قازاقستاندا قاراشادا ازىق- تۇلىك باعاسى قالاي ءوستى؟

None
None
الماتى. قازاقپارات - قاراشادا قازاقستاندا الەۋمەتتىك ماڭىزى بار ازىق- تۇلىك تاۋارلارىنىڭ قىمباتتاۋى باسەڭدەدى.

ايدىڭ ءبىرىنشى اپتاسىندا جالپى ازىق- تۇلىك قورجىنى بويىنشا باعا ءوسۋى بايقالمادى، ءبىراق 19 تاۋاردىڭ 8 ى بويىنشا باعا 0,4 پايىزعا، ال تاعى بەس تاۋاردىڭ باعاسى 1-2 پايىزعا ءوستى، - دەپ حابارلايدى Energyprom.kz سايتى.

ساراپشىلار مالىمەتىنشە، جالپى جىل باسىنان بەرى ازىق- تۇلىك قورجىنىنداعى ءوسىم 10,4 پايىز بولدى.

قازاندا قازاقستاندا ينفلياتسيا دەڭگەيى 8,9 پايىزعا جەتىپ، وعان ەڭ كوپ اسەر ەتكەن ازىق- تۇلىك ونىمدەرى بولدى. ازىق- تۇلىك تاۋارلارى ءبىر جىلدا 11,3 پايىزعا (جىل باسىنان بەرى 8,2 پايىزعا) قىمباتتادى.

بيىل ازىق- تۇلىكتىڭ قىمباتتاۋى جالپى الەمدىك ءۇردىس بولدى. ەۋرووداقتا بيىل قازاندا ازىق- تۇلىك باعاسى 2 پايىزعا، ا ق ش- تا 5,3 پايىزعا قىمباتتادى. بىرىككەن ۇلتتار ۇيىمىنىڭ ازىق- تۇلىك جانە اۋىل شارۋاشىلىعى ۇيىمىنىڭ (ف ا و) ازىق- تۇلىك باعاسىنىڭ يندەكسى قازاندا 133,2 تارماق بولدى - قىركۇيەكتەگى كورسەتكىشتەن 3,9 تارماققا (3 پايىز) جانە 2020 -جىلعى قازانداعى كورسەتكىشتەن 31,8 تارماققا (31,3 پايىز) جوعارى بولدى. كەيىنگى ءۇش ايدا بۇل كورسەتكىش 2011 -جىلدىڭ ماۋسىمىنان بەرگى ەڭ جوعارى دەڭگەيگە جەتتى.

قازاقستاندا بيداي باعاسى ءبىر جىلدا 16,5 پايىزعا، ۇن- جارما جانە كراحمال ونىمدەرىن ونەركاسىپتىك وندىرۋشىلەر باعاسى 16 پايىزعا ءوستى.

الەۋمەتتىك ماڭىزى بار ازىق- تۇلىك تاۋارلارىنىڭ تىزىمىندە كۇنباعىس مايى، كوكونىستەر، قانت جانە قاراقۇمىق جارماسى قىمباتتادى. بۇل ساناتتاردا اگروونەركاسىپتىك كەشەن ونىمدەرىن وندىرۋشىلەر، سونداي-اق وڭدەۋ سەگمەنتىن وندىرۋشىلەر باعاسىنىڭ كۇرت ءوسۋى بايقالادى. مىسالى، كۇنباعىس مايى بولشەك ساۋدادا جىلىنا 56,2 پايىزعا قىمباتتادى. بۇل رەتتە اۋىل شارۋاشىلىعى تاۋارىن وندىرۋشىلەردەگى كۇنباعىس تۇقىمدارى 40,6 پايىزعا قىمباتتادى، ال ونەركاسىپتىك وندىرۋشىلەر ءوز ونىمدەرى باعاسىن بىردەن 59,3 پايىزعا كوتەردى.

سونىمەن قاتار، شيكى ءسۇت فەرمەرلەردە 10,2 پايىزعا قىمباتتادى، ءسۇت پەن ىرىمشىكتى وڭدەۋ سەگمەنتىندە باعالار تەك 4,6 پايىزعا ءوستى، ناتيجەسىندە بولشەك ساۋداداعى ءسۇت باعاسى تەك 5-8 پايىزعا ءوستى.

ەگەر ونىمدەر قازاقستاندا وندىرىلمەسە، نەگىزىنەن ەكسپورت ەسەبىنەن كەلەتىن جاعداي باسقاشا قالىپتاسادى. قانت وندىرۋشىلەر ءوز ءونىمى قۇنىن 14 پايىزعا ارتتىردى، ال بولشەك ساۋدادا قانت 25 پايىزعا قىمباتتادى. سونىمەن قاتار، بيىلعى ءۇش توقسانىنىڭ قورىتىندىسى بويىنشا جەرگىلىكتى قانت زاۋىتتارى سەكتورداعى سۇرانىستىڭ تەك 44,5 پايىزىن جابا الدى.

سوڭعى جاڭالىقتار