ەكولوگتار ەسىل وزەنىنىڭ تارتىلۋىنا الاڭداۋشىلىق تانىتتى

نۇر-سۇلتان. قازاقپارات - ەلوردادا قورشاعان ورتا جاناشىرلارى ەسىل وزەنى سۋىنىڭ ازايىپ بارا جاتقاندىعىنا الاڭداۋشىلىق ءبىلدىردى، دەپ حابارلايدى قازاقپارات ءتىلشىسى.

«2020-جىلدان باستاپ ەسىل وزەنىنىڭ سۋى ساپا جىكتەمەسىنە سايكەس 5-توپقا جاتادى. 2016-جىلى قابىلدانعان شەشىمگە سايكەس، بىزدە سۋ ساپاسىنا قاراي 5 جىكتەمە توپقا بولىنەدى. ول بويىنشا العاشقى 4 جىكتەمەگە جاتاتىن سۋدا ادام شومىلۋعا بولادى، جارامدى. ايتپاقشى، قازگيدرومەتتىڭ سايتىندا سۋ بەتىنىڭ ينتەراكتيۆتى كارتاسى بار. ونى كەز كەلگەن ادام قاراپ، تانىسا الادى. ول كارتادا دا ەسىل وزەنى سۋىنىڭ ساپاسى جىكتەمەنىڭ سوڭعى ساتىسىندا تۇر. سوندىقتان ەسىل وزەنىندە شومىلۋعا تىيىم سالىندى. اتالعان وزەنگە قاتىستى ەكىنشى ماسەلە - ونىڭ تارتىلىپ، تايازداپ بارا جاتقانى. بۇل - ۇلكەن ماسەلە. ودان بولەك، وزەن لاس. مويىنداۋ كەرەك، بۇل ادامنىڭ ءىسى، قالدىق كوپ تاستالادى. ل ر ت- نىڭ قۇرىلىسى كەزىندە ەسىل وزەنىندەگى بەلاسار كوپىرىنىڭ جانىندا قۇرىلىس جانە باسقا دا قالدىق تاستالدى، سونىڭ سالدارىنان جاعىمسىز ءيىس پايدا بولدى»، - دەدى پراكتيكالىق ەكولوگتار قاۋىمداستىعىنىڭ باسشىسى لاۋرۋ مالىكوۆا.

ونىڭ ايتۋىنشا، ەلىمىزدىڭ سۋ كودەكسىندە وزەن ماڭىندا سالىناتىن قۇرىلىستىڭ وزىندىك ەرەجەسى جازىلعان جانە ول ساقتالۋى ءتيىس. اتالعان ماسەلەگە قاتىستى ەسىل باسسەيندىك ينسپەكتسياسىنىڭ باسشىسى سەرىكجان بەكەتايەۆ تۇسىنىك بەردى.

«ەسىل وزەننىڭ تايازداۋ ماسەلەسى بۇعان دەيىن دە بىرنەشە رەت كوتەرىلدى. قالالىق ەكولوگيا دەپارتامەنتى اتالعان فاكتىنى تەكسەرىپ، تىركەدى دە. ءبىز ءوز كەزەگىمىزدە قۇزىرلى ورگاندارعا حات جولدادىق، ماسەلە باقىلاۋعا الىندى. راسىمەن وتكەن جىلى وزەن تارتىلۋى بايقالدى. جالپى وزەن سۋىنىڭ ازايۋى ونىڭ ساپاسىنا دا اسەر ەتەدى»، - دەيدى ول.

بۇعان دەيىن استانالىقتار اۋا ساپاسىن ارنايى موبيلدى قوسىمشانىڭ كومەگىمەن تەكسەرە الاتىندىعى تۋرالى حابارلاعان ەدىك .

ايتا كەتسەك، بۇگىن قورشاعان ورتا جاناشىرلارى «Urban talks» جوباسى اياسىندا ەلوردانىڭ ەكولوگيالىق ماسەلەسىن ورتاعا سالدى.

اتالعان شاراعا ەكولوگتارمەن قاتار، قالالىق اكىمدىك جانە قۇزىرلى ورگان وكىلدەرى قاتىستى.