عالىم كوروناۆيرۋس پاندەمياسىنىڭ قاشان اياقتالاتىنى تۋرالى بولجامىن ايتتى

نۇر- سۇلتان. قازاقپارات - قازاقستان مەديتسينا ۋنيۆەرسيتەتىنىڭ ەپيدەميولوگيا، بيوستاتيستيكا جانە دالەلدى مەديتسينا كافەدراسىنىڭ دوتسەنتى رافايل قىپشاقبايەۆ كوروناۆيرۋس پاندەمياسىنىڭ قاشان اياقتالاتىنى تۋرالى بولجامىن ايتتى، دەپ حابارلايدى قازاقپارات ءتىلشىسى.

«بولجام جاساۋ - ابىروي بەرمەيتىن ءىس. پاندەمياعا كەلسەك، بۇعان دەيىنگى تۇسپالدارىم تەرىس كەتىپ كورگەن جوق. ۆيرۋس مۋتاتسياعا تۇسكەن سايىن تارالۋ اۋقىمى كەڭەيەتىنىن، ىندەت جۇقتىرعانداردىڭ سانى ارتا تۇسەتىنىن، ءبىراق اۋىرتپالىعى العاشقىدان جەڭىلىرەك بولاتىنىن ايتقان ەدىم. سولاي بولدى دا. بالكىم، كوروناۆيرۋس سيمپتومسىز ينفەكسيا دەڭگەيىنە دەيىن تۇرلەنەتىن شىعار. ياعني، بىرىنشىدەن، ۆيرۋس عايىپ بولمايدى. ول بىزبەن بىرگە وتە ۇزاق ءومىر سۇرەتىن شىعار. ءيا، قازىر ءبىز ۆيرۋستىڭ سالدارىمەن عانا كۇرەسىپ وتىرمىز. سەبەبىن ەمدەۋ مۇمكىن بولماي تۇر. وسىنى ەسكەرسەك، پاندەميا توقتاي قويمايدى»، - دەدى عالىم دەنساۋلىق مينيسترلىگى ۇيىمداستىرعان ونلاين دارىستە.

ماماننىڭ ايتۋىنشا، كوروناۆيرۋستىڭ تۇماۋ سياقتى دەڭگەيدەگى اۋرۋعا اينالاتىنى تۋرالى بولجامداردىڭ نەگىزى بار.

«كوروناۆيرۋس پاندەمياسىنا بايلانىستى شەكتەۋ شارالارىنىڭ ءبارى 1-1,5 جىلدان كەيىن اياقتالۋى مۇمكىن. سودان كەيىن بۇل ۆيرۋس ومىرىمىزگە مىقتاپ ەنىپ، تۇماۋ مەن سۋىق تيۋ اراسىنداعى اۋىرتپالىعى بار اۋرۋ قوزدىرعىشقا اينالادى. سيرەك جاعدايلاردا تاۋەكەل توپتارىنىڭ وكىلدەرى ءۇشىن اسقىنۋلارى بولۋى مۇمكىن. ءبىراق باسىم جاعدايدا ادامدار بۇل ينفەكسيانى وڭاي ءارى جەڭىل وتكەرەدى»، - دەدى رافايل قىپشاقبايەۆ.

اۆتور: ەسىمجان ناقتىباي