قازاقستاندا ءىرى جانە ۇساق مالدى، كارتوپ پەن ءسابىزدى ەكسپورتتاۋعا تىيىم سالىندى
25- قاراشادا سىرتقى ساۋدا ساياساتى جانە حالىقارالىق ەكونوميكالىق ۇيىمدارعا قاتىسۋ ماسەلەلەرى جونىندەگى ۆەدومستۆوارالىق كوميسسيانىڭ وتىرىسى ءوتىپ، وندا مال، كارتوپ جانە كوكونىستى ەكسپورتتاۋعا تىيىم سالۋ ماسەلەسى قارالدى. ناتيجەسىندە ۆەدومستۆوارالىق كوميسسيا بارلىق جاس توپتارىنداعى ءىرى قارا مالدى 6 ايعا، سونداي- اق كارتوپ پەن ءسابىزدى 3 اي مەرزىمگە قازاقستان رەسپۋبليكاسىنىڭ اۋماعىنان شىعارۋعا تولىق تىيىم سالۋدى ەنگىزۋدى ماقۇلداۋ تۋرالى شەشىم قابىلدادى.
قازىرگى ۋاقىتتا ىشكى نارىقتا ءىرى قارا جانە ۇساق مال ەتىنە باعانىڭ ءوسۋى بايقالادى. قاراشا ايىندا رەسپۋبليكا بويىنشا سيىر ەتىنىڭ باعاسى ءبىر كيلوگرامم ءۇشىن ورتا ەسەپپەن 2239 تەڭگەنى قۇرادى. جىل باسىنان بەرى باعا % 15 - عا نەمەسە 292 تەڭگەگە ءوستى. قوي ەتىنىڭ ورتاشا باعاسى % 21 - عا (419 تەڭگە) ءوسىپ، ءبىر كەلىسى ءۇشىن 2409 تەڭگەنى قۇرادى. بۇل رەتتە ەت وڭدەۋ كاسىپورىندارىنىڭ جۇكتەمەسى % 50 تومەن دەڭگەيدە قالىپ وتىر. بيىلعى جىلدىڭ 10 ايىندا 173 مىڭ توننا ەت وڭدەلگەن، بۇل ەت ءوندىرىسىنىڭ جالپى كولەمىنىڭ نەبارى % 18 - ىن قۇرايدى. سونىمەن بىرگە بۇقاشىقتار مەن قوشقارلار ەكسپورتىنىڭ ۇلعايعانى بايقالادى. اعىمداعى جىلدىڭ 10 ايىندا 161 مىڭ باس ءىرى قارا مال شىعارىلدى نەمەسە 2020 -جىلدىڭ دەڭگەيىنەن 5,6 ەسە ارتىق، ۇساق مال شىعارۋ 6,7 ەسە ۇلعايدى جانە 112 مىڭ باستى قۇرادى. وسى جىلدىڭ سوڭىنا دەيىن 200 مىڭعا جۋىق ءىرى قارا مال شىعارىلۋى مۇمكىن. قالىپتاسقان جاعداي ەت جانە ەت ونىمدەرى باعاسىنىڭ وسۋىنە سەبەپ بولۋى مۇمكىن.
اعىمداعى جىلى كارتوپ پەن سابىزدەن جينالعان ءونىم ىشكى تۇتىنۋ جانە ەكسپورتتىق الەۋەتتى ساقتاۋ ءۇشىن جەتكىلىكتى ەكەنىن اتاپ وتكەن ءجون. الايدا، كورشى ەلدەردە كوكونىس ونىمدەرى مەن كارتوپتىڭ تومەن ونىمدىلىگى بار ەكەنىن اتاپ وتكەن ءجون، بۇل ىشكى نارىقتاعى باعالاردىڭ وسۋىنە اكەلۋى مۇمكىن. وسى وبەكتيۆتى كورسەتكىشتەرگە سۇيەنە وتىرىپ، ىشكى نارىقتاعى تاپشىلىقتى بولدىرماۋ جانە باعانى تۇراقتاندىرۋ ءۇشىن ۆەدومستۆوارالىق كوميسسيا ءىرى جانە ۇساق مالدى، كارتوپ پەن ءسابىزدى قازاقستاننىڭ اۋماعىنان اكەتۋگە تىيىم سالۋدى ماقۇلداۋ تۋرالى شەشىم قابىلدادى.
بۇل رەتتە، سىرتقى ەكسپورتتىق وتكىزۋ نارىقتارىن ساقتاۋدىڭ ماڭىزدىلىعىن ەسكەرە وتىرىپ، شەكتەۋلەر جەلتوقسان ايىنىڭ سوڭىندا كۇشىنە ەنەتىنىن نازارعا الا وتىرىپ، مينيسترلىك ءبىر اي ىشىندە اعىمداعى جاعدايعا كۇندەلىكتى مونيتورينگ پەن تالداۋدى جۇزەگە اسىراتىن بولادى. سونداي- اق وسى ماسەلە بويىنشا سالالىق قاۋىمداستىقتارمەن جانە وداقتارمەن تالقىلاۋ جانە كونسۋلتاتسيالار تۇرىندە بىرلەسكەن جۇمىس جۇرگىزىلەدى. ىشكى نارىقتى قامتاماسىز ەتۋ بويىنشا جاعداي تۇراقتالعان جاعدايدا شەكتەۋ شارالارىنىڭ كۇشىن جويۋ ماسەلەسى دە قارالاتىن بولادى.