قازاق جاستارى تۇركيا ۋنيۆەرسيتەتىندە ءدىني ءبىلىم الادى

نۇر- سۇلتان. قازاقپارات - تۇركيانىڭ ىستانبۇل قالاسىندا ق م د ب ءتوراعاسى، باس ءمۇفتي ناۋرىزباي قاجى تاعان ۇلى مەن مارمارا ۋنيۆەرسيتەتىنىڭ رەكتورى، پروفەسسور مۇستافا كۋرت ەكى جاقتى عىلىمي جانە مادەني ىنتىماقتاستىق تۋرالى مەموراندۋمعا قول قويدى، دەپ حابارلايدى قازاقپارات ءتىلشىسى.

اتالعان كەلىسىم قازاقستان مەن تۇركيا رەسپۋبليكاسى اراسىنداعى دوستىق قارىم- قاتىناستى نەگىزگە الا وتىرىپ، قازاقستان مۇسىلماندارى ءدىني باسقارماسى مەن مارمارا ۋنيۆەرسيتەتى اراسىنداعى دوستىق پەن ىنتىماقتاستىقتى ارتتىرۋ جانە ءدىني ءبىلىم بەرۋ سالاسىندا جان- جاقتى قولداۋ كورسەتۋگە باعىتتالعان.

«كەلىسىم اياسىندا ق م د ب ءدىني ءبىلىم الۋعا نيەتتى قازاقستاندىق تالاپكەرلەردى مارمارا ۋنيۆەرسيتەتىنە جولداي الادى. ەلىمىزدەگى نۇر- مۇباراك مىسىر يسلام مادەنيەتى ۋنيۆەرسيتەتىنىڭ وقىتۋشىلارى مەن مارمارا ۋنيۆەرسيتەتىنىڭ وقىتۋشىلار قۇرامى اراسىندا ءوزارا تاجىريبە الماسۋ ماقساتىندا كەزدەسۋلەر مەن كۋرستار ۇيىمداستىرۋ كوزدەلەدى. دارىستەر مەن سەمينارلار ۇيىمداستىرۋ ءۇشىن بىلىكتى ءدىن عالىمدارىمەن تاجىريبە الماسۋ دا وسى كەلىسىم اياسىندا جۇزەگە اسادى. اتالعان مەموراندۋم قول قويىلعان كۇننەن باستاپ 5 جىلعا دەيىن كۇشىندە بولادى»، - دەپ ءمالىم ەتتى ق م د ب باسپا ءسوز قىزمەتىنەن.

ەكىجاقتى كەزدەسۋ بارىسىندا تاراپتار ءدىني بىلىمنەن بولەك الەۋمەتتىك پاندەردى دە دامىتۋ تۋراسىندا كەلىسىمگە كەلدى. بۇگىندە بۇل ۋنيۆەرسيتەتتە 124 قازاقستاندىق شاكىرت ءبىلىم الۋدا. ال جالپى العاندا وقۋ ورداسىندا 80 مىڭ ستۋدەنت بار.

اۆتور: مارلان جيەمباي