قازاقستاندا بەسىنشى اپتا قاتارىنان الەۋمەتتىك ماڭىزى بار ازىق- تۇلىك باعاسىنىڭ نولدىك ءوسىمى تىركەلدى

نۇر- سۇلتان. قازاقپارات – ق ر پرەمەر- ءمينيسترى اسقار مامين ۇكىمەتتىڭ سيفرلىق كەڭسەسىندە ورتالىق مەملەكەتتىك ورگاندار باسشىلارىنىڭ جانە وڭىرلەر اكىمدەرىنىڭ قاتىسۋىمەن الەۋمەتتىك ماڭىزى بار ازىق- تۇلىك تاۋارلارىنىڭ (ءا م ا ت) باعالارىن رەتتەۋ ماسەلەلەرى جونىندە كەڭەس وتكىزدى،

دەپ حابارلايدى قازاقپارات ق ر پرەمەر- ءمينيسترىنىڭ رەسمي سايتىنا سىلتەمە جاساپ.

قازىرگى جاعداي مەن اتقارىلىپ جاتقان جۇمىستار تۋرالى ساۋدا جانە ينتەگراتسيا ءمينيسترى باقىت سۇلتانوۆ، اۋىل شارۋاشىلىعى ءمينيسترى ەربول قاراشوكەيەۆ، باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى سەرىك جۇمانعارين باياندادى.

بيىلعى قاراشادا قابىلدانعان شارالار ەسەبىنەن ازىق- تۇلىك ينفلياتسياسىنىڭ ءوسۋ قارقىنى جىلدىق ماندە 0,4 پايىزدىق تارماققا % 0,9- عا دەيىن، ال جالپى ينفلياتسيادا 0,2 پايىزدىق تارماققا % 8,7- عا دەيىن تومەندەدى. وتكەن اپتادا قازاقستاندا الەۋمەتتىك ماڭىزى بار ازىق- تۇلىك تاۋارلارى باعاسىنىڭ جالپى ءوسۋ يندەكسى % 0,0- دى قۇرادى. 15 وڭىردە باعانىڭ ءوسۋى تىركەلگەن جوق، 3 وڭىردە: نۇر- سۇلتان قالاسىندا % 0,2- عا، پاۆلودار جانە ماڭعىستاۋ وبلىستارىندا % 0,1- عا باعانىڭ تومەندەۋى بايقالادى.

بەسىنشى اپتا قاتارىنان قاراقۇمىق (-%0,6) ، قانت، ءسابىز، تاۋىق ەتى مەن كۇرىش (-%0,1) باعاسىنىڭ تومەندەۋى بايقالادى. قالعان ونىمدەردىڭ باعالارى تۇراقتى. «اينالىم سحەماسىن» قارجىلاندىرۋدىڭ نىسانالى دەڭگەيى ەل بويىنشا % 99,4- عا قامتاماسىز ەتىلدى.

«اينالىم سحەماسى» بويىنشا العا قويىلعان مىندەتتەر نۇر- سۇلتان، الماتى جانە شىمكەنت قالالارىندا، الماتى، شىعىس قازاقستان، جامبىل، باتىس قازاقستان، قوستاناي، پاۆلودار، سولتۇستىك قازاقستان جانە تۇركىستان وبلىستارىندا ورىندالدى. قىزىلوردا جانە ماڭعىستاۋ وبلىستارىندا جۇرگىزىلىپ جاتقان جۇمىستاردىڭ تومەن دەڭگەيى تىركەلدى. وتكەن اپتادا باسەكەلەستىكتى قورعاۋ جانە دامىتۋ اگەنتتىگى قوستاناي جانە الماتى وبلىستارىنداعى روجكي، ۇن، قۇس ەتى نارىعى سۋبەكتىلەرىنىڭ اتىنا باعالىق ءسوز بايلاسۋ جانە ۇستەم جاعدايدى تەرىس پايدالانۋ بەلگىلەرىنىڭ بولۋى تۋرالى 6 ەسكەرتۋ جىبەردى.

ماڭعىستاۋ، شىعىس قازاقستان جانە اتىراۋ وبلىستارىندا وندىرۋشىلەرمەن، كوتەرمە جەتكىزۋشىلەرمەن جانە ساۋدا جەلىلەرىمەن ساۋدا ۇستەمەسىن % 15- دان % 10- عا دەيىن تومەندەتۋ تۋرالى مونوپولياعا قارسى كومپلاەنستىڭ 23 اكتىسى جاسالدى. جالپى، رەسپۋبليكا بويىنشا مونوپولياعا قارسى كومپلاەنستىڭ 183 اكتىسى جاسالدى.

پرەمەر- مينيستر ورتالىق مەملەكەتتىك جانە جەرگىلىكتى اتقارۋشى ورگاندارعا قولدانىستاعى بارلىق قۇرالداردى پايدالانۋ ارقىلى الەۋمەتتىك ماڭىزى بار ازىق- تۇلىك ونىمدەرىنىڭ باعاسىن تۇراقتاندىرۋ جانە تومەندەتۋ شارالارىن ودان ءارى ورىنداۋدى تاپسىردى. وڭىرلەردىڭ اكىمدىكتەرىنە تۇراقتاندىرۋ قورلارىندا بەس ايلىق ازىق- تۇلىك قورىن قالىپتاستىرۋ، ازىق- تۇلىك ونىمدەرىنە شەكتى باعالاردى بەلگىلەۋ، سونداي- اق دەلدالدىق سحەمالاردى تەكسەرۋ جونىندەگى وڭىرلىك كوميسسيالاردىڭ قىزمەتىن جانداندىرۋ تاپسىرىلدى.