ەلىمىزدەگى ەڭ جاس ۆولونتەر الماتى وبلىسىندا تۇرادى

پاۆلودار. قازاقپارات - بۇگىن «قايىرىمدى ىستەر مارافونى» ۇلتتىق جوباسى اياسىندا ۇيىمداستىرىلعان «ەڭ مەيىرىمدى» بايقاۋىننىڭ جەڭىمپازدارى ماراپاتتالدى، دەپ حابارلايدى قازاقپارات ءتىلشىسى.

اتالعان بايقاۋدىڭ «ەڭ مەيىرىمدى ۆولونتەر» اتالىمى بويىنشا، «جانا دۇنيە» قوعامدىق قورى (الماتى قالاسى) I ورىن الدى. II ورىندى الماتى وبلىسىندا تۇراتىن جاس ۆولونتەر سانجار ءىلياسوۆ يەلەنسە، جۇلدەلى III ورىن CCI Kazakhstan («ت و و س پ كوكا-كولا الماتى بوتتلەرس») كومپانياسىنا بۇيىردى.

ايتا كەتەيىك وسى جوباداعى ەڭ جاس «مەيىرىمدى ۆولونتەر» سانجار ساليحات ۇلى 2005-جىلى تۋعان.

الماتى وبلىسى سارقان اۋدانى سارقان پوليتەحنيكالىق كوللەدجىنىڭ 2-كۋرس ستۋدەنتى. ول «ءبىز بىرگەمىز!»، «ەرىكتى بولۋ - ەرلىك»، «2020-جىل - ەرىكتىلەر جىلى»، «تازا قالا» اكسيالارىنا پاندەميا كەزىندە جانە قازىر دە قاتىسىپ، ءوز قاتارلاستارىنا ۇلگى بولىپ ءجۇر.

«ەرىكتىلەر دەگەن كىم؟ ەرىكتىلەر - قوعامنىڭ قوزعاۋشى قۋاتى. سونىمەن قاتار جاساعان جاقسىلىعى مەن اتقارعان جۇمىسى ءۇشىن اقى سۇرامايتىن جاندار. مەن ءاردايىم قولدان كەلگەن كومەگىمدى ەلدەن ايامايمىن، ەلگە كومەكتەسسەم جانىم جادىرايدى. ءبىز ۇستازدارىمىزدىڭ جەتەكشىلىگىمەن سارقان قالاسىنىڭ ارداگەرلەرىنە، كوپبالالى جانە از قامتىلعان وتباسىلارعا كومەكتەسىپ، قالا كوشەلەرىن اباتتاندىرۋ، تازالاۋ جۇمىسىنا بەلسەنە قاتىسىپ كەلەمىز. ەرىكتى بولۋ - جۇرەكتىڭ قالاۋى. قارت ادامدارعا، جارتىلاي جەتىم، مۇگەدەك ادامنىڭ مۇقتاجدىعىن ءتۇسىنىپ، ءبىر جاعىنا شىعىسىپ كومەكتەسۋدى - بورىشىم دەپ بىلەمىن»، - دەيدى سانجار.

اۆتور: ريزابەك نۇسىپبەك ۇلى