ق ر پرەزيدەنتى شۆەيتساريادا قازاقتىڭ كونە جادىگەرلەرى ساقتالعان مۋزەيدى ارالادى
بۇل تۋرالى اقوردا سايتىندا ءمالىم ەتىلدى، دەپ حابارلايدى قازاقپارات.
كەلىسسوزدەر اياقتالعان سوڭ قازاقستان پرەزيدەنتى قاسىم- جومارت توقايەۆ پەن شۆەيتساريا پرەزيدەنتى گي پارمەلان بەلگىلى ديپلومات جانە ساياحاتشى انري موزەردىڭ بىرەگەي ەكسپوناتتار توپتاماسىنداعى كەرەمەت جادىگەرلەردىڭ ءبىرى - قازاقتىڭ بارقىتتان جاسالعان تۇسكىلەمىن بىرگە تاماشالادى.
اتالعان جادىگەردى قازاق سۇلتانى بايمۇحاممەد XIX عاسىردا شۆەيتساريالىق ديپلوماتقا تارتۋ ەتكەن. تاۋەلسىزدىگىمىزدىڭ 30 جىلدىعىندا اتالعان جادىگەر ەكى ەل اراسىنداعى مادەني بايلانىستاردىڭ ەرەكشە سيمۆولىنا اينالدى.
انري موزەردىڭ توپتاماسىندا تۇسكىلەمدەر، ۇلتتىق قارۋدىڭ تۇرلەرى: ايبالتالار، قىلىشتار، قانجارلار، سونداي- اق ات ابزەلدەرى جانە باسقا دا بۇيىمدار بار. قازاق دالاسىنىڭ بيلەۋشىلەرى اتالعان جادىگەرلەردى زەرتتەۋشىگە سىيلىق رەتىندە بەرگەن جانە ولار شۆەيتسارياعا جەتكىزىلگەن.
ەكسپوناتتاردىڭ ىشىندە تۇسكىلەمدەردىڭ الاتىن ورنى ەرەكشە. ولار قازاق حالقىنىڭ كوركەم تۋىندىسى عانا ەمەس، سونىمەن قاتار قازاق حاندىعىنىڭ تاريحىن عىلىمي تۇرعىدا زەرتتەۋ ءۇشىن قۇندى ماتەريال بولىپ تابىلادى.
مەملەكەت باسشىسى تۇسكىلەمنىڭ بىرەگەيلىگىن جانە ونىڭ تاريحي قۇندىلىعىن اتاپ ءوتىپ، اتالعان ونەر تۋىندىسىنىڭ قازاقستاندا دا كورمەگە قويىلاتىنىنا ۇمىتتەنەتىنىن ايتتى.
ەسكە سالايىق، 28-قاراشادا قازاقستان پرەزيدەنتى ق. توقايەۆ رەسمي ساپارمەن شۆەيتساريا كونفەدەراتسياسىنا كەلدى. بۇگىن جەنيەۆادا قاسىم- جومارت توقايەۆ شۆەيتساريانىڭ فەدەرالدىق پرەزيدەنتى گي پارمەلانمەن كەلىسسوز جۇرگىزەدى، دۇنيەجۇزىلىك دەنساۋلىق ساقتاۋ ۇيىمىنىڭ باسشىسىمەن كەزدەستى، ددسۇ- نىڭ دۇنيەجۇزىلىك دەنساۋلىق ساقتاۋ اسسامبلەياسىنىڭ ارناۋلى سەسسياسىنا قاتىستى، سونداي- اق ينۆەستيتسيالىق دوڭگەلەك ۇستەل وتىرىسىنا قاتىستى. بۇدان بولەك، مەملەكەت باسشىسى ب ۇ ۇ- نىڭ جەنيەۆاداعى بولىمشەسىنىڭ باس ديرەكتورى تاتيانا ۆالوۆايامەن، حالىقارالىق قىزىل كرەست كوميتەتىنىڭ پرەزيدەنتى پەتەر ماۋرەرمەن، دۇنيەجۇزىلىك ساۋدا ۇيىمىنىڭ باس ديرەكتورى نگوزي وكوندجو- يۆەالامەن كەزدەستى. سونداي- اق ق ر پرەزيدەنتى شۆەيتساريا پرەزيدەنتى گي پارمەلانمەن كەلىسسوز جۇرگىزدى.