ەلوردادا تۇركيا مادەنيەتىن ارقاۋ ەتكەن جاس سۋرەتشىلەردىڭ كورمەسى اشىلدى
«وقۋشىلارىمىزدىڭ قىلقالامىمەن تۇركيا» اتاۋ العان جاس سۋرەتشىلەر كورمەسى تۇرىك اقىنى جانە ويشىلى يۋنۋس ەمرەنىڭ ومىردەن وزعانىنا 700 جىل تولۋىنا جانە بيىل تۇرىكشە جىلى بولىپ اتالىپ وتۋگە وراي ءوتىپ وتىر. اتالعان كورمەنى ەلورداداعى يۋنۋس ەمرە اتىنداعى تۇرىك مادەني ورتالىعى ۇيىمداستىرىپ وتىر.
«الدىمەن بۇگىنگى شاراعا كەلگەن بارشاڭىزعا العىسىمدى بىلدىرەمىن. پاندەمياعا بايلانىستى ءبىراز جوسپار كەيىنگە شەگەرىلدى. نۇر-سۇلتان قالاسىنداعى يۋنۋس ەمرە اتىنداعى تۇرىك مادەني ورتالىعى 10 جىلدان استام ۋاقىت قىزمەت ەتىپ كەلەدى. وسى كۇنگە دەيىن ورتالىقتا ءتۇرلى فورماتتاعى مادەني، اعارتۋ شارالارى ۇيىمداستىرىلدى. ءبىزدىڭ ورتالىقتا تۇرىك ءتىلىن ۇيرەتۋ كۋرسىمەن قاتار، بەينەلەۋ ونەرىنە باۋلۋ شەبەرلىك ساباعى دا بار. بۇگىن مىنە ءبىزدىڭ وقۋشىلارىمىز ءوز تۋىندىلارىن كوپشىلىك نازارىنا ۇسىنۋدا. ولار تۇركياعا بارعانداعى اسەرىن سۋرەت ارقىلى جەتكىزىپ وتىر ەكەن. وسىنداي شارالار ارقىلى باۋىرلاس ەكى ال اراسىنداعى ىنتىماقتاستىقتىڭ نىعايا تۇسەتىنى انىق»، - دەدى تۇركيا رەسپۋبليكاسىنىڭ قازاقستانداعى ەلشىسى ۋفۋك ەكيدجي كورمەنىڭ اشىلۋ سالتاناتىندا.
كورمەگە تۇركيانىڭ تاريحى مەن مادەنيەتىنەن حابار بەرەتىن 35 تۋىندى قويىلعان.
«ەلىمىز تاۋەلسىزدىك العاننان كەيىن العاشقىلاردىڭ ءبىرى بولىپ الماتىدا تۇركيانىڭ ەلشىلىگى اشىلدى. جۋىردا عانا مەملەكەت باسشىسى تۇرىك باۋىرلاردىڭ باسىن قوسقان اۋقىمدى جيىنعا قاتىستى. سول جەردە تۇركىتىلدەس ەلدەر ءوزارا ىنتىماقتاستىق پەن ساياسي-ەكونوميكالىق قاتىناستى ودان ءارى نىعايتا ءتۇسۋ كەرەكتىگى ايتىلدى. سونىمەن قاتار الدا تۇڭعىش پرەزيدەنت كۇنى كەلە جاتىر. وزدەرىڭىز بىلەسىزدەر تۇركى الەمىنىڭ بىرىگۋى مەن وداقتىڭ كۇشەيە تۇسۋىنە ەلباسىنىڭ قوسقان ۇلەسى زور. ودان ءارى مەملەكەتىمىزدىڭ تاۋەلسىزدىك كۇنى مەرەكەسى كەلىپ قالادى. تاريحتان ءمالىم، قازاقستاننىڭ تاۋەلسىزدىگىن العاش مويىنداعان ەل ول تۇركيا. سوندىقتان ەكى ەل قارىم-قاتىناسى تەك ساياسات پەن ەكونوميكاعا ەمەس، باۋىرلاس، دوستىققا نەگىزدەلگەن. وعان دالەل بۇگىنگى شارا. وسى شاراعا قاتىسۋشىلار مەن ۇيىمداستىرۋشىلارعا مىڭ العىس»، - دەيدى ق ر پارلامەنتى ءماجىلىسىنىڭ دەپۋتاتى ەلنۇر بەيسەنبايەۆ.
ەلوراداداعى «حانشاتىر» و س و- دا ۇيىمداستىرىلعان كورمە 2 كۇن بويى جۇمىس ىستەيدى.
«بۇرىن مەن وسى تاماشا ءارى كورىكتى ەلدىڭ قالالارىنا بارىپ، ەرەكشەلىكتەرىنە تاڭ قالاتىنمىن. تۇرىك مادەنيەتى باي جانە كوپ قىرلى بولعانى سونشالىقتى، مەن ءۇشىن ول قانداي دا ءبىر قاراپايىم انىقتامانىڭ شەڭبەرىنە سىيمايدى. ءار قالاسىنىڭ بۇرىشتارىندا باۋىرلاس حالىقتىڭ تۇتاس تاريحى بار، سىرلار مەن قۇپيالارعا قانىق كونە زامان اتموسفەراسى، تابيعات پەن دارىندى شەبەرلەردىڭ قولىنان جاسالعان ەرەكشە جاۋھارلاردى كەزدەستىرۋگە بولادى.
بۇل مادەنيەتپەن ءوزىم وقىعان يۋنۋس ەمرە اتىنداعى تۇرىك مادەنيەت ورتالىعىنىڭ ارقاسىندا تانىستىم. تۇركيا-جاعىمدى ەموتسيالارعا، ءدامدى تاعامدارعا، مەيىرىمدى جانە ەلگەزەك ادامدارعا، تاڭعاجايىپ بيلەر مەن تاتتىلەرگە تولى ەل. كورمەگە مەنىڭ «ءدارۋىش»، «تۇرىك شايى»، «باكلاۆا»، «تۇرىك اياق كيىمى»، «كوز مونشاق»، «گالاتا مۇناراسى» جانە «ستامبۇلدا كۇننىڭ باتۋى» اتتى كارتينالارىم قويىلدى»، - دەدى جاس سۋرەتشى اينۇر مىرزااحمەتوۆا.
