قىتايداعى قازاق جىگىتىنىڭ مەيرامحاناسى «بەيجىڭنىڭ ەڭ ءدامدى بۋرگەرلەرى» اتاعىن جەڭىپ الدى

نۇر- سۇلتان. قازاقپارات – قىتايلار - اس ءىشىپ، اياق بوساتۋشى عانا ەمەس، تاعامنىڭ ءدامىن كەلتىرىپ ونى قالاي دايىنداۋدىڭ دا اسقان شەبەرى. امانداسقانداعى سوزدەرىن اۋدارساق، تاماقتاندىڭ با دەگەندى بىلدىرەدى.

ءبىراق سول اس قادىرى مەن ونى دايىنداۋدا قيىننان قيىستىراتىن قالىڭ قىتايدىڭ اراسىندا قازاقتار دا بار. ياعني، سول كوپتىڭ ىشىندە ونەرىن اسىرىپ، ءدامدى بۋرگەرىمەن اتى شىققان وتانداسىمىز داۋلەت يسابەكوۆ بەيجىڭدە مەيرامحانا ۇستاپ وتىر.

داۋلەتتى كۇندە ءوز جۇمىس ورنىنان تاباسىڭ. قازاق جىگىتى قىتاي استاناسىنىڭ قاق ورتاسىنداعى مەيرامحانانىڭ ورتاق يەلەنۋشىسى. ءوز ايتۋىنشا، كاسىبىندە اتا- اناسىنىڭ ءتالىم - تاربيەسى مەن قازاقتىڭ قوناقجايلىعى كوپ كومەك بەرگەن. مۇنىڭ سىرتىندا باسەكە كوپ بولعاندىقتان تىنباي ەڭبەك ەتۋ قاجەت. بۇل دا ءوز جەمىسىن بەرىپ ءجۇر. بىلتىر مەيرامحانا «بەيجىڭنىڭ ەڭ ءدامدى بۋرگەرلەرى» اتاعىن جەڭىپ الدى.

داۋلەت يسابەكوۆ، بەيجىڭ قالاسىنداعى مەيرامحانا يەسى:

- وتە قۋاندىق. بۇعان جەتۋ ءۇشىن ۇزاق ۋاقىت كەتتى. قيىن بولدى، ويتكەنى بۇل ىندەت باستالعان جىل ەدى. كەيبىر مەيرامحانالار جابىلدى، ءبىراق ءبىزدىڭ جولىمىز بولدى. قوناقتارىمىزدىڭ سانى ەداۋىر ارتىپ، بەيجىڭدە اتىمىز شىقتى. ءبىزدى ءبارى بىلەدى جانە قالانىڭ وزگە اۋداندارىنان ارنايى بىزگە كەلەدى.

مەكتەپ بىتىرگەننەن كەيىن داۋلەت بەيجىڭدەگى ديپلوماتيالىق اكادەمياعا وقۋعا تۇسەدى. العاشىندا مەملەكەتتىك قىزمەتكە ورنالاسۋدى كوزدەگەن ەدى. ءبىراق كەيىن بيزنەسكە كوڭىلى اۋىپ، ءوز كاسىبىن اشتى. ءبىراق تابىس وڭاي جولمەن كەلمەيتىنىن بىلەدى. بىلتىر قىتايدا ىندەت ورشىگەن كەزدە تالاي قيىندىقتى باستان كەشكەنىن ەسكە الادى. ءدامحانالار جابىلىپ، تەك اس جەتكىزۋ قىزمەتىن وڭتايلى پايدالانۋدىڭ ارقاسىندا كاسىبىن دامىتا الدى. پاندەميا مەيرامحانانى باسقارۋ ەرەجەلەرىن دە وزگەرتتى.

داۋلەت يسابەكوۆ، بەيجىڭ قالاسىنداعى مەيرامحانا يەسى:

- بىردەن ەكپە سالدىق، بۇل مىندەتتەلگەن. ءبىزدى ءجيى تەكسەرىپ ءجۇردى. كوپتەگەن ورىنداردا اسءۇي اشىق بولۋى كەرەك. بىزدە اشىق بولماعاندىقتان، ىشىندە نە بولىپ جاتقانىن كورسەتەتىن كامەرالار ورناتىلعان. تازالىقتىڭ جاڭا ستاندارتتارىن ەنگىزدىك، قىزمەتكەرلەرىمىز كىرەبەرىستە QR- كودتى سكانەرلەۋى ءتيىس.

پاندەميا داۋلەتتىڭ ءومىرىن دە وزگەرتتى. جاقىندارىن كورمەگەنىنە - ەكى جىل. قىتاي ءالى كۇنگە دەيىن ەلگە كەلۋ ەرەجەلەرىن قاتاڭ ساقتاپ وتىر. قازىر داۋلەت بەيجىڭدە جاڭا مەيرامحانا اشۋعا دايىندالىپ جاتىر. ال بولاشاقتا قازاقستانعا ورالىپ، كاسىبىن ەلدە ورلەتسەم دەگەن ارمانى دا بار.

www.24.kz