اكىم ەت باعاسىنا بايلانىستى پىكىر ءبىلدىردى

نۇر-سۇلتان. قازاقپارات - ماڭعىستاۋ وبلىسىنىڭ اكىمى نۇرلان نوعايەۆ وڭىردەگى ەت باعاسى تۋرالى سۇراقتارعا جاۋاپ بەردى، دەپ حابارلايدى قازاقپارات.

«اۋا رايىنا بايلانىستى جاعدايلار وسىمگە اسەر ەتكەن جوق. ءيا، باعانىڭ ءوسۋى بار. ءبىراق جىل سايىن ءداستۇرلى تۇردە ماڭعىستاۋ وبلىسىنا ەت باتىس قازاقستان، اقتوبە، قوستاناي وبلىستارىنان جەتكىزىلەدى. ياعني ەتتىڭ باسىم بولىگى سول وڭىرلەردەن كەلەدى»، - دەدى ايماق باسشىسى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

اكىمنىڭ ايتۋىنشا، بيىل بولعان قۋاڭشىلىق پەن ەت باعاسىنىڭ قىمباتتاۋى ءبىر-بىرىمەن بايلانىستى ەمەس.

«جەرگىلىكتى اتقارۋشى ورگاندار باعانى نەگىزسىز وسىرمەۋ ءۇشىن تۇراقتاندىرۋ قورىن قۇردى جانە قاجەت بولعان جاعدايدا ينتەرۆەنتسيا جاسايدى. باعالارعا جانە باعانىڭ نەگىزسىز وسۋىنە كۇندەلىكتى مونيتورينگ جۇرگىزىلەدى. جەدەل شارالار دا قابىلدانۋدا»، - دەدى نۇرلان نوعايەۆ.