ديماش قۇدايبەرگەن توكيو دجاز فەستيۆالىندە جاپون تىلىندە ءان ايتتى

None
None
نۇر- سۇلتان. قازاقپارات – 28-قاراشا كۇنى قازاقستاندىق ونەر جۇلدىزى ديماش قۇدايبەرگەن توكيودا وتكەن دجاز فەستيۆالىندە العاش رەت جاپون تىلىندە ءان شىرقادى، دەپ حابارلايدى قازاقپارات dimashnews.com سايتىنا سىلتەمە جاساپ.

توكيو دجاز فەستيۆالى - بۇل كۇنشىعىس ەلىنىڭ ءىرى دجاز مەرەكەسى. تانىمال الەمدىك مۋزىكانتتاردى ءبىر ساحنادا جيناي الاتىن فەستيۆالدىڭ عالامشاردىڭ تۇكپىر- تۇكپىرىندە اۋقىمدى اۋديتورياسى بار. بيىل فەستيۆال 20 جىلدىق مەرەيتويىن اتاپ ءوتتى. وسى سەبەپتى ۇيىمداستىرۋشىلار راسىمەن دە ايتقىسىز شوۋ سىيلادى. فەستيۆال ترانسلياتسياسى جاپونياداعى ەڭ ايگىلى دجاز كلۋبتارىنىڭ ءبىرى «Blue Note Tokyo» - دا جاسالدى.


كەش جۇرگىزۋشىلەرى تانىمال جاپون ءانشىسى جانە بەلگىلى تەلەجۇرگىزۋشى گارري سۋگياما بولدى. ساحنادا Makoto Ozone, حەربي حەنكوك، ميكو حازاما، BIGYUKI، چيحيرو ياماناكا جانە باسقا دا جاپوندىق جانە الەمدىك ارتىستەر ونەر كورسەتتى. ديماش قۇدايبەرگەن Tokyo Jazz Festival-گە وسىمەن ەكىنشى رەت قاتىسىپ وتىر. ول ەسىمى اڭىزعا اينالعان ءانشى ءارى كومپوزيتور كودجي تاماكيدىڭ Don’t Go («Autumn Strong» ) ءانىن جاپون تىلىندە ورىندادى.

جۇرگىزۋشى گارري سۋگياما ءارتىستى وتە جىلى تانىستىردى: «وسىعان دەيىن ديماشتى تەلەباعدارلامالاردىڭ بىرىندە تانىستىرعانىم بار. ونىڭ جانكۇيەرلەرى قاتتى قۋانىپ كەتتى جانە سودان بەرى ماعان قولداۋ بىلدىرە باستادى. مەن وتە تاڭعالدىم. ولار وتە سۇيكىمدى ءارى مەيىربان. ديماشتى شىنىمەن دە ءبۇتىن الەمدە جاقسى كورەدى جانە مەن ونىڭ تاماشا داۋىسىن وسىندا - Tokyo Jazz-دا تىڭداۋعا اسىقپىن»، - دەدى.

ايتا كەتەيىك، ديماش بۇل كومپوزيانى العاش رەت 2017 -جىلى «I am Singer» بايقاۋىندا قىتاي تىلىندە شىرقاعان بولاتىن. 2021 -جىلدىڭ 11-قاراشاسىندا وتكەن «NHK Music Special» جاپون تەلەباعدارلاماسىندا ءاننىڭ اۆتورى كودجي تاماكي ديماشتىڭ ورىنداۋىنا جوعارى باعا بەرگەن ەدى.


سوڭعى جاڭالىقتار