USD 435.1 EUR 493.27
RUB 5.69 CNY 68.63
جاڭالىقتار

بەيبىت اتامقۇلوۆ تۇرعىن ءۇي باعاسى نەلىكتەن قىمباتتاعانىن ءتۇسىندىردى

30 قاراشا 08:07
:ءبولىسۋ
بەيبىت اتامقۇلوۆ تۇرعىن ءۇي باعاسى نەلىكتەن قىمباتتاعانىن ءتۇسىندىردى

نۇر- سۇلتان. قازاقپارات – ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ تۇرعىن ءۇي باعاسى توڭىرەگىندە قالىپتاسقان جاعدايعا تۇسىنىك بەردى، دەپ حابارلايدى قازاقپارات ءتىلشىسى.

«حابار» تەلەارناسىنداعى «ۇلت مۇددەسى» باعدارلاماسىندا مينيستر مەملەكەتتىڭ تۇرعىن ءۇي نارىعىنا الەۋمەتتىك از قامتىلعان توپتاردى قولداۋ ارقىلى ىقپال ەتىپ وتىرعانىن اتادى.

«پاندەميادان كەيىنگى كەزەڭدە بىزدە تۇرعىن ۇيگە دەگەن سۇرانىس وتە جوعارى بولدى. ونىڭ بىرنەشە سەبەبى بار. ءبىرىنشى كەزەكتە، بۇل - كەيىنگە قالدىرىلعان سۇرانىستىڭ اسەرى. ايتپاقشى، مەملەكەت 2020 -جىلى - پاندەميانىڭ شارىقتاۋ كەزەڭىندە قۇرىلىس ينفراقۇرىلىمىنا وتە ۇلكەن قولداۋ جاسادى. 2020 -جىلى 15 ميلليون شارشى مەتر تۇرعىن ءۇي قولدانىسقا بەرىلدى. بيىل 17 ملن شارشى مەتر تۇرعىن ءۇي بەرۋ جوسپارلانعان»، - دەدى بەيبىت اتامقۇلوۆ.

مينيستر ەلدە تۇرعىن ءۇي باعاسى كوتەرىلگەنىن مويىندادى.

«كەيىنگە قالدىرىلعان سۇرانىس تۋرالى ايتتىم عوي. ادامدار ءتىپتى دۇكەنگە بارا الماي قالعان قيىن كەزەڭ بولدى. قارىم- قاتىناس پەن الىس- بەرىستىڭ كەز كەلگەن ءتۇرى شەكتەلگەن شاعى ەسىڭىزدە شىعار. بۇل ۋاقىتتا ادامدار بانككە بارا المادى. الەم بويىنشا قۇرىلىس ماتەريالدارىنىڭ بارلىق ءتۇرى، اسىرەسە مەتالدىڭ قىمباتتاۋى نارىقتاعى باعاعا كەرى اسەر ەتتى. ءبىر جاعىنان باسپاناعا سۇرانىس بار. ءبىراق قۇرىلىس ماتەريالى مەن شيكىزاتىنىڭ باعاسى اسپانداپ كەتتى. بۇل قۇرىلىستىڭ قارقىنىن باياۋلاتتى. تۇرعىن ءۇي باعاسى وسىلاي كوتەرىلىپ شىعا كەلدى»، - دەپ ءتۇسىندىردى ۆەدومستۆو باسشىسى.

بەيبىت اتامقۇلوۆتىڭ ايتۋىنشا، پاندەمياعا دەيىنگى كەزەڭدە قازاقستان وندىرىسكە قاجەت بولاتتىڭ ەلەۋلى بولىگىن سىرتتان اكەلىپ وتىردى. بۇل جايت ەندى باسپانا باعاسىن ايقىنداۋدا سالماقتى ءرول اتقارىپ وتىر.

«ءبىز قۇرىلىس ماتەريالدارىنىڭ نارىعىنا تۇگەلدەي تالداۋ جاسادىق. قازاقستاندا قۇرىلىس ماتەريالدارىن ءجۇز پايىز دەرلىك وزىمىزدە وندىرۋگە بولادى. تەحنولوگيالىق تىزبەكتەن باستاپ نارىققا دەيىنگى جاسالعان تالداۋ قورىتىندىسى سۇرانىستى الىپساتارلار ۋشىقتىرعانىن كورسەتتى. تاسىمالداۋ باعاسى وسكەن. باسەكەلەستىكتى قورعاۋ اگەنتتىگى ىسكە كىرىسىپ ەدى، باعالار تۇسە باستادى. نارىقتاعى سۇرانىس، اجيوتاج، بەتون ءوندىرىسى، تسەمەنت باعاسى - مۇنىڭ ءبارى باعاعا اسەر ەتە بەردى» - دەپ ءتۇسىندىردى مينيستر.

ايتۋىنشا، ءىرى قالالاردا كىرپىش باعاسى دا وسكەن.

«كىرپىش باعاسىنا قاتىستى تاڭعالارلىق جاعداي قالىپتاسىپ وتىر. وتاندىق ءونىم بولسا دا، ءۇش ءىرى قالادا ونىڭ باعاسى قاتتى ءوستى. اسىرەسە استانامىز بەن الماتى قالاسىندا قىمباتتاپ شىعا كەلدى. ال وزگە وڭىرلەردە ونداي باعا اۋىتقۋى بولعان جوق. بۇگىندە بەتون مەن تسەمەنتكە دەگەن قاجەتتىلىكتى ءجۇز پايىز، ارماتۋرا بويىنشا 65% وتەپ وتىرمىز. قۇرىلىس ماتەريالدارىنىڭ نارىعىن جەرگىلىكتەندىرۋ باعىتىندا 35 جاڭا جوبا جوسپارلانعان»، - دەدى مينيستر. ءمينيستردىڭ پايىمىنشا، تۇرعىن ۇيگە دەگەن سۇرانىستى ءبىرجولعى زەينەتاقى تولەمىن الۋعا بەرىلگەن رۇقسات تا ۋشىقتىرعان.

«بۇل نەگىزى دۇرىس شەشىم بولدى. سونىڭ ارقاسىندا ازاماتتارىمىزدىڭ كوبى جاعدايلارىن جاقسارتا الدى، ءبىرازى نەسيەلەرىن جاپتى» - دەدى بەيبىت اتامقۇلوۆ.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات