تۇڭعىش پرەزيدەنت مۋزەيىندە قانداي زاتتار ساقتاۋلى تۇر - ۆيدەو

نۇر-سۇلتان. قازاقپارات - نۇر-سۇلتان قالاسىندا ورنالاسقان ق ر تۇڭعىش پرەزيدەنتى - ەلباسى كىتاپحاناسىنىڭ مۋزەيىندە ءتۇرلى ەكسپوزيتسيالار ساقتاۋلى، تاۋەلسىز قازاقستاننىڭ قالىپتاسۋى مەن دامۋ كەزەڭدەرىن بەينەلەيتىن بىرەگەي ەكسپوناتتار ۇسىنىلعان.

مۇندا ەلباسىنىڭ جەكە زاتتارى، مەملەكەت باسشىلارى تارتۋ ەتكەن سىيلىقتار مەن تاريحي راريتەتتەر جيناقتالعان، دەپ حابارلايدى قازاقپارات.

مۋزەيدە تاۋەلسىز قازاقستاننىڭ قالىپتاسۋى مەن دامۋىنىڭ نەگىزگى كەزەڭدەرىن ايشىقتايتىن بىرەگەي ەكسپوناتتار ۇسىنىلعان. ق ر تۇڭعىش پرەزيدەنتى - ەلباسى كىتاپحاناسىنىڭ مۋزەي قۇندىلىقتارىن ەسەپكە الۋ جانە ساقتاۋ قىزمەتىنىڭ باسشىسى كۇلايشا اقتايەۆا ديپلوماتيالىق سىيلىقتاردىڭ - ەلباسى نۇرسۇلتان نازاربايەۆتىڭ ساياساتىن باعالاۋ جانە مويىنداۋ ەكەنىن اتاپ ءوتتى.

ەكسپونات مۋزەيگە جەتكىزىلمەي تۇرىپ، مۇقيات زەرتتەلەدى. عيماراتتا ەلباسىنىڭ جەكە قالامسابىنان باستاپ، ءار ءتۇرلى جازبالار، تۇڭعىش پرەزيدەنت مىنگەن ۇلكەن كولىكتەرگە دەيىن ساقتالعان. اتاپ ايتقاندا، مۇندا 90-جىلداردىڭ سوڭىندا ن. نازاربايەۆ مىنگەن ارنايى بروندالعان Mercedes-تەر بار.

«بۇل ەكسپوناتتاردىڭ بارلىعى 15-20 جىل ىشىندە جينالعان جانە تاقىرىپتىق بولىمدەرگە بولىنگەن. الداعى ۋاقىتتا دا مۋزەيگە قانداي ەكسپونات تۇسەتىنىن، قاشان تۇسەتىنىن بىلمەيمىز. ءبىز وسىنىڭ بارىنە زەرتتەۋ جۇرگىزەمىز. كەلۋشىلەر مۋزەيدە ءتۇپنۇسقا ماتەريالدارمەن، مۇراعاتتىق مالىمەتتەرمەن تانىسادى. ال نۇرسۇلتان ءابىش ۇلىنا تارتۋ ەتىلگەن ديپلوماتيالىق سىيلىقتار ءاردايىم ارحيۆ قورىنا ءتۇسىپ تۇرادى. ءبىزدىڭ زالداردا ديپلوماتيالىق سىيلىقتار وتە كوپ. بۇل - تەك سىپايىلىقتىڭ بەلگىسى عانا ەمەس، باسقا مەملەكەتتەر مەن ۇكىمەتتەردىڭ باسشىلارىمەن دوستىق قارىم- قاتىناستىڭ، سونىڭ ارقاسىندا جۇزەگە اسىرىلعان ءساتتى بايلانىستاردىڭ تىكەلەي دالەلى»، - دەدى كۇلايشا اقتايەۆا.

مىسالى، مۋزەيدە ا ق ش-تىڭ بۇرىنعى پرەزيدەنتى دونالد ترامپ سىيعا تارتقان گولف تاياقشاسى مەن كىتاپ بار. ال گولف تاياقشاسى قالانىڭ وڭ جاعالاۋ اتالاتىن بولىگىندەگى مۋزەيگە تاپسىرىلدى.

«مۋزەيدەگى ديپلوماتيالىق سىيلىقتار نۇرسۇلتان نازاربايەۆ پەن قانداي دا ءبىر ەلدىڭ باسشىسى اراسىنداعى ماڭىزدى زياتكەرلىك جانە ەموتسيونالدىق بايلانىستىڭ ءبىر بولىگىنە اينالدى. ا ق ش پرەزيدەنتى دونالد ترامپ كەزدەسۋلەردىڭ بىرىندە وعان گولف جيىنتىعىن بەردى جانە ا ق ش- تاعى گولف الاڭدارىنىڭ تاريحىن سيپاتتايتىن ادەمى كىتاپ سىيلادى. ياعني، دونالد ترامپ ءوز ارىپتەسىنىڭ ارتىقشىلىقتارىن جاقسى زەرتتەپ، ارنايى سىيلىق دايىندادى. ال جەكە زاتتاردان ەلباسىنىڭ ۇلىقتاۋعا كيگەن كوستيۋمدەرى، قالامدارى، سپورتتىق كيىمدەرى مەن كەرەك-جاراقتارى بار»، - دەيدى ق. اقتايەۆا.

مۋزەيدىڭ حابارلاۋىنشا، كىتاپحانا قورىندا سيرەك كەزدەسەتىن، كوللەكسيالىق جانە ەسكى باسىلىمدار دا ساقتاۋلى. ونىڭ اراسىندا قازاقستاننىڭ تۇڭعىش پرەزيدەنتىنە ميلانداعى امبروزيان كىتاپحاناسى سىيعا تارتقان لەوناردو دا ۆينچيدىڭ ەسكيزدەرى بار البوم، ەلباسىنا قازاقستاندىق عارىشكەر ت. مۇسابايەۆ بەرگەن عارىشتا بولعان قۇران كىتابى، قاسيەتتى قۇران باسىلىمدارىنىڭ كوللەكسياسى، رەسەي يمپەراتورى الەكساندر II كىتاپحاناسىندا ساقتالعان ف. شلوسسەردىڭ «دۇنيەجۇزى تاريحى» ەڭبەگى، 1838 -جىلعى ەنسيكلوپەديالىق لەكسيكون جانە باسقا دا ەكسپوزيتسيالار بار.

ماسەلەن، مۋزەيدىڭ «داڭق گالەرەياسىندا» نۇرسۇلتان نازاربايەۆتىڭ جەتەكشىلىگىمەن قازاقستاننىڭ تابىستى جاھاندىق ساياساتىنىڭ كۋالىكتەرى جيناقتالعان. بۇل زالدا ديپلوماتيالىق سىيلىقتار، سۋىق قارۋ توپتاماسى جانە 50 دەن استام جوعارى مەملەكەتتىك جانە قوعامدىق ناگرادالاردان تۇراتىن ەرەكشە قۇندى ەكسپوناتتار بار.

دالىرەك ايتقاندا، ۇستەل ساعاتتارى، دۋلىعا، كادەسىيلار، گرافيندەر، كامين ساعاتتارى، توستاعاندار، ساندىك قۇمىرالار، كادەسىي تاباقتارى جانە ىدىس-اياق جيىنتىعى بار.

اۆتور: ايجان سەرىكجان قىزى