«احمەت. ۇلت ۇستازى» سەريالى نەگە تورعاي مەن ورىنبوردا تۇسىرىلگەن جوق

نۇر-سۇلتان. قازاقپارات - بەلگىلى رەجيسسەر مۇرات ەسجان قازاقپارات تىلشىسىنە «احمەت. ۇلت ۇستازى» تەلەحيكاياسىن ءتۇسىرۋ كەزىندە جولىققان قيىندىقتار تۋرالى ايتىپ بەردى.

«ءبىزدىڭ عىلىمي كەڭەسشىمىز - الماتىداعى احمەت بايتۇرسىن ۇلى مۇراجايىنىڭ ديرەكتورى، عالىمعا ارناپ «عاسىر ساڭلاعى» دەگەن كىتاپ جازعان رايحان يماحامبەتوۆا. كوركەمدىك كەڭەسشىمىز ۇشقىن سايدراحمان ۇلى دەگەن الاشتانۋشى بولدى. سەناري جازىلعان كەزدە وسى كىسىلەر باستان-اياق قاسىمىزدا بولدى. سەناريدى بەلگىلى دراماتۋرگ، جازۋشى ۇلاربەك نۇرعالىم ۇلىمەن بىرىگىپ جازدىق. سەناري ءتۇزۋ بارىسىندا 50 شاقتى كىتاپ پايدالاندىق»، - دەدى كينو مامانى.

ونىڭ سوزىنە قاراعاندا، سەريال ءتۇسىرۋ كەزىندە احمەت بايتۇرسىن ۇلىنىڭ كوزىن كورگەندەردىڭ بولماۋى ونىڭ وبرازىن كەسكىندەۋدە ءبىراز قيىندىق تۋعىزعان.

«قيىندىق جاعىنا كەلسەك، احمەتتىڭ «ا» دەگەن ءارىبىن ايتۋعا تىيىم سالىنعان زامان بولدى. ونىڭ كوزىن كورگەندەر، قاسىندا وتىرىپ، اڭگىمەسىن تىڭداعان ادامداردىڭ كوبى قايتىس بولعاندىقتان ەستەلىكتەر جوق. ناقتى قالاي بولعانى جايلى قۇجاتتىق دەرەكتەر نەگىزىندە عانا الاش قايراتكەرىنىڭ ءومىرىن 6 سەرياعا سىيعىزۋعا تىرىستىق. ارينە، زەرتتەۋشىلەر اراسىندا ءبىر توقتامعا كەلە الماي جۇرگەن ماسەلەلەر بار. ءبىراق بىزدىكى دەرەكتى دۇنيە ەمەس. ءبىز سونىڭ ىشىندە كوركەمدىك شىندىققا، سەريالدىڭ دراماتۋرگياسىنا سايكەس كەلەتىن، سويتە تۇرا احمەت بايتۇرسىن ۇلىنىڭ تۇلعاسىنا كولەڭكە تۇسىرمەيتىن، كەرىسىنشە اشا تۇسەتىن دەرەكتەردى الدىق. جالپى احمەت - داۋ-داماي تۋدىراتىن قايشىلىقتى تۇلعا ەمەس قوي»، - دەيدى رەجيسەر.

ايتۋىنشا، سەريالعا لوكاتسيا رەتىندە كوبىنە الماتىنىڭ ماڭايىنداعى جەرلەر الىنعان. ال ورىنبور مەن تورعايداعى تاريحي نىسانداردى پايدالانباۋدىڭ وزىندىك سەبەپتەرى بار كورىنەدى.

«نەگىزگى لوكاتسيا - الماتى وبلىسى، جاركەنت، الماتى قالاسى بولدى. «نەگە تورعاي مەن ورىنبورعا بارمادىڭىزدار؟» دەگەن سۇراقتىڭ قويىلۋى زاڭدى شىعار. بىرىنشىدەن، قارجىلىق مۇمكىندىگىمىز كوتەرمەيتىن ەدى. قارجى تاپقان كۇننىڭ وزىندە ول جاقتا يەن دالادان باسقا ەشقانداي ينفراقۇرىلىم جوق. مىناۋ وسىنداي ىرگەتاس دەپ كورسەتەتىن دەرەكتى تۋىندى ەمەس قوي. تولىق دەكوراتسيا بولۋى كەرەك. سول ءۇشىن الماتىنىڭ ماڭايى ىڭعايلى بولدى. سەريال احمەت بايتۇرسىن ۇلىنىڭ ەل ىسىنە ارالاسقان كەزىنەن باستالادى. سەريال سيۋجەتىن ۇلى تۇلعانىڭ اعارتۋشىلىق، عالىمدىق، پۋبليتسيستىك قىرىن كورسەتۋ ءۇشىن ومىرىندەگى تەورەتيك عالىم جانە ساياسي قايراتكەر رەتىندە تانىتاتىن كەزەڭدەر مەن ەپيزودتاردان قۇراۋعا تىرىستىق»، - دەدى مۇرات ەسجان.