قاسىم- جومارت توقايەۆ دۇنيەجۇزىلىك دەنساۋلىق ساقتاۋ ۇيىمىنىڭ باسشىسىمەن كەزدەستى

None
None
جەنەۆا. قازاقپارات - قاسىم- جومارت توقايەۆتىڭ شۆەيساريا كونفەدەراتسياسىنا رەسمي ساپارى د د س ۇ باس ديرەكتورى تەدروس ادحانوم گەبرەيەسۋسپەن كەزدەسۋدەن باستالدى، دەپ حابارلايدى اقوردانىڭ باسپا ءسوز قىزمەتى.


اڭگىمە بارىسىندا قازاقستان مەن د د س ۇ اراسىنداعى ىقپالداستىقتىڭ وزەكتى ماسەلەلەرى مەن پەرسپەكتيۆالارى تالقىلاندى. مەملەكەت باسشىسى باس ديرەكتورعا ەلىمىزدىڭ پاندەمياعا قارسى ءىس- قيمىلدار جونىندە قابىلداپ جاتقان شارالارى، ونىڭ ىشىندە قازاقستاندىق عالىمداردىڭ كوروناۆيرۋسقا قارسى ازىرلەگەن پرەپاراتتارى مەن حالىققا جاپپاي ۆاكسينا سالۋ جۇمىستارىنىڭ جۇرگىزىلۋ بارىسى تۋرالى مالىمەت بەردى.


قاسىم- جومارت توقايەۆ تەدروس اندحانوم گەبرەيەسۋسپەن بۇعان دەيىنگى كەزدەسۋلەرىن ەسكە الا وتىرىپ، دۇنيەجۇزىلىك دەنساۋلىق ساقتاۋ ۇيىمى قازاقستاننىڭ سەنىمدى ارىپتەسى ەكەنىن اتاپ ءوتتى.

- ءبىز ءسىزدىڭ دۇنيەجۇزىلىك دەنساۋلىق ساقتاۋ ۇيىمىن دامىتۋعا قوسقان ۇلەسىڭىزدى جوعارى باعالايمىز. وكىنىشكە قاراي، الەم كۇردەلى كەزەڭدى باستان كەشىرىپ جاتىر. قازىر كوروناۆيرۋستىڭ جاڭا شتاممى - «وميكرون» انىقتالدى. ءبىز ىندەتپەن كۇرەستە ءاردايىم بىرگە بولۋىمىز كەرەك، - دەدى پرەزيدەنت. قاسىم- جومارت توقايەۆ تەدروس ادحانوم گەبرەيەسۋسكە ەكىنشى جاڭا QazCoVac-P ۆاكسيناسى تۋرالى ايتتى.


اتالعان پرەپارات كلينيكالىق زەرتتەۋلەر فازاسىنا كانديدات ۆاكسينالار تىزىمىنە ەنگىزىلدى. پرەزيدەنت قازاقستاندىق ۆاكسيناعا قولداۋ كورسەتكەنى ءۇشىن د د س ۇ باسشىسىنا العىس ايتتى. مەملەكەت باسشىسى د د س ۇ- نىڭ ۆاكسيناعا تەڭ قۇقىقتى جانە ءادىل قولجەتىمدىلىكتى قامتاماسىز ەتۋگە ۇمتىلىسىن تولىق قولدايتىنىن اتاپ ءوتىپ، قازاقستاندىق ۆاكسينانى مۇقتاج ەلدەردىڭ بارىنە ۇسىنۋعا دايىن ەكەنىن ايتتى.

كەزدەسۋدە حالىقتىڭ دەنساۋلىعىن جاقسارتۋ ءۇشىن حالىقارالىق كۇش- جىگەردى جۇمىلدىرۋ قاجەت ەكەنى ايتىلدى. وسى رەتتە مەملەكەت باسشىسى دەنساۋلىق ساقتاۋ جۇيەسىندەگى ەكى ماڭىزدى - العاشقى مەديتسينالىق- سانيتارلىق كومەك پەن دەنساۋلىق ساقتاۋ سالاسىندا كورسەتىلەتىن قىزمەتپەن حالىقتى جاپپاي قامتۋ باعىتتارىن بىرىكتىرۋ تۋرالى ۇسىنىسىن جەتكىزدى.


تەدروس اندحانوم گەبرەيەسۋس قاسىم- جومارت توقايەۆتىڭ د د س ۇ- نىڭ ماقساتتارى مەن ءىس- قيمىلدارىنا، سونىڭ ىشىندە العاشقى مەديتسينالىق- سانيتارلىق كومەكتى دامىتۋعا بايلانىستى باستامالارىنا بەيىلدىلىگى ءۇشىن قولداۋ ءبىلدىردى.

ۇيىمنىڭ باس ديرەكتورى پرەزيدەنتكە ءوز كەزەگىندە قاسىم- جومارت توقايەۆقا كوروناۆيرۋسقا قارسى كۇرەس جونىندە قابىلدانىپ جاتقان شارالار، ۆيرۋستىڭ جاڭا شتامدارى جانە پاندەميانىڭ ودان ءارى ءورشۋ سسەناريىنە قاتىستى بولجامدار تۋرالى مالىمەت بەردى. تەدروس اندحانوم گەبرەيەسۋس وسى ولىمگە سوقتىراتىن اسا قاۋىپتى ىندەتپەن كۇرەستە ۆاكسينا سالۋدىڭ اسا ماڭىزدى ەكەنىن اتاپ ءوتتى.


سوڭعى جاڭالىقتار