسى كورەرمەن زالىنا تارالدى، ارتىستەر وزدەرىنىڭ ۆوكالدىق ءارى اكتەرلىك مىندەتتەرىن ءمىنسىز اتقاردى. بۇل سپەكتاكلدە يۋريي الەكساندروۆ ءتورت بەينەمەن ايەلدەر تاقىرىبىن كەڭىنەن اشتى.
قاراگوز - كەرەمەت سوپرانو سالتانات احمەتوۆا مەن بولاشاعى جارقىن ءانشى اسەم سەمبينا جاۋاپسىز ماحاببات ءۇشىن ەرلىككە بەل بۋدى. انشىلەر ءوز كەيىپكەرىن شەكسپير دراماسىنا ءتان پاش ەتتى. گۇلبارشىن بەينەسىن ساحنادا ايگۇل نيازوۆا مەن جاميليا جارقىمبايەۆا سومدادى، ءاربىر ءانشىنىڭ وزىندىك ماحاببات تاريحى بولدى، ارتىستەر تاعدىردىڭ بارلىق قيىنشىلىعى مەن اۋىرتپالىعىن باستارىنان وتكەردى. سيقىرعا تولى ءۇشىنشى ايەل كەيىپكەر - مىستاندى - بيبىگۇل جانۇزاق پەن گۇلجانات ساپاقوۆا مانەرلى جەتكىزدى. جەر انا - سالتانات مۇراتبەكوۆا، تاتيانا ۆيتسينسكايا - وسى ءبىر قيىن ءرولدى التى مەترلىك بيىكتىكتە تۇرىپ كەرەمەت ورىنداپ شىقتى. جاعىمسىز كەيىپكەر تايشىق حاندى جانات شىبىقبايەۆ، شىڭعىس راسىلحان وتە شىنايى سومدادى، زالداعى كورەرمەن ونىڭ قاتىگەزدىگىنە بىردەن سەندى. سونداي- اق كەيقۋات - ءاليحان زەينوللا، ابىلاي بەكەن، قارامان - بەيىمبەت تاڭارىقوۆ، ۇلتان - رامزات بالاكيشييەۆ تە ءوز پارتيالارىن تاماشا ورىندادى.
پارتيتۋرا بويىنشا عالامات جۇمىس جاساعان قويۋشى ديريجەر ابزال ءمۇحيتديننىڭ جەتەكشىلىگىمەن «استانا وپەرا» سيمفونيالىق وركەسترىنىڭ ورىنداۋىندا ناعىز تەاتر كومپوزيتورى ەركەعالي راحمادييەۆتىڭ قوسالقى ماتىندەرى مەن كەيبىر ەرەكشەلىكتەرىنە قانىق تاڭداۋلى مۋزىكاسى جاڭا بوياۋلارعا يە بولدى. بۇل سپەكتاكلدە حور مەن بالەتتىڭ قاتىسۋىمەن وتەتىن كوپشىلىك كورىنىستەر جاڭاشىل ءارى سەرپىندى كورىندى، ءار قيمىلدى قويۋشىلار، ولاردىڭ قاتارىندا باس حورمەيستەر ەرجان ءداۋىتوۆ، قويۋشى بالەتمەيستەرلەر تۇرسىنبەك نۇرقالييەۆ پەن عاليا بورىبايەۆا جاقسى ويلاستىرعان. ءسىرا، كومپوزيتوردىڭ قىزى نايليا راحمادييەۆا كەڭەسشى بولعاندىقتان، وپەرانىڭ مۋزىكالىق بولىگى ەڭ جوعارى دەڭگەيدە ۇسىنىلدى. الپامىس تۇتقىننان بوساپ شىعىپ، جاۋىز حاندى تاقتان تايدىراتىن جانە جاقسىلىق جەڭىسكە جەتەتىن مىقتى، ساۋاتتى قۇرىلعان فينال شىن مانىندە سالتاناتتى بولدى. قويىلىم ءبىر دەمدە ءوتتى، تەاتر سۇيەر قاۋىمنىڭ پىكىرىنشە، ول جىل پرەمەراسى دەپ تانىلدى.