تۇركىستاندا مەملەكەتتىك حاتشىنىڭ قاتىسۋىمەن حالىقارالىق «قازاق ءتىلى» قوعامىنىڭ قۇرىلتايى باستالدى
اۋقىمدى شاراعا ق ر مەملەكەتتىك حاتشىسى قىرىمبەك كوشەربايەۆ، پرەمەر- ءمينيستردىڭ ورىنباسارى ەرالى توعجانوۆ، سونداي- اق ءبىلىم جانە عىلىم ءمينيسترى اسحات ايماعامبەتوۆ جانە پارلامەنت دەپۋتاتتارى قاتىسۋدا، دەپ حابارلايدى قازاقپارات ءتىلشىسى.
تۇركىستان قالاسىنداعى «فاراب» كىتاپحاناسىندا ءوتىپ جاتقان قۇرىلتاي، سونداي- اق ەلىمىزدىڭ بارلىق وڭىرىنەن كەلگەن قوعام قايراتكەرلەرى مەن زيالى قاۋىم وكىلدەرىنىڭ، وبلىستار مەن قالا باسشىلارى باستاعان دەلەگاتتاردىڭ باسىن قوستى.
جينالعان قاۋىم الدىندا مەملەكەتتىك حاتشى قىرىمبەك كوشەربايەۆ بايانداما جاساپ، كەلەلى باسقوسۋدىڭ ماڭىزدىلىعىنا توقتالدى. جيىندا سونداي- اق، حالىقارالىق «قازاق ءتىلى» قوعامىنىڭ جاڭا پرەزيدەنتى سايلانىپ، ۇيىمنىڭ جاڭا جارعىسى قابىلدانادى دەپ كۇتىلۋدە. ورتالىق تەكسەرۋ القاسىنىڭ ەسەبى تىڭدالىپ، ورتالىق كەڭەسىنىڭ جاڭا قۇرامى تانىستىرىلماق. بۇدان وزگە قوعامنىڭ جاڭا باعدارلاماسى مەن قۇرىلتاي قاۋلىسى قابىلدانادى دەپ كۇتىلۋدە. ۇيىم جۇمىسىنا ءوز ۇلەستەرىن قوسىپ جۇرگەن ءبىرقاتار ازاماتتار دا ماراپاتتالماق.
