USD 434.84 EUR 498.2
RUB 5.72 CNY 68.47
جاڭالىقتار

التى قۇرلىقتىڭ اراسىن جالعاعان انا جاۋلىعى - فوتو

28 قاراشا 11:25
:ءبولىسۋ
التى قۇرلىقتىڭ اراسىن جالعاعان انا جاۋلىعى - فوتو

نۇر-سۇلتان. قازاقپارات - استانانىڭ بوراندى كەشىندە «قۇلانشى» كورمە ورتالىعىندا «انا جاۋلىعى» اتتى ەرەكشە كورمە اشىلدى.

تىستاعى قار بوراعان دۇلەي جەل، ىشتەگى جىلۋ شاشقان ۇيىق اۋرا كورمەگە باس سۇققان جاننىڭ ءبارى ارقاعا ايعايلاپ جەتكەن ادۋىن قىستىڭ قازىمىرلىعىنان قاجىپ، انا جاۋلىعىنان جىلۋ ىزدەپ كەلىپ جاتقانداي اسەر بەرىپ تۇردى، دەپ حابارلايدى قازاقپارات ءتىلشىسى.

جالپاق جۇرتقا مەديامەنەدجەر رەتىندە تانىمال ماحاببات ەسەننىڭ بۇل جوباعا كەلۋى ءوز الدىنا ءبىر تاريح. اجەسىن الەمنىڭ ەڭ ادەمى جەرلەرىن ەرتىپ ءجۇرىپ قىدىرتسام دەگەن جوسپارىن مەزگىلسىز كەلگەن اجال بۇزىپ، ارماندا قالدىم-اۋ دەپ جۇرگەندە لەيلا ماحاتتىڭ «انا جاۋلىعى» اتتى جوباسى تۋرالى ەستيدى.

بۇل كەزدە سۋرەتشىنىڭ باستاماسىنا ءۇن قوسقىسى كەلگەن قازاقستاندىق قىز- كەلىنشەكتەر ءبىرى اناسىنىڭ، ءبىرى اجەسىنىڭ جاۋلىعىن جولداپ، ايەل تاعدىرىنىڭ سان ءتۇرلى ءىزى بار ۇلكەن جاۋلىق كەستەلەنە باستاعان بولاتىن. سول قۇراق جاۋلىقتىڭ الەمدى تۇگەل ارالاپ شىعاتىنىن ەستىگەندە اجەسىنىڭ جاۋلىعىن ءبىر شەتىنە جالعاپ جىبەرسەم دەگەن وي تۋادى.

ول وي «الەمدى اجەم شارلاماسا دا، جاۋلىعى ارالاپ قايتسىن» دەگەن جۇبانىشتان تۋعان ەكەن.


«انا جاۋلىعى» جوباسىنىڭ پاندەميا سالدارىنان انالار ءتورت قابىرعاعا قامالىپ، اكەلەر تۇزدەن نەسىپ تەرە الماي ومالىپ قالعان شاقتا ومىرگە كەلگەنى دە زاڭدىلىق پا دەرسىڭ.

جۇرەكتەن شىققان دۇنيەنىڭ جۇرەككە جەتەتىنى راس بولسا كەرەك، ەكى جىلدىڭ ىشىندە جوبانىڭ ۇرانى التى قۇرلىققا تاراپ، جاھاننىڭ تۇكپىر- تۇكپىرىنەن ءۇن قوسۋشىلار تابىلىپتى.


ەلوردانىڭ «قۇلانشى» كورمە ورتالىعىندا قازاقستان، ۆەتنام، مولدوۆا، بۋركينا- فاسو، اۋستريا، سلوۆەنيا، يزرايل، بەلارۋس، لاتۆيا، ارمەنيا، مەكسيكا، ازەربايجان، تۇركيا، تايۆان، چەحيا جانە ءۇندىستان ەلدەرىنەن قىز-كەلىنشەكتەر ءوز جاۋلىقتارىن جولداپتى. قازىر قۇراق جاۋلىقتا 524 انانىڭ تاعدىرى، ارمانى، تىلەگى، سەزىمى ۇيلەسىم تاپقان. لەيلا ماحاتتىڭ ەندىگى ارمانى - وسى جاۋلىقتى الەمنىڭ التى قۇرلىعىمەن الىپ ءوتىپ، كوكجيەگىن كەڭەيتۋ.

سول ارمانىن ىسكە اسىرۋ ءۇشىن قازىر الەۋمەتتىك جەلىدە جوبانى بەلسەندى ناسيحاتتاپ، دەمەۋشى ىزدەپ ءجۇر.


«بۇل جوبانى ءبىز تاۋەلسىزدىكتىڭ 30 جىلدىعىنا ارنايمىز. «Forte Kulanshi Art Space» - تە وسىمەن 25 رەت كورمە وتكىزىپ وتىرمىز. بۇل يدەيا پاندەميانىڭ العاشقى كۇندەرىندە، ءبارى كارانتينگە جابىلعان كەزدە پايدا بولدى. بەلسەندى جاندار ءۇشىن بۇل وڭاي سىناق بولعان جوق. قول قۋسىرىپ وتىرماي، ىشتەگى بۋلىققان ەنەرگيانى پايدالى ىسكە جۇمساۋ كەرەك ەدى. ونىڭ ۇستىنە ىندەتتىڭ قاۋپى ارتقان سايىن انا بىتكەن جاقىندارى ءۇشىن الاڭداپ، الاسۇرىپ كەتتىك.

«انا جاۋلىعى» جوباسى وسىنداي شيرىعىستان تۋعان دۇنيە. بىردە كىشى قىزىم ديۆاندا جاتىپ ۇيىقتاپ كەتىپتى. بەيسانالى تۇردە يىعىمداعى جامىلعىنى سوعان جاۋىپ جاتىر ەكەنمىن. بۇكىل الەم وقشاۋلانىپ قالعان شاقتا ءبىزدى انالاردىڭ قامقورشى تۇيسىگى بىرىكتىرۋ كەرەكتىگىن ءتۇسىندىم. «انا جاۋلىعىنىڭ» العاشقى يدەياسى وسىلاي تۋىنداپ ەدى»، - دەيدى لەيلا ماحات.


جوبا اۆتورىنىڭ ايتۋىنشا، مۇنداعى ءار جاۋلىقتىڭ كىشىگىرىم تاريحى بار. (ماقالانىڭ باسىندا ايتىلعان ماحاببات ەسەننىڭ وقيعاسىن دا وسى لەيلا ماحاتتىڭ اۋزىنان ەستىگەن ەدىك). «ءار جاۋلىقتى قۇراققا جالعاعان كەزدە ونىڭ تاريحىن ايتىپ، كەيدە ءتىپتى انگە كەزەك بەرىپ، ءبىر سەرگىپ قالامىز. ءبىر ايەل ءوزى مەن اپكەسىنىڭ جاۋلىعىن قاتار اكەلىپتى. اپكەسىنىڭ بالاسى قاتتى اۋىرىپ جاتقانىن ايتتى. قۇراقتىڭ بويىنا جينالعان ەنەرگيا بالانى اۋرۋدان ايىقتىرسىن دەپ ىرىمداپ كەلگەنىن سوندا تۇسىندىك. ءار جاۋلىقتىڭ ارتىندا تاعدىر، تىلەك، ارمان جاتىر دەپ وتىرعانىم سول»، - دەيدى سۋرەتشى.


كورمەدە قۇراق جاۋلىقتان بولەك، قىلقالام شەبەرلەرىنىڭ تۋىندىلارى قويىلدى. ءۇش بالانىڭ اناسى، الماتىلىق سۋرەتشى دينارا كادىروۆا وسى كورمە ءۇشىن الماتىدان ارنايى كەلىپتى.

«مەنىڭ بۇل جەرگە اكەلگەن تۋىندىلارىم «انا جاۋلىعى» جوباسىنىڭ ۇرانىمەن ۇندەس. لەيلا ماحات مەنى شاقىرعاندا سونى ەسكەرسە كەرەك. «قۇلانشىدا» كورمە وتكىزۋ مەن ءۇشىن جاڭا دەڭگەي»، - دەدى ول.


اناۋ جاۋلىعى بازبىرەۋلەر ايتىپ جۇرگەندەي ايەلدىڭ ارىن سۇق كوزدەن قورعايتىن پەردە عانا ەمەس. انا جاۋلىعىنىڭ ءمانىن بۇلايشا تىم شار شەڭبەرمەن شەكتەۋ بارىپ تۇرعان قاراڭعىلىق. انا جاۋلىعىنىڭ تاريحى مەن تاعلىمىن، قادىرى مەن قاسيەتىن ەشبىر دىنمەن، ەشبىر يدەولوگيامەن، ساياسي دوگمامەن شەكتەۋ مۇمكىن ەمەس. انا جاۋلىعى ادام بالاسىنا جورگەك تە بولعان. كەرەك كەزىندە كەبىننىڭ دە ورنىن باسقان.


انا جاۋلىعى وتى سونگەن جۇرەكتەرگە جىلۋ دا بەرگەن. بىردە ايەلدىڭ سىرلاسى بولىپ، جاسىن سۇرتسە، بىردە ماڭدايداعى تەرى سۇرتكەن. بىردە مايداندا قانسىراعان جاۋىنگەردىڭ جاراسىن تاڭىپ، جانىنا اراشا بولعان. لەيلا ماحاتتىڭ انا جاۋلىعى تۋرالى تەبىرەنە سويلەگەن ءسوزى مەن كورمەدە قويىلعان تەرەڭ ويلى تۋىندىلاردان وسىنداي وي ءتۇيىپ قايتتىق.

اۆتور: ەسىمجان ناقتىباي


:ءبولىسۋ
پئكئر قالدئرؤ
+7
جئبةرؤ
سونداي-اق... وقىڭىز
ونلاين قىزمەتكەرلەر

مۇراعات