USD 429.57 EUR 447.35
RUB 6.94 CNY 63.23
جاڭالىقتار

استانادا سالىنىپ جاتقان مەكتەپتەردىڭ كوبى نەگە الماتى اۋدانىندا - اكىم جاۋاپ بەردى

3 جەلتوقسان 18:58
:ءبولىسۋ
استانادا سالىنىپ جاتقان مەكتەپتەردىڭ كوبى نەگە الماتى اۋدانىندا - اكىم جاۋاپ بەردى

نۇر-سۇلتان. قازاقپارات - ەلوردادا بوي كوتەرىپ جاتقان مەكتەپتەردىڭ كوبى نەگە الماتى اۋدانىندا عانا سالىنىپ جاتىر؟

نۇر-سۇلتان قالاسىنىڭ اكىمى التاي كولگىنوۆكە ورتالىق كوممۋنيكاتسيالار قىزمەتىندە وتكەن بريفينگىدە وسىنداي سۇراق قويىلدى، دەپ حابارلايدى قازاقپارات ءتىلشىسى.

«59№ مەكتەپ قازىر ءۇش اۋىسىممەن وقىپ جاتىر. «پوكولەنيە» تۇرعىن ءۇي كەشەنىنىڭ تۇرعىندارى تاراپىنان بىرنەشە سۇراق بولعان. ءبىرىنشىسى مەكتەپ سالۋعا قاتىستى. 59№ مەكتەپتىڭ جانىنان قوسىمشا كورپۋس سالۋ بويىنشا جوبالىق سمەتالىق قۇجاتتامانى اياقتاپ قالدىق كەلەسى جىلدىڭ باسىندا قۇرىلىس-مونتاج جۇمىستارىنا كونكۋرس جاريالايمىز. ياعني، مەكتەپ سالىنادى»، - دەگەن التاي كولگىنوۆ اتالمىش «پوكولەنيە» تۇرعىن ءۇي كەشەنىنىڭ ماڭايىندا تاعى ءبىر مەكتەپ سالۋ تۋرالى ينۆەستورلارمەن كەلىسىم بار ەكەنىن اتادى.

«بۇل - جەكە ينۆەستوردىڭ جەكە مەنشىگىندەگى اۋماق. وندا دا جوبالىق-سمەتالىق قۇجاتتاما دايىندالىپ جاتىر. ونى دا كەلەسى جىلى سالىپ باستايمىز. تۇرعىندار وسى اۋداندا وقۋشىلار سارايىن سالۋدى سۇراعان بولاتىن. تاعى دا جەكە ينۆەستور قاراجاتىنا وقۋشىلار سارايىن سالامىز. قۇرىلىس مونتاج جۇمىستارى باستالىپ كەتتى»، - دەدى قالا اكىمى.

ونىڭ ايتۋىنشا، قالانى جوسپارلاۋ قاعيداتتارىنا تۇزەتۋ ەنگىزىلىپ وتىر.

«الماتى اۋدانىندا عانا مەكتەپ سالىنىپ جاتىر دەگەنگە كەلسەك، مىنانى ايتار ەدىم. ءبىز قالانىڭ باس جوسپارى مەن دەتالدى جوسپارىنا تۇزەتۋ ەنگىزدىك. قازىر جاڭا قۇرىلىس تۇسەتىن اۋداننىڭ ءارقايسىسىندا مەكتەپ، الەۋمەتتىك نىسانداردى، سپورت نىسانىن سالۋدى تالاپ ەتەمىز. ياعني، «الەۋمەتتىك نىساندار تۇرعىنداردان اياق اتتام جەردە بولۋى كەرەك» دەگەن قاعيدا ۇستانامىز. باسپانا كوپ سالىناتىن اۋماقتىڭ ءوز مەكتەبى، مەديتسينالىق نىسانى، سپورت نىسانى، ساۋدا ورىندارى، بالاباقشاسى، قوعامدىق كەڭىستىگى بىرگە قاراستىرىلۋى كەرەك. «نۇر-سۇلتان - جايلى قالا» جوباسىنىڭ ماقساتى دا وسى»، - دەدى التاي كولگىنوۆ.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات