USD 424.84 EUR 453.6
RUB 7.3 CNY 63.91
جاڭالىقتار

موڭعوليادا قازاقستان دوستارى كلۋبىنىڭ وتىرىسى ءوتتى - فوتو

2 جەلتوقسان 10:06
:ءبولىسۋ
موڭعوليادا قازاقستان دوستارى كلۋبىنىڭ وتىرىسى ءوتتى - فوتو

ۇلانباتىر. قازاقپارات - قازاقستان رەسپۋبليكاسىنىڭ موڭعولياداعى ەلشىلىگى قازاقستان رەسپۋبليكاسىنىڭ تۇڭعىش پرەزيدەنتى كۇنى مەن تاۋەلسىزدىكتىڭ 30 جىلدىعىنا ارنالعان قازاقستان دوستارى كلۋبىنىڭ كەزەكتى وتىرىسىن وتكىزدى، دەپ حابارلايدى قازاقپارات ق ر س ءى م باسپا ءسوز قىزمەتىنە سىلتەمە جاساپ.

جيىنعا بەلگىلى قوعام قايراتكەرلەرى - ساياساتكەرلەر، عىلىمي زيالى قاۋىم مەن قازاق دياسپوراسىنىڭ وكىلدەرى، ساراپشىلار، جازۋشىلار مەن موڭعوليانىڭ بەدەلدى تۇلعالارى قاتىستى.

«قازاقستان دوستارى كلۋبىنىڭ ماقساتى - موڭعوليا ازاماتتارىنىڭ اراسىنان قازاقستانعا قىزىعۋشىلىق تانىتقان باستاماشىل ازاماتتاردى بىرىكتىرۋ جانە موڭعول حالقىنا قازىرگى قازاقستاننىڭ دامۋ باعدارى جونىندە سەنىمدى اقپاراتتى جەتكىزۋمەن قاتار كوشپەلى حالىقتار اراسىنداعى ەكىجاقتى قارىم- قاتىناستاردى نىعايتۋ ءۇشىن بىرلەسكەن ءىس- شارالار ۇيىمداستىرۋ»، دەلىنگەن حابارلامادا.


ءىس- شارانى اشقان قازاقستان ەلشىسى جالعاس ادىلبايەۆ قازاقستاننىڭ تاۋەلسىزدىكتىڭ 30 جىلى ىشىندە قول جەتكىزگەن جەتىستىكتەرىن، ەكونوميكالىق پروگرەستى، قوعامدىق دامۋدى، حالىقارالىق قاۋىپسىزدىك ارحيتەكتۋراسىنداعى بەلسەندى ءرولىن اتاپ ءوتتى. سونىمەن قاتار، قازاقستاندىق ديپلومات كلۋب مۇشەلەرىنە ەلىمىزدىڭ تۇراقتى دامۋى مەن حالقىمىزدىڭ ءال-اۋقاتىن قامتاماسىز ەتۋگە باعىتتالعان ەكونوميكالىق جانە ساياسي رەفورمالار تۋرالى حاباردار ەتتى. سونداي- اق، مەملەكەت باسشىسى قاسىم-جومارت توقايەۆتىڭ «حالىق بىرلىگى مەن جۇيەلى رەفورمالار - ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىنىڭ ىسكە اسىرىلۋ بارىسى جونىندە ماعلۇمات بەردى. ج. ادىلبايەۆ قازاقستان مەن موڭعوليا اراسىنداعى سەنىم مەن قۇرمەتتىڭ جوعارى دەڭگەيىن ەسكەرە وتىرىپ، ەكىجاقتى قارىم- قاتىناستاردى نىعايتۋ يگىلىگى ءۇشىن ءوزارا مۇددەلەردى ىلگەرىلەتۋ جانە ەكى مەملەكەتتىڭ قوعامدارى اراسىنداعى ديالوگتى قالىپتاستىرۋ بويىنشا كۇش- جىگەردى بىرىكتىرۋ قاجەتتىلىگىن اتاپ ءوتتى. وسىلايشا، ەلشى عىلىمي، مادەني، ادەبي جانە باسقا دا جوبالاردى ىسكە اسىرۋ ناتيجەسىندە قازاقستان مەن موڭعوليا حالىقتارى اراسىنداعى ىنتىماقتاستىقتى نىعايتا وتىرىپ، دوستار كلۋبى «التىن كوپىر» قىزمەتىن اتقارا الادى دەگەن سەنىم ءبىلدىردى.


ءىس- شارادا موڭعوليانىڭ III پرەزيدەنتى نامبار ەنحبايار (ەڭكىبايىر- اۆت) ءسوز سويلەپ، قازاقستاننىڭ تۇڭعىش پرەزيدەنتى نۇرسۇلان نازاربايەۆتىڭ بولاشاققا باعىتتالعان كورەگەن ساياساتىنىڭ ارقاسىندا قازاقستاننىڭ قارقىندى ەكونوميكالىق دامۋعا، ەلدىڭ وركەندەۋىنە جانە الەمدىك قوعامداستىققا تانىلۋىنا قول جەتكىزگەنىن ايتتى.

سونىمەن قاتار، ن. ەنحبايار ەلىمىزدىڭ قازىرگى پرەزيدەنتى ق. توقايەۆ ءوزىنىڭ ارىپتەسى تاڭداعان باعىتىن دايەكتى تۇردە جالعاستىرۋدا ەكەنىن، قازاقستاندى الەمدىك ەكونوميكاعا ىلگەرىلەتۋ ءۇشىن ساباقتاستىقتى قامتاماسىز ەتۋمەن قاتار جۇيەلى رەفورمالار جۇرگىزىپ وتىرعانىن ەرەكشە اتاپ ءوتتى. موڭعول ساياساتكەرى كولىك، لوگيستيكا جانە تاۋ- كەن ونەركاسىبى سالالارىنداعى ءىرى جوبالاردى جۇزەگە اسىرۋ ارقىلى قازاقستان مەن موڭعوليا اراسىنداعى ساۋدا- ەكونوميكالىق ىنتىماقتاستىقتى دامىتۋ قاجەتتىلىگىنىڭ وزەكتىلىگىمەن كەلىستى. بۇدان باسقا، ءىس-شارا بارىسىندا رەسپۋبليكامىزدىڭ سەرپىندى وزگەرىستەرىن، ەگەمەندى ەل رەتىندەگى تاريحي دامۋ جولىن، سونداي-اق قازاقستاننىڭ حالىقارالىق ساحناداعى تابىستارىن كوركەمدەيتىن قازاقستان تاۋەلسىزدىگىنىڭ 30 جىلدىعىنا ارنالعان فوتو جانە كىتاپ كورمەسى ۇيىمداستىرىلدى. ءىس- شارانىڭ سوڭىندا قازاقستان دوستارى كلۋبىنىڭ كەلەشەگى، سونداي- اق شىعارماشىلىق كەشتەر، كورمەلەر مەن سەمينارلار ۇيىمداستىرۋ ارقىلى بىرلەسكەن جوبالاردى ىسكە اسىرۋ مۇمكىندىكتەرى تۋرالى پىكىر الماسۋ بولدى. ءىس-شاراعا قاتىسۋشىلار قازاقستاننىڭ دوستار كلۋبىنىڭ وتىرىستارىن تۇراقتى نەگىزدە وتكىزۋ تۋرالى ءبىراۋىزدان ۇستانىمدارىن ءبىلدىرىپ، قازاقستان مەن موڭعوليانىڭ دوستىق قارىم- قاتىناستارىنىڭ يگىلىگى ءۇشىن جۇمىس ىستەۋگە دايىن ەكەندىكتەرىن راستادى.



:ءبولىسۋ
پئكئر قالدئرؤ
+7
جئبةرؤ
سونداي-اق... وقىڭىز

مۇراعات