اتىراۋدا كوگەرشىندەر كورمەسى ءوتتى
وبلىستىق كوگەرشىن وسىرۋشىلەر فەدەراتسياسى ۇيىمداستىرعان كورمە «مۇنايشى» دەنە شىنىقتىرۋ- ساۋىقتىرۋ كەشەنىندە ءوتتى. كوگەرشىن ءوسىرۋدى ءحوببيى سانايتىننىڭ ءبىرى - تالاپ جارىلعاسىنوۆ. قۇرساي ەلدى مەكەنىندە تۇراتىن 56 جاستاعى ازامات كوگەرشىن ءوسىرۋدى وقۋشى كەزىندا باستاعان.
«ءالى كۇنگە دەيىن وسىرەمىن، سەنەسىز بە؟ بۇدان ەشقانداي پايدا تاپپايمىن. جان راحاتى وسىرەمىن. قازىر مەنىڭ 50 دەن استام كوگەرشىنىم بار. بۇل كورمەگە ۇلدارىمدى ەرتە كەلدىم. بولاشاقتا ولاردىڭ كوگەرشىن وسىرۋمەن اينالىسقانىن قالايمىن. كورمەگە نەمىس، چەح كوگەرشىندەرىن اكەلدىك. مەنىڭ كوگەرشىندەرىم 2019 -جىلى وسىنداي كورمەدە ءبىرىنشى ورىن العان ەدى» - دەيدى تالاپ جارىلعاسىنوۆ.
اتىراۋلىقتار كورمەگە اكەلىنگەن ءتۇرلى- ءتۇستى كوگەرشىندەرمەن سۋرەتكە تۇسۋگە مۇمكىندىك الدى. سولاردىڭ قاتارىندا الەكسەي حاندوكين دە بار.
«مەنىڭ جاسىم - 73-تە. كوگەرشىن وسىرۋشىلەر اۋلەتىنەن شىققانمىن. ءوزىم دە كوگەرشىن وسىرەمىن. كوگەرشىندەرىمدى سەرۋەنگە الىپ شىعىپ، اۋەدە بيلەگەنىن قىزىقتاپ وتىرامىن. ءبىراق، بۇل كورمەگە قۇستارىمدى اكەلمەدىم. كورمەگە كوگەرشىندەردى كورۋ ءۇشىن كەلدىم» - دەيدى ا. حاندوكين.
وبلىستىق كوگەرشىن وسىرۋشىلەر فەدەراتسياسىنىڭ پرەزيدەنتى جانىبەك قالەكەنوۆتىڭ ءوزى 60 قا جۋىق كوگەرشىن وسىرەدى ەكەن. ونىڭ ايتۋىنشا، كورمەگە 150 دەن استام ادام كوگەرشىن اكەلگەن.
«ءبىز قازاقستان مەن رەسەيدىڭ كوگەرشىن وسىرۋشىلەرى ءۇشىن كورمە وتكىزىلەتىنىن حابارلاعان ەدىك. ءبىزدىڭ كورمەگە اقتوبە مەن قىزىلوردا وبلىسىنىڭ قازالى اۋدانىنان كوگەرشىن وسىرۋشىلەر قاتىسىپ وتىر. ءبىراق، رەسەيلىكتەر كەلە المادى. وعان كوروناۆيرۋس ينفەكتسياسىنىڭ ءورشۋى اسەر ەتىپ وتىر. ەندى الداعى ناۋرىز ايىندا تاعى ءبىر كورمە وتكىزەمىز دەپ ۇمىتتەنەمىز» - دەيدى جانىبەك قالەكەنوۆ.
ونىڭ ايتۋىنشا، اتىراۋدا كوگەرشىن وسىرۋشىلەر سانى ارتىپ كەلەدى.
«ءبىزدىڭ ءىزباسارلارىمىز بار» - دەپ كۇلەدى ج. قالەكەنوۆ.
كورمەنىڭ سوڭىندا سپورتتىق كوگەرشىندەر جارىسى ءوتتى. ونىڭ قورىتىندىسىمەن كوگەرشىن وسىرۋشىلەر ەستەلىك سىيلىقتارمەن ماراپاتتالدى.