USD 434.24 EUR 492.69
RUB 5.67 CNY 68.46
جاڭالىقتار

سايرامدىق تۇرعىن ءۇيىن مۋزەيگە اينالدىردى - فوتو

27 قاراشا 16:13
:ءبولىسۋ
سايرامدىق تۇرعىن ءۇيىن مۋزەيگە اينالدىردى - فوتو

تۇركىستان. قازاقپارات - تۇركىستان وبلىسى، سايرام اۋدانىنىڭ تۇرعىنى سۋحراب يرنازاروۆ ءۇيىنىڭ شاتىرىن مۋزەيگە اينالدىردى.

مۋزەيگە 1950 -جىلدان بەرى قولدانىستا بولعان تەلەفوندار مەن ماگنيتافونداردىڭ جانە تەلەديدارلار مەن فوتواپاراتتاردىڭ جۇزدەگەن تۇرلەرى قويىلعان. سۋحراب ءابدىنابي ۇلىنىڭ بۇل ىسكە دەگەن قىزىعۋشىلىعى 2014 -جىلدان باستالىپتى. كولىك قوياتىن گاراجدى تازالاماق بولعان ول كەرەك ەمەس زاتتارىن شاتىرعا شىعارىپ تاستاعان.

كەيىن سۇرىپتاپ، قاجەتتىلەرىن جيناقتاۋ بارىسىندا كوللەكسياعا دەگەن قىزىعۋشىلىعى ارتقان. سودان ءۇيىنىڭ شاتىرىنا ارنايى سورەلەر جاساپ، جيناعان بۇيىمدارىن سوندا ءىلىپتى.


بۇگىندە سۋحرابتىڭ مۋزەيىندە 250-دەن استام فوتواپارات، 700-دەن استام اۋديو كاسسەتا، 40 كەلى تيىن جانە تەلەديدارلار مەن ساعاتتاردىڭ، ماگنيتافونداردىڭ ءتۇر-ءتۇرى بار.

الەمدە ساناۋلى عانا تارالىممەن شىعارىلعان سيرەك كەزدەسەتىن تەحنيكالاردى دا سۋحرابتىڭ ۇيىنەن تابۋعا بولادى. كوللەكسيونەر كونە زاتتاردى بارلىعىن اۋىلداعى «باراحولكا» اتالىپ كەتكەن بازاردان نەمەسە جارناما پاراقشالارى ارقىلى شەت ايماقتاردان ساتىپ الادى.

ماسەلەن، شاحتالاردا تۇراتىن شويىن تەلەفوندى پاۆلوداردان الىپ كەلگەن. سوعىس جىلدارى اسكەريلەر قولدانعان بۇرامالى سىمسىز تەلەفونداردى جارناما ارقىلى الدىرعان. ۇلى جەڭىس جىلدارىندا جەڭىمپازدارعا تاپسىرىلماي قالعان 80 وردەن مەدالدىڭ بارلىعىن ءبىر ادامنان ساتىپ الىپتى. كۇن كوسەم لەنيننىڭ ەسكەرتكىشىن ساتۋشىلار 500 تەڭگەگە باعالاپ، بەرىپ كەتكەن.

ال، ارابيادان كەلگەن لامپالاردى دا قىمبات ەمەس باعاعا ساتىپ العان. 1989 پلاستينكاعا جازىلعان قۇران اياتتارىن جەرلەسى، سايرامدىق ازاماتتان تاپقان.


«كوپشىلىك مەنى بۇل زاتتاردى قىمباتقا الادى دەپ ويلايدى. ءتىپتى «50000، 60000، 100000 تەڭگە تۇرادى عوي، اقشانى قايدان الدىڭ؟» دەپ سۇرايتىن دوستارىمدا بار. ءبىراق مەن كوبىنىسە قولدان الامىن. ماسەلەن، 1970-80 -جىلدارى تەك ستۋديادا تۇرعان فوتواپارتتى وسى سايرامنان تاپتىم. 1970 -جىلعى ماگنيتافوندى 1500-2000 تەڭگەگە ساتىپ الدىم. فوتواپارتتاردىڭ كەيبىرىن تەگىن، كەيبىرىن 500-1000 تەڭگەگە العانمىن. ۆاتساپ جەلىسىندەگى كوللەكسيونەرلەردىڭ توپتارىنا قوسىلدىم. كوپ زاتتاردى سوندا تاپسىرىس بەرۋ ارقىلى الىپ وتىرامىن» - دەيدى ول.


تاعى ءبىر ايتا كەتەرلىگى، تەحنيكالاردىڭ ءتىلىن جاقسى بىلەتىن سۋحراب جيناقتاعان زاتتارىنىڭ اقاۋلارىن تۇزەتىپ قويعان. سوندىقتان مۇنداعى تەحنيكالاردىڭ باسىم بولىگى جۇمىس ىستەپ تۇر. «مينيا»، «رەكورد»، «سيرۋيس» ماگنيتافوندارىنا 1970-80 -جىلعى اندەر جازىلعان پلاستينكالار مەن كاسسەتالار سالىپ قويعان. توكقا قوسساڭىز بىردەن اۋەندەردى شىرقاي جونەلەدى. فوتواپاراتتارعا دا پلەنكا سالساڭىز سۋرەتكە تۇسىرە بەرەسىز. ال، تەلەديدارلاردى دا پايدالانۋعا بولادى. شويىن ۇتىكتەردىڭ ىشىنە شوق سالىپ، كيىم ۇتىكتەۋگە مۇمكىندىك بار. كينوپروەكتورلارمەن دە كينو كورىپ، كەڭەس ۇكىمەتىنە ساياحات جاساي الاسىز. كوپشىلىگىنىڭ قۇجاتىدا ساقتاۋلى تۇر.


«مەندەگى كەيبىر ماگنيتافوندار از كولەمدە وندىرىسكە شىققان. سوندىقتان ساتىپ العىسى كەلەتىندەر كوپ. ءبىراق مەن قۇندى دۇنيەلەردى ساتقىم كەلمەيدى. تەك قوسىمشا دۋبليكاتى بار زاتتاردى عانا ساتامىن نەمەسە باسقا زاتقا اۋىستىرامىن» - دەيدى سۋحراب.


كوللەكسيونەر بوس ۋاقىتىندا ساعات مەحانيزمدەرىنەن ترانسفورمەر كولىكتەرىن قۇراستىرادى. اعاشتان ءتۇرلى بەينەلەر جاساۋدى جاقسى كورەدى. كوۆيدكە قارسى كومپوزيتسيا جاساپ، مۋزەيىنىڭ سورەسىنە ءىلىپ قويعان. سونداي-اق، پوليتسيا شەنىندەگى جۇلدىزشالاردان قىزمەت جولىن بەينەلەگەن تۋىندى جاساعان.


«1981 -جىلعى ءىنىمنىڭ تۋعان كۇنىنە ەرەكشى سىيلىق جاساماقشى بولدىم. سودان 1981 -جىلى شىققان تيىنداردان، ونىڭ تۋعان جىلىن جازىپ بەرەمىن دەپ شەشتىم. تيىندار ىزدەپ، 2,5 كەلى تيىندى ساتىپ الدىم. ىشىنەن 1981 -جىلى شىققان تيىندار تابىلدى. ىنىمە دە سىيلىق قاتتى ۇنادى» - دەيدى ول.


مۇنان بولەك كوللەكسيونەر ۋەفا فۋتبول كوماندالارى مەن ءى ءى م توسبەلگىلەرىن جيناقتاعان. سونداي- اق، پوشتا ماركالارى مەن تيىنداردىڭ دا تۇرلەرى كوپ. كىلتتەردىڭ دە 2,3 كەلىسى بار.


«جالپى قازاقستاندىق توسبەلگىلەر قىمباتقا باعالانادى. ماسەلەن، ابايدىڭ بەينەسىندەگى توسبەلگىلەردىڭ 2-3 ءتۇرىن تاپتىم. شوقاننىڭ بەينەسىندەگى ءبىر- اق توسبەلگى بار ەدى، تانىسىم قوياردا قويماي سۇراپ الىپ كەتتى. شىمكەنت قالاسىنا قاتىستى توسبەلگىلەر دە مۇلدەم از. سوندىقتان بولار، نارىقتاعى باعاسى دا جوعارى» - دەيدى ول.

بۇگىنگى كۇنى سۋحراب يرنازاروۆ سايرام اۋداندىق پوليتسيا بولىمىندەگى شتابتا اعا ينسپەكتور. بەس قىزدىڭ اكەسى. جۇبايى اۋىلدىق مەكتەپتە مۇعالىم.

«اۋىلداعى كوپشىلىك ءبىزدىڭ ۇيدە مۋزەيدىڭ بار ەكەنىن بىلمەيدى. ال، ۇيگە كەلگەن دوستارىم مەن تۋىستارىما شاتىرداعى زاتتاردى كورسەتكەندە، تاڭ قالىسىپ، بىردەن تەلەفوندارىنا سۋرەتكە تۇسىرە باستايدى. اتا-انام دا قارسى ەمەس. تەلەفون شۇقىلاپ كوز مايىمدى تاۋىسقانشا پايدالا ىسپەن اينالىسىپ جاتقانىما قۋانادى» - دەيدى ول.


اۆتور: قايرات زاينيشەۆ



:ءبولىسۋ
پئكئر قالدئرؤ
+7
جئبةرؤ
سونداي-اق... وقىڭىز
ونلاين قىزمەتكەرلەر

مۇراعات