قازاقستاندا شاحماتتان راپيد جانە بليتستەن الەم چەمپيوناتى وتەدى

نۇر-سۇلتان. قازاقپارات - 2021-جىلعى 25-31- جەلتوقساندا نۇر-سۇلتان قالاسىندا شاحماتتان راپيد جانە بليتستەن FIDE الەم چەمپيوناتى (FIDE World Rapid and Blitz Championships 2021) وتەدى، دەپ حابارلايدى قازاقپارات ءتىلشىسى.

قازاقستان شاحمات فەدەراتسياسىنىڭ مالىمەتىنشە، اتالعان جارىس شاحمات كۇنتىزبەسىندەگى اسىعا كۇتىلەتىن وقيعالاردىڭ ءبىرى سانالادى.

وعان الەمنىڭ 52 ەلىنەن 200 دەن استام شاحماتشىنىڭ قاتىساتىندىعى جوسپارلانعان. ولاردىڭ اراسىندا الەم چەمپيوندارى مەن ۆيتسە-چەمپيوندارى، FIDE (حالىقارالىق شاحمات فەدەراتسياسى) نۇسقاسى بويىنشا رەيتينگى ەڭ جوعارى شاحماتشىلار بار. چەمپيوناتقا ۇلتتىق فەدەراتسيا اتىنان ەرلەر مەن ايەلدەر سەكسيالارىنداعى قازىرگى ەل چەمپيوندارى، الەم چەمپيوناتى رەگلامەنتىنىڭ تالاپتارىنا سايكەس كەلەتىن شاحماتشىلار قاتىسا الادى. سونداي-اق، قازاقستان شاحمات فەدەراتسياسىنىڭ قوسىمشا 30 قازاقستاندىق ويىنشىنى شاقىرۋ قۇقىعىن يەلەنگەن»، - دەپ اتاپ وتەدى فەدەراتسيانىڭ باسپا ءسوز قىزمەتىنەن.